Pachantinpin ñak’ariykuna tukukunqa

ASKHA runakunan tukuy atisqankuta ruwashanku ñak’ariqkunata yanapanankupaq. Wakinmi kanku: doctorkuna, rescataqkuna, bomberokuna, policiakuna ima. Paykunaqa tukuy tiempon llank’ashanku runakunata qhaliyachinankupaq, cuidanankupaq, salvanankupaqpas. Chay ruwasqankuqa ancha allinpunin. Chaywanpas, manan atinkuchu ñak’ariykuna tukuchiyta, manataqmi hayk’aqpas atinqakuchu. Diosllan chaytaqa atinman, ñataqmi prometerqanña.

Diospa Simin Qelqan nin: “Diosmi paykunaq ñawinkumanta tukuy weqeta pichanqa, manan wañuypas kanqañachu, manallataqmi llakikuypas, waqaypas, nanaypas kanqañachu, ñawpaqkaqkunaqa manaña kapusqanrayku”, nispa (Apocalipsis 21:4). Chaypi nisqan hina, Diosllan tukuy ñak’ariykunataqa chinkachinqa. ¿Imaynatan chayta ruwanqa? Guerrakunata, yarqayta, onqoyta, mana allin ruwaykunata, millay runakunatapas chinkachispan.

 Diospa Gobiernonmi lliwta allichanqa

Jehová Diosman qatiq Atiyniyoqqa Wawan Jesusmi, paywanmi Diosqa llapan promesankunata hunt’achinqa. Pisi tiempollamantan Jesusqa hanaq pachamantapacha gobiernamunqa kay pachata. Hinan manaña kanqachu presidentekuna, ministrokuna, kamachiqkunapas. Aswanmi Jesuslla kamachikuq Rey kanqa, huk gobiernollataq kanqapas.

Diospa Gobiernonmi llapan gobiernokunata ñut’unqa. Chaymantan Biblia willarqanña khaynata: “Hanaq Pacha Dios[mi] mana hayk’aq thunikuq suyuta [Gobiernota] sayarichinqa, manataqmi wak suyuqa chayta kamachinqachu, aswanpas llapa suyukunatan ñut’uspa tukunqa, wiñaypaqtaq kanqapas”, nispa (Daniel 2:44). Chay qhepamantaq Diospa Gobiernonpi pachantinpi runakuna huk-nisqalla kawsanqaku.

Kay pachapi kashaspan Jesusqa askha kutita rimarqan Diospa Gobiernonmanta. Huk kutinmi qatikuqninkunaman mañakuyta yachachishaspa nirqan: “Qhapaqsuyuyki [Gobiernoyki] hamuchun, munayniyki kay pachapi ruwakuchun, imaynan hanaq pachapipas ruwakun hinata”, nispa (Mateo 6:10). Chaypi nisqan hina, Diospa Gobiernon chayamuqtinmi Diospa munaynin kay pachapi ruwakunqa. Chay pachan tukuy ñak’ariykunapas chinkapunqa.

Kay pachapi kamachikuqkunaq mana ruway atisqankutan Diospa Gobiernon ruwanqa. Arí, chay gobiernon runakunaman thak kawsayta wiñay kawsaytawan apamunqa. Jehová Diosqa “wiñaypaqmi wañuytapas chinkachinqa, llapaq ñawinmantan waqaytapas ch’akichinqa” (Isaías 25:8). Chayraykun payqa Churinta kachamurqan.

¿Imaraykutaq Diosri mana kunankama ñak’ariykunata chinkachinchu? ¿Imatan suyashan? Diosqa maypachañan ñak’ariytaqa tukuchinman karqan. Ichaqa lliw runakunaq allinninpaqmi manaraq chayta ruwanchu. Imaynan munakuq tayta-mamaqa mana hark’akunkuchu onqosqa wawanku operacionpi ñak’arinanta, chhaynallataqmi Diospas mana hark’akunchu ñak’arinanchista. Payqa yachanmi kay tiempopi ñak’ariykuna qhepaman allinninchispaq kananta. Chayta allinta entiendenapaqqa allintaraqmi yachana runakunaq imatachus akllakunankumanta, huchamanta, Jehová Dioslla Ancha Hatun Kamachikuq kasqanmantawan. ¿Imanaqtinmi askha ñak’ariykuna kashanraq? Bibliaq nisqan hina, huk millay espiritus kay pachata kamachishan pisi tiempollapaq. *

Manan pisi paginakunallapi llapantaqa entiendesunmanchu imarayku ñak’arisqanchistaqa. Ichaqa Diospa imachus ruwananpi yuyaymanaspan consolasqa kasun, suyakuyninchispitaq allin kallpachasqa. Iskaymanta yachasun. Ñawpaqkaqpi: Jehová Diosmi tukuy ñak’ariyninchiskunata chinkachinqa, imaymanatataq allinninchispaq ruwapuwasun. “Ñawpaq sucedesqankuna[pas] qonqasqan kapunqa, manañan yuyarisqapasñachu kanqa” (Isaías 65:17). Chhaynaqa, maytaña ñak’arishanchis chaypas, tiempollanpin Diosqa ima nanaymantapas qhaliyachiwasun.

Chaymantapas Diosqa huk p’unchaytan akllanña runaq ñak’ariyninta tukuchinanpaq. Nisqanchis hina, profeta Habacucmi Jehová Diosta tapusqa hayk’aqchus ñak’ariykunata chinkachinanmanta. ¿Imatataq Diosri kutichirqan? “Manaraqmi tiempo chayamunchu [...], ichaqa hunt’akunqapunin, [...] tiemponpipunin chayamunqa”, nispan nirqan (Habacuc 2:3). ¿Hayk’aqmi chay ‘tiempo chayamunqa’? Qatiqninpi chaymanta yachasun.

[Uranpi willakuy]

 [30 paginapi recuadro]

Biblian willan sumaq kawsay kananmanta

MANAN GUERRAKUNA KANQACHU

“Hamuychis, Señor Diospa ruwasqankunata rikuychis, kay pachapi musphana ruwasqankunata qhawaychis. Paymi teqsimuyuntinpi awqa-tinkuykunata [guerrakunata] qolluchin.” (Salmo 46:8, 9.)

WAÑUPUQKUNAN KAWSARIMUNQAKU

‘Chaninkunatapas mana chaninkunatapas wañusqankumantan Diosqa kawsarichimpunqa.’ (Hechos 24:15.)

LLAPA RUNAKUNAPAQ MIKHUY KANQA

“Askhallaña trigo kachun, orqo patakunapi askhallaña aytikuchun.” (Salmo 72:16.)

MANAÑAN ONQOYKUNA KANQAÑACHU

“Manan mayqellanpas: ‘Onqosqan kani’, ninqachu.” (Isaías 33:24.)

MANAÑAN MILLAY RUNAKUNA KANQAÑACHU

‘Millay runakunan [...] wikch’usqa kanqaku, wasanchaqkunapas chaymanta t’irasqan kanqaku.’ (Proverbios 2:22.)

CHANIN KAWSAYLLAN KANQA

“Chanintapuni kamachikuq reymi [Jesucristo] kanqa, kallanqataqmi cheqaq-kayman hina kamachikuqkunapas.” (Isaías 32:1.)

[30 paginapi dibujokuna]

Diospa Gobiernonpiqa manañan yuyarisunchu ñak’arisqanchista