“Infiernomanta Platón sutiyoq runaq yachachisqanmi astawanqa mast’arikurqan, ñawpa tiempopi filósofo runakunaq yachachisqanmantaqa.” (Historia de los infiernos, de Georges Minois, página 64.)

“Jesuspa nacesqanmanta 150 watakuna hina pasaqtinmi wakin cristianokunaqa yachaysapa griego runakunaq nisqanman hina yachachiyta qallarirqanku [...]. Platón sutiyoq runaq yachachiynintan astawanqa hap’ikurqanku.” (The New Encyclopædia Britannica, 1988.)

“Iglesia Catolicaq nisqanman hinaqa, kansi wiñaypaq ñak’arina infierno. Chaymansi huchasapakunaq alman ripun wañuqtinku hina, chaypitaqsi ‘wiñaypaq rawrashaq ninapi’ ñak’arinku [...]. Infiernopi ñak’ariyqa Diosmanta wiñaypaq t’aqakuysi.” (Catecismo de la Iglesia Católica, tercera edición revisada, página 242.)

“Kawsashaqkunaqa yachankun wañukapunankuta, wañukapuqkunan ichaqa mana imatapas yachankuchu [...]. Wañuy-pachapiqa manan ima llank’anapas yuyanapas reqsinapas yachanapas kanchu.” (Eclesiastés 9:5, 10.)

¿Imatan chay yachachiwanchis wañuqkunamanta? ¿Ñak’arishankuchu “Wañuy-pachapi”? Manan. Bibliaq nisqan hinapas wañuqkunaqa ‘manan imatapas yachankuchu’. Chhaynaqa manañan paykunaqa ñak’arinkuchu nitaq imatapas sientenkuñachu. Chaychá ñawpa tiempomanta Dios sonqo runa Jobpas, huk onqoywan sinchita ñak’arishaspa khaynata mañakurqan Diosmanta: ‘Wañuy-pachapi pakaykuway’, nispa (Job 14:13). Sichus wañuqkuna Wañuy-pachapi ñak’arishankuman chayqa, ¿mañakunmanchu karqan chaypi pakaykusqa kananpaq? Manan riki. Bibliaq Wañuy-pacha otaq infierno nisqanqa llapa wañupuqkunaq maypichus kasqanmantan rimashan, huk hawallapipas p’ampasqa kashankuman hina. Chaypiqa manan ima ruwanapas kanchu.

Chay nisqanchisqa Bibliaq nisqanman hinan kashan, entiendey atiyllataqmi kanpas. Diosqa ancha munakuqmi, ¿chaychu wiñay-wiñaypaq ñak’arichinman huchallikuq runakunata? Hinaspapas, imataña huk runa huchallikurqan chaypas, ¿allinchu kanman chay hucha hawa chhaynata ñak’arichiy? Manapunin (1 Juan 4:8). Chhaynaqa infiernomanta yachachisqankuqa manan cheqaqchu. Cielomanta yachachisqankuri, ¿cheqaqchu kanman? Qatiqninpi chaymanta yachasun.

Kay textokunata leey: Salmo 146:3, 4; Hechos 2:25-27; Romanos 6:7, 23.