LLAPALLANCHISMI sapa p’unchay espejopi qhawakunchis. Wakinqa askha kutitan qhawakunku wakintaq hukllata. Chaytaqa ruwanchis imayna kasqanchista yachanapaqmi.

Bibliata leeypas espejopi qhawakuy hinan (Santiago 1:23-25). Bibliapi yuyaychasqa simikunan sut’ita rikuchiwanchis sonqonchispi imayna runa kasqanchista. Chaymantan Hebreos 4:12 texto nin: “Almatapas, espiritutapas [...] taripanankaman haykun”, nispa. Chaytaqa nishan imayna runa kasqanchista reqsikunapaq Biblia yanapawasqanchismantan. Huk espejo hinan rikuchiwanchis imakunatan mana allintachu ruwashanchis chayta.

Hinaspapas yanapawanchismi mana allinkuna ruwasqanchispi cambiananchispaq. Bibliaqa imaymanapin yanapawasunman, chaytan apóstol Pablo niran: “Diospa Simin Qelqakunaqa llapallanmi Diospa yuyaychasqan, chayraykun allinpuni yachachinapaq, anyanapaq, wanachinapaq, chanin kawsayta yachachinapaq”, nispa (2 Timoteo 3:16, 17). Arí, anyanapaq, wanachinapaq, chanin kawsayta yachachinapaq kasqanmi astawanqa yanapawasun sonqonchispi kawsayninchispi allin runa kananchispaq. Espejopiqa qhawakunchis hawanchispi imayna kasqanchista yachanapaqmi, ichaqa sonqonchispi imayna runa kasqanchistan astawanqa qhawarikunanchis. Chaypaqqa Bibliatan sapa p’unchay leenanchis.

Israel llaqtata Josué umallishaqtinmi Jehová Dios niran: “Kamachikuy simi qelqamantaqa rimashallankipunin, chaytaqa tuta-p’unchaymi yuyaymanallankipuni qelqaq kamachikusqanman hinapuni ruwanaykipaq. Chay hinapin tukuy ima ruwasqaykipas allinkama kasunki”, nispa (Josué 1:8). Arí, Josué imatapas allintapuni ruwananpaqqa “tuta-p’unchaymi” otaq mana saqespa Diospa Simin Qelqata leenan karan.

Salmo qelqapi 1 capitulopi nisqanmi rikuchillantaq Biblia leey ancha allinpuni kasqanta. Chaypin nin: “Kusisamiyoqmi millay runakunaq yuyaychayninta mana hap’ikuqqa, huchasapakunaq purinanpipas mana puriysikuqqa, Diosta asipayaqkunawanpas mana tiyaysikuqqa. Payqa Señor Diospa kamachikuy siminwanmi kusikun, chaytan tutapas p’unchaypas yuyaymanan. Payqa mayu patapi sach’a hinan, tiempollanpi ruruq sach’a hinan, raphinpas q’omerllapunin kashan. ¡Imapas ruwasqanqa allillanpunin!”, nispa (Salmos 1:1-3). Chay textopi  runa hinan llapanchispas allillanpuni kayta munanchis.

Chaymi askha runakuna sapa p’unchay Bibliata leenku. Chhayna leeq cristianota tapuqtinkun payqa niran: “Sapa p’unchaymi Diosmanta mañakuqtiy munani uyariwananta, ¿chaychu ñoqapas mana sapa p’unchay Simin Qelqata leespa uyarinay? ¿Manachu allin amigokunapas allinta uyarinakuspa rimanku?”, nispa. Arí, Bibliata leeyqa Diostapas uyarishasunman hinan.

Yaqapaschá ñawpaqpi huk horariota ruwakuspa Bibliata leeranki. Bibliamanta astawan yachanapaq qallariyninmanta tukukuyninkama leeyqa ancha allinmi. Wakinmi ichaqa maytaña kallpachakushaspapas manaraq leeyta tukushaspa saqepunku. Yaqapaschá qanpas chay hinapi tarikuranki. Chaymi qatimuq parrafokunapi iskay yanapaykunata qhawarisun Bibliata tukunanchiskama leenapaq.

Huk horariota ruwakuy. Tiempoykita allinta qhawarispa yuyaykuy ima horatan Bibliata leewaq, hinaspa chay tiempota t’aqay leenaykipaq. Ichaqa huk horatawan t’aqay imapas karuqtin chay horapi leenaykipaq. Chhaynapin mana saqespa sapa p’unchay Bibliata leenki. Chayta ruwaspan Berea llaqtamanta wakin runakuna hina kanki, “paykunan Diospa siminta tukuy sonqo chaskikurqanku, chaykunaqa hinapunichus kasqantataq Diospa Simin Qelqakunapi sapa p’unchay t’aqwirqanku” (Hechos 17:11).

Yuyaykuy hayk’a tiempopi tukuyta munanki. Sichus huk watallapi tukuyta munanki chayqa, p’unchaypin kinsa otaq pisqa capitulokunata leenayki. Chayta ruwanapaqmi qatimuq paginakunapi recuadrokuna kashan. ¿Manachu qanpas chaykunawan yanapachikuspa leewaq? Ñawpaqta “Fecha” nisqanpa uranpi qelqay leeyta qallarisqayki fechata. Leesqaykiman hinataq qatiqnin cuadrochapi marcay. Chhaynapin yachanki maykama leesqaykita.

Ichaqa ama huk kutipi leeyta tukuruspallachu saqerapuy. Sapa watanmi chay recuadrokunawan yanapachikuwaq Bibliata leenaykipaq mayqen libromantapas qallarispa. Chaymantapas pisi-pisillamanta leeyta munaspaqa huk p’unchaypi leenatan t’aqawaq iskay otaq kinsa p’unchaykunapi leenaykipaq.

Hayk’a kutitaña Bibliata leesunman chaypas tarishallasunmi mosoq yachaykunata kawsayninchispi yanapawananchispaq. ¿Imarayku mosoq yachaykunata hina qhawarisunman? ‘Kay pachaq imaynachus kasqan rikusqanchis tukukapushasqanman’ otaq cambiapushasqanman hina sapa p’unchay imaymanapi tarikusqanchisrayku (1 Corintios 7:31). Chayrayku sapa p’unchay espejopi hina Diospa Simin Qelqapi qhawakuy. Chayta ruwaspan sapa p’unchay Diospa siminta uyarinki (Salmo 16:8).