Diosta allinta reqsiy

Jehová Diosqa llamp’u sonqo runatan munakun

Números 12:1-15

KAY pachapi allin qhawarisqa kayta munaqkunaqa munapayaq, llallipunakuq, hatunchakuqmi kanku. ¿Munakuwasunmanchu Dios chhayna kaqtinchis? Manan. Diosqa llamp’u sonqo kananchistan munan. Chaytan kunan qhawarisun Números 12 capitulopi. Israelitakunan Egipto suyumanta lloqsinpuspa Sinaí orqopi kasharanku.

Chaypi kashaspankun “Mariapiwan [Míriam] Aaronpiwan [sullk’anku] Moisés contra rimarqanku” (1 versículo). Contranpi rimarqanku nispaqa yaqapaschá nishan Moisespa qhepanpi chay rimakuykuna ch’eqerichisqankumanta. Miriampa sutinmi ñawpaqta rikhurin, chhaynaqa paypaschá chay rimakuyta qallarin. Cus llaqtayoq warmiwan Moisespa casarakusqan hawan chayqa qallariran. Yaqapaschá Miriamqa celosa kasharan otaq manchakusharan huk llaqtayoq warmi paymanta aswan allin qhawarisqa kananmanta.

Ichaqa manan chayraykuchu rimakusharanku. Paykunaqa khaynatan rimaranku: “¿Señor Diosqa Moisesllatachu rimaykun? ¿Manachu ñoqanchistapas rimaykullawanchistaq?” nispa (2 versículo). Chayta nisqankupin rikuchisharanku aswan autoridadniyoq kayta allin qhawarisqa kaytawan munasqankuta.

Moisesqa pacienciawanmi aguantaran pay contra rimasqankuta, chaychá paymanta Biblia nin: ‘Moisesqa aswan llamp’u sonqon karqan, kay pachantin qharikunamantapas’, nispa (3 versículo). * Moisesqa manan imaniranpaschu, Jehová Diosmi paymantaqa rimariran.

Diospaqqa Moisesmanta rimakusqankun paymantapas rimakushankuman hina karan. ¿Imarayku? Moisesta Pay kikinpuni akllakusqanrayku. Chaymi Miriamta Aarontawan phiñakuspa niran: “Paywanqa uya-uya pura hinan rimani”, nispa. Hinaspan tapuran: “¿Imaynataq qankunaqa pay contra rimayta mana manchakunkichischu?” nispa (8 versículo). Chaypi nisqan hina Moisespa contranpi rimaspankun Jehová Diospa contranpi rimasharanku. Chhayna mana p’enqakuspa rimasqankumantan Jehová Diosqa sinchita paykunapaq phiñakuran.

Chaymi Diosqa Miriamta lepra onqoywan muchuchiran. Hinaspan Aarón Moisesta valekuran pananrayku Diosmanta mañakunanpaq. Qhawaríy, Moisesmanta mana allinta rimashaspankun kunanqa payta valekunanku karan Míriam qhaliyapunanpaq. ¿Imatan ruwaran Moisés? Jehová Diosmantan mañakuran Miriamta qhaliyachinanpaq, chaypin rikuchiran sumaq sonqo, huch’uyaykukuq, pacienciakuq kasqanta. Chaymi Miriamqa qhaliyapuran, ichaqa qanchis p’unchaymi karpa-karpa ukhumanta qarqosqa karan.

Chaykunan rikuchiwanchis munapayaq kaypas, hatunchakuq kaypas, hukkunawan llallinakuytapas mana allin kasqanta, chaymi chaykuna sonqonchispi kaqtinqa wikch’unanchis. Aswanmi Dios munakuwananchispaqqa llamp’u sonqoyoq, huch’uyaykukuq kananchis. Dios kikinmi prometewanchis: “Llamp’u sonqokunan ichaqa kay hallp’ata chaskinqaku, sumaq thak-nisqataq tiyakunqaku”, nispa (Salmo 37:11; Santiago 4:6).

[Uranpi willakuy]