Infiernomanta cheqaqta yachayqa yanapawasunmanmi Diosman achhuykunanchispaq

PIKUNACHUS cristianon kayku nispa nina infiernopi ñak’ariymanta yachachishanku chayqa, millay Diospaq hinan Jehová Diosta qhawarichishanku. Arí, Bibliaqa ninmi Diosqa tukuchinqan millay runakunata nispa (2 Tesalonicenses 1:6-9, Biblia de Jerusalén, castellano rimaypi). Ichaqa manan millay kasqanraykuchu Diosqa chay runakunata wañuchinqa, aswanpas chanin kasqanraykun.

Sut’itan yachanchis, Diosqa manan millaychu nitaq huchakunatapas yuyashallanchu. Pay kikinmi nin: “¿Ñoqari huchayoqpa wañunanta munanichu? Manan”, nispa (Ezequiel 18:23). Diosqa manataq kusikunchu huchallikuq runakunata wañuchispa chayqa, ¿kusikunmanchu wiñaypaq ñak’arichispa?

Diosqa munakuqmi (1 Juan 4:8). Arí, “allinmi SEÑOR Diosqa llapapaq, khuyapayaspan llapa ruwasqanta qhawashan” (Salmo 145:9). Chaykunaraykun Payqa tukuy sonqonchiswan munakunanchista munan (Mateo 22:35-38).

¿Infiernotachu manchakunchis icha Diostachu munakunchis?

Nina infiernopi creeqkunaqa sinchitan Diosta manchakunku castigakuqta hina qhawarispanku. Ichaqa cheqaqta Diosmanta yachaspa payta munakuqkunaqa manan chhaynatachu Diosta manchakunku. Diosta manchakuyqa manan huk millay runatapas manchakusunman hinachu, aswanpas anchata Diosta respetaymi chayraykun mana ima mana allintapas ruwayta munasunmanchu Diosta mana phiñachinanchisrayku. Arí, Diosmanta cheqaqta yachaqkunaqa chhaynatan Diosta manchakunku anchatataq munakunkupas. Chaymi Salmo 111:10 nin: “Yachayniyoq kanapaqqa Señor Diostaraqmi manchakuna, kamachikuyninkunata kasukuqqa allin yuyayniyoqmi”, nispa.

Qhawarisunchis imaynatan Kathleen sutiyoq warmita infiernomanta cheqaqta yachasqan yanaparan drogakunata saqepunanpaq chayta. Payqa mana allin ruwaykunapi, mana allin kusirikuykunapi qhelli huchapi iman purisqa, chaymi pay kikintapas cheqnikapusqa. Huk watachayoq wawachanta qhawarispas yuyaykuq: “Wawayta khayna tratasqaymantaqa nina infiernopichá ñak’arisaq”, nispa. Askha kutipis drogakunata saqeyta munasqa ichaqa manas atisqachu. Paymi nin: “Allin runa kaytan munarani ichaqa imayna kawsasqayta huk runakunaq imayna kawsasqantapas mana valeqpaq hinan qhawarirani, manan valorniy karanchu mana allin kawsasqayta saqenaypaq”, nispa.

 Chhaynapi tarikushaspanmi Jehová Diospa testigonkunata reqsiran. Paymi willakun: “Bibliawanmi yachachiwaranku nina infiernoqa mana cheqaqchu kasqanta, ¡thakpin sientekurani mana hayk’aqpas nina infiernopi ñak’arinaymanta yachaspay!” nispa. Paymanqa yachachillarankutaqmi runakuna hamuq tiempopi, kay Hallp’api wiñaypaq tiyanankuta mana allin kawsaypas chinkapunanta (Salmo 37:10, 11, 29; Lucas 23:43). Paymi nin: “Chayraqmi sumaq suyakuy ñoqapaq karan, Paraisopi wiñaypaq kawsay”, nispa.

Kathleenqa yacharanñataq sinchitapuni manchakusqan nina infiernoqa mana cheqaqchu kasqanta chayqa, ¿atinmanchu sinchita drogakunaman qokusqanta saqepuyta? Paymi nin: “Sapa drogakuyta munaspayqa sonqomantan Jehová Diosta rogakuq kani yanapawananpaq. Pay sinchita chay viciota cheqnikusqantan yuyariq kani chaymi mana llakichiyta munaranichu. Payqa uyarillawaqpunin mañakusqaytaqa”, nispa (2 Corintios 7:1). Kathleenqa Diospa sonqonta kusichiyta munaspan drogakunata saqepuran.

Arí, Diospa munaynintaqa ruwananchis payta anchata munakuspa respetaspa iman, manan nina infiernopi ñak’ariyta manchakuspachu. Chayta ruwaspaqa wiñaypaqmi kusisqa kawsasunchis, salmistaq nisqan hina: “Kusisamiyoqmi pipas Señor Diosta manchakuqqa, Señor Diospa ñanninkunapipas puriqqa” (Salmo 128:1).

[9 paginapi dibujo recuadropiwan]

¿PIKUNAN INFIERNOMANTA KACHARICHISQA KANQAKU?

Bibliata huk simikunaman t’ikraqkunan mana allintachu t’ikranku “guéenna, háides” nisqa griego simikunata; iskaynintan “infierno” nispalla t’ikranku. Chaymi runakunataqa pantachin. Bibliapi guéenna nisqa simiqa “wiñaypaq mana ima suyakuyniyoq wañuy” ninantan nin, chaymantaqa manañan pipas kawsarimpunqañachu. Háides (hades) nisqapi kaqkunan ichaqa kawsarimpunqaku.

Chaychá apóstol Pedropas Jesuspa kawsarimpusqanmanta rimashaspa niran: ‘Payqa manan Wañuy-pachapi [griegopi háides] saqerparisqachu karan’, nispa (Hechos 2:27; Salmo 16:10). Griego rimaypi háides nisqa simitan kay textopiqa wakin Bibliakuna nin: “infierno”, nispa. Chhaynaqa, Jesusqa manan may nina rawraypipaschu ñak’arisharan, aswanmi hades nisqapi kasharan otaq wañusqa kasharan. Diosqa huk runakunatapas kawsarichinqan chay hades nisqamanta.

Qhepa tiempopi kawsarimpuymanta rimaspan Biblia nin: “Wañuypas Ukhu-pachapas [otaq infiernopas] paykunapi wañusqa kaqkunata entregarqan”, nispa (Apocalipsis. 20:13, 14). Chaypi rikusqanchis hina, infiernopi kaqkunaqa llapankun kawsarimpunqaku. Diosmi paykunata qhawarin kawsarinankupaq hina, chhaynapin infiernoqa ch’usaq kapunqa (Juan 5:28, 29; Hechos 24:15). Chayqa ancha allin suyakuymi, riki. Ancha munakuq Jehová Diosllanchismi chaytaqa qowasunman. Arí, payraykun hukmanta rikusunchis munakusqanchis runakunata.