¿Jehová Dios hinachu hukkunata qhawarishanchis?

“Cuerpopi ama t’aqanakuy [kachunchu], aswanpas cuerpopi llapan miembrokuna huknisqalla [yanapanakuchunku].” (1 COR. 12:25.)

1. ¿Imaynan sientekuranki Diospa llaqtanman haykuspa?

¿IMAYNAN sientekuranki kay millay pachamanta lloqsispa Jehová Diospa llaqtanman haykuspa? Kusikurankichá wayqe panakuna sumaqta tratasqasuykimanta. Saqraq kamachisqan pachapin ichaqa runakuna mana sumaqtachu tratanakunku sinchi millay runakunataq kankupas. Qanmi ichaqa Diospa llaqtanman haykuspa, wayqe panakunawan thakpi huk nisqalla kawsayta qallariranki (Isa. 48:17, 18; 60:18; 65:25).

2. a) ¿Imanaqtinmi wayqe pananchiskunata mana allinta qhawarisunman? b) ¿Ima ruwanapaqmi kallpachakunanchis?

² Ichaqa tiempoq pasasqanman hinan, mana allinta wayqe panakunata qhawarisunman. Huchayoq runa kayninchispi wayqe panakunaq pantasqallantaña qhawarisunman, manañataq Dios sonqo kasqantaqa. Chhayna kaspaqa manan Jehová Dios hinachu wayqe panakunata qhawarishasunman. Wayqe panakunata sumaqta qhawarinapaqqa kallpachakunanchismi  Jehová Dios hina paykunata qhawarinapaq (Éxo. 33:13).

¿Imaynata Jehová Dios qhawarin iñiqmasinchiskunata?

3. ¿Imawanmi Biblia tupanachin cristianokunata?

³ 1 Corintios 12:2-26 textopin apóstol Pablo hanaq pachapaq akllasqa cristianokunata tupanachin “askha miembrokunayoq” cuerpoman. Cuerpoq miembronkunaqa manan kaqllachu, chay hinan congregacionpi wayqe pananchiskunapas, mana kaqllachu kanku caracterninkupi, ima ruway atisqankupipas. Chaywanpas Jehová Diosqa llapankutan sumaqta qhawarin, llapankutan munakun, llapankutataq ancha valorniyoqpaqpas qhawarin. Chayraykun apóstol Pablo niran: Llapa wayqe panakuna ‘huk-nisqalla yanapanakuychis’, nispa. Mayninpin ichaqa sasa ñoqanchispaq kanman apóstol Pabloq nisqanta kasukuy, astawanqa sasa kanman huk iñiqmasinchis imayna kasqan mana gustawaqtinchis.

4. ¿Imanaqtinmi mana wayqe pananchiskunaq pantasqallantachu qhawarinanchis?

⁴ Ñawpaqpi nisqanchis hina, yaqapaschá iñiqmasinchiskunaq pantasqallanta qhawarinchis. Chayta rikch’anachisunman sumaq wasiq perqanpi mana reparay qhellikunata qhawaywan. Jehová Diosqa manan wayqe panakunaq pantasqallantachu qhawan, aswanpas lliw allin ruwayninkunatawanmi qhawan. Chay hinaqa kallpachakusun Jehová Dios hina hukkunata qhawarinapaq, chhaynapin congregacionpi wayqe panakunawan munanakuspa huk nisqalla kawsasunchis (Efe. 4:1-3; 5:1, 2).

5. ¿Imanaqtinmi mana hukkunata juzgananchischu?

⁵ Jesusqa yacharanmi runakuna runamasinkuta huchachaqpuni kasqankuta. Chayrayku niran: “Ama hukkunata huchachaychischu, ahinapin Diosqa mana huchachasunkichischu”, nispa (Mat. 7:1). Griego rimaypiqa Jesusqa nisharan, “amaña hukkunata huchachaychischu” nispan. Jesusqa yacharanñan askha uyariqninkuna runamasinkuta jusgaqpuni kasqankuta. ¿Ñoqanchispas hukkunata juzgaytachu yacharunchis? Chhayna kaqtinqa kallpachakunanchismi cambianapaq, chhaynapin manaña juzgasqachu kasunchis. ¿Imanaqtintaq ñoqanchisri Jehová Diospa akllasqan umalliqkunata juzgasunman? ¿Imaraykutaq iñiqmasinchismanta rimaspa nisunman, payqa manañan Jehová Diospa llaqtanpiqa kananchu, nispa? Yaqapaschá huk iñiqmasinchis imallapipas pantashanman, ichaqa Jehová Diostaq llaqtanpi payta chaskishallan chayri, ¿imanaqtintaq ñoqanchis iñiqmasinchista huchachasunman? (Juan 6:44.) Jehová Diosmi llaqtanta pusashan, paymi tiempollanpi ima mana allintapas allichanqa (leeychis Romanos 14:1-3; vs. 4, NM).

6. ¿Imatan Jehová yachan serviqninkunamanta?

⁶ Jehová Diosqa allintan yachan may tukuyta sapankanchis Bibliaq nisqanta kasukushanchis chayta. Payqa yachanmi serviqninkuna mosoq pachapi ch’uya kaspa may sumaq kanankuta. Chaymi Diosqa mana pantasqallanchistachu qhawan. Salmo 103:12 nisqan hina, “imaynan inti lloqsimuyta inti haykuytawan karunchan, ahinatan huchanchiskunata karunchawanchis”. ¡Anchatan Jehová Diosta agradecekunchis chhayna kasqanmanta! (Sal. 130:3.)

7. ¿Imatan Jehová Dios Davidpi qhawaran, imatan chaymanta yachanchis?

⁷ Bibliaq willasqan hina, Jehová Diosqa serviqninkunaq allin ruwasqallantan qhawan. Qhawarisun  imaniranmi Davidmanta: “[Davidqa] kamachikuyniykunatan hunt’arqan, tukuy sonqotaq qatikuwarqan, ñawpaqeypipas chaninta ruwarqan”, nispa (1 Rey. 14:8). Yachasqanchispas hina Davidqa hatun huchakunamanmi urmaran. Jehová Diosmi ichaqa qhawaran Dios sonqo kasqanta, allin ruwayninkunallatataq yuyariranpas (1 Cró. 29:17).

Jehová Dios hina wayqe pananchiskunata qhawarisun

8, 9. a) ¿Imakunapin Jehová Dios hina kasunman? b) ¿Ima rikch’anachiymi yanapawasunman Jehová Dios hina wayqe pananchiskunata qhawarinanchispaq?

⁸ Jehová Diosqa yachanmi runakunaq sonqon imayna kasqanta, ñoqanchismi ichaqa mana yachanchischu. Chayraykun mana runamasinchista juzgananchischu. Ñoqanchisqa mana yachanchischu wayqe pananchiskuna imarayku imakunatapas ruwanku chayta. Chayraykun kallpachakunanchis Jehová Dios hina wayqe pananchiskunaq allin ruwayninkunata qhawanapaq, amataq pantasqallantachu. Qhepamanmi runakunaqa mana pantaqña kasunchis. May allinmi kanman Jehová Dios hina hukkunata qhawariyqa. Chhayna kaspaqa sumaqta wayqe pananchiskunawan kawsasunchis (Efe. 4:23, 24).

⁹ Kaywan rikch’anachisun: Huk wasin kanman chhallusqa ventanakunayoq, techonmantapas unu sut’umushanman, unuq pasanan tubokunapas p’akisqallaña kashanman. Chayta qhawarispankun runakunaqa ninkuman: Kay wasitaqa thunipunallañan, nispa. Ichaqa huk runan mana chay wasiq hawallantachu qhawan, reparanmi wasi allin cementasqa kasqanta, perqankunapas allinraq kasqanta, chaymi nin: Kay wasiqa allichanallamantan kashan, nispa. Wasita rantispataq kallpachakuspa imakunachus mana allin kasqanta sumaqta allicharun. Kunanqa runakunaqa chay wasiq ladonta pasaspa ninku: Munaychan kay wasiqa qhawarikun, nispa. Ñoqanchispas chay wasita allichariq runa hinan kasunman. Wayqe panakunaq imallapipas pantasqanta qhawanamantaqa, qhawarisunman allin ruwayninkunata Jehová Diospaq imakuna ruway atisqankutapas. Chhaynapin Jehová Dios hina wayqe panakunata munakusunchis Dios sonqo kasqankurayku (leeychis Hebreos 6:10).

10. ¿Imaynatan yanapawanchis Filipenses 2:3, 4?

¹⁰ Apóstol Pablon Filipos llaqtapi kaq cristianokunata kallpacharan sumaqta kawsanankupaq. Niranmi: “Ama imatapas ruwaychischu allinnillaykichista maskhaspapas hatunchakuspapas, aswanpas huch’uyyaykukuspa hukkunata aswan allinpaq hap’iychis kikiykichismantaqa. Ama pipas pay kikinpa allinnillantaqa maskhachunchu, aswanpas hukkunaq allinnintapas maskhallachuntaq”, nispa (Fili. 2:3, 4). Huch’uyyaykukuq kaymi yanapawasun wayqe pananchiskunata sumaqta qhawarinanchispaq. Sichus paykunapi interesakusunchis allin ruwayninkunatapas makilla qhawasunchis chayqa, Jehová Dios hinan paykunata qhawarisunchis.

11. ¿Iman sucedeshan askha congregacionkunapi?

¹¹ Sasa tiempokunapi kawsasqanchisraykun askha runakuna wak nacionkunata ripunku tiyaq. Chayraykun wakin llaqtakunapiqa askha nacionkunamanta runakuna tiyashanku. Chay runakunamanta wakinmi Biblia estudiayta qallariranku, kunantaq ñoqanchiswan kuska Jehová Diosta servishanku. Paykunan kanku “llapa suyukunamanta, ayllukunamanta, llaqtakunamanta, tukuy rimaykunamantawan” (Apo. 7:9). Chayraykun askha congregacionkunapiqa huñukunku askha nacionmanta wayqe panakuna.

12. ¿Imaynatan llapa wayqe pananchiskunata qhawarinanchis? ¿Imanaqtinmi mayninpi sasa kanman wayqe pananchiskuna munakuy?

¹² Sichus congregacionninchispi askha nacionkunamanta wayqe panakuna kanku chayqa, astawanraqmi kallpachakunanchis llapallankuwan sumaqpi kawsananchispaq. Yuyarinanchismi apóstol Pedro wayqe panakunata kallpachasqanta, “wawqe-panapura ch’uya sonqowan [...] tukuy sonqopuni munanakuychis” (1 Ped. 1:22). Ichaqa sasapaschá kanman askha nacionkunamanta congregacionpi wayqe panakunata ch’uya sonqowan munakuy, hukniray kawsayniyoq costumbrekunayoq kasqankurayku, wakinqa wakchapaschá kankuman otaq pisi educacionniyoqpas. Sasatapaschá entiendesunman wak nacionmanta wayqe pananchis hukniray yuyaykusqanta ruwasqantapas. Paykunapas sasatapaschá ñoqanchista entiendewanchis. Chhaynaña kaqtinpas, llapanchistan Biblia kamachiwanchis: “Lliw iñiqmasiykichiskunata munakuychis”, nispa (1 Ped. 2:17, NM).

13. ¿Imaraykun qhawarikunanchis wak llaqtayoq wayqe panakunamanta imayna yuyaykusqanchista?

 ¹³ Yaqapaschá imayna yuyaykusqanchista cambiananchis kanqa lliw wayqe pananchiskunaman sonqonchista ‘kicharinapaq’ (leeychis 2 Corintios 6:12, 13). Wakinmi ninku: “Manan chay llaqtamanta runakunataqa cheqnikunichu”, nispa, ichaqa mana allintan rimayta qallarinku, chay runakunaqa khaynan haqaynan kanku, nispa. ¿Hayk’aqllapas chhaynata niranchischu? Sichus chhaynata rimasunman chayqa, cheqnikushasunmanraqmi wak llaqtayoq runamasinchista. Chayrayku tapukunanchis: “¿Kallpachakunichu wak llaqtayoq runakunata allinta reqsinaypaq?” nispa. Sichus chayta tapukuspa qhawarikusunchis imayna kasqanchista chayqa, manan sasachu kanqa wak llaqtayoq wayqe panakunata allinpaq qhawariyqa tukuy sonqowan munakuypas.

14, 15. a) ¿Pikunan mana allin yuyaykusqankuta cambiaranku? b) ¿Imata ruwaspan ñoqanchispas paykuna hina kasunman?

¹⁴ Bibliaqa willanmi askha runakuna mana allin yuyaykusqankuta cambiasqankumanta. Yuyarisun apóstol Pedromanta. Judío runataq karan chayqa, manan mana judío runaq wasinman payllamantaqa haykunmanchu karan. Jehová Diosmi ichaqa Pedrota kamachiran mana judío runa Cornelioq wasinman rinanpaq, may sasachá paypaqqa karan chay ruwayqa. Jehová Diospa munayninmi karan lliw llaqtakunamanta runakuna llaqtanman haykumunanpaq, chayta yachaspan apóstol Pedroqa yuyaykusqanta cambiaran (Hech. 10:9-35). Saulo sutiyoq apóstol Pablopas cambiananmi karan imayna yuyaykusqanta chhaynapi hukkunata mana cheqnipakunanpaq. Apóstol Pablopunin willakun manaraq Jesuspa qatikuqnin kashaspa cristianokunata sinchitapuni cheqnikusqanta, chaymi ‘Diospa llapan iglesianta ñak’arichispa qatiykacharan, ch’usaqyachiytataq munaranpas’. Ichaqa mana allin ruwasqanta wiraqochanchis Jesús reparachiqtinmi, mana allin ruwayninkunata saqepuran, ñawpaqpi qatiykachasqan runakunatapas kasukuran (Gál. 1:13-20).

¹⁵ Jehová Diospa yanapayninwanqa cambiasunmanmi mana allin yuyaykusqanchista. Chayrayku, sichus reparakunchis wakin wayqe panakunata cheqnikusqanchista chayqa, tukuy atisqanchistan ruwananchis manaña cheqnipakunanchispaq, chhaynapin ‘santo espirituq kallpachasqan huk sonqolla kasunchis, hukkuna hukkunawantaq thak-kaypi kawsasunchispas’ (Efe. 4:3-6). Bibliaqa kallpachawanchismi “munakuq sonqo [kananchispaq], munakuymi tukuy imatapas sumaqta hukllaman tukuchin” (Col. 3:14).

Jehová Dios hina lliw predicasqanchis runakunata qhawarisun

16. ¿Imatan Jehová Dios munan lliw runakunamanta?

¹⁶ Apóstol Pablo qelqaran: “Diosqa manan  mayqen runamanpas sayapakunchu”, nispa (Rom. 2:11). Jehová Diosqa munanmi lliw llaqtakunamanta runakuna payta servinanta (leeychis 1 Timoteo 2:3, 4). Chayrayku kamachiran “allin willakuykunata [...], llapa suyukunaman, ayllukunaman, tukuy t’aqa rimaqkunaman, llaqtakunamanwan” willakunanta (Apo. 14:6). Chaymantapas Jesusmi niran: ‘Chakraqa kay pachan’, nispa (Mat. 13:38). Chhaynaqa, ¿imatan qanpas familiaykipas ruwanaykichis?

17. ¿Imaynatan lliw runakunata yanapasunman?

¹⁷ Manapaschá llapanchischu karu llaqtakunaman riyta atisunman Reinomanta predicaq. Ichaqa llaqtanchispi tiyaq karu llaqtayoq runakunamanqa predicasunmanmi. Wakin runakunamanqa sapa kutillanmi predicanchis, ichaqa ¿kallpachakusunmanchu karu llaqtamanta hamuq runakunamanpas predicananchispaq? ¿Kallpachakusunmanchu manaraq allin willakuykunata uyariqkunaman predicananchispaq? (Rom. 15:20, 21.)

18. ¿Imaynata Jesús rikuchiran runakunapi interesakusqanta?

¹⁸ Jesusqa lliw runakunatan yanapayta munaran, chayraykun mana huk llaqtallapichu predicaran. Aswanpas “llapan llaqtakunata ayllukunatawanmi purirqan”. Runakunata rikuspataq “khuyapayarqan”, qatikuqninkunatataq niran chay runakunata yanapanankupaq (Mat. 9:35-37).

19, 20. ¿Imaynatan ñoqanchispas Jehová Dios hina Jesús hina lliw runakunapi interesakusunman?

¹⁹ ¿Imata ruwaspan ñoqanchispas Jesús hina kasunman? Wakin cristianokunan kallpachakunku maynillanpi predicakusqan cheqaskunapi predicanankupaq: mercadokunapi, parquekunapi, terminalkunapi, cuidasqa wasikunapipas. Wakin cristianokunataq kallpachakunku huk rimaykunata yachanankupaq, chhaynapi llaqtankupi tiyaq wak llaqtayoq runakunaman Reinomanta allin willakuykunata willanankupaq. Sichus paykunaq rimayninkupi napaykusunchis chayqa, sut’itan reparanqaku paykunapi interesakusqanchista. Manan llapanchischu huk rimaykunataqa yachasunman, ichaqa kallpachasunmanmi huk rimaykunata yachashaqkunata. Ichaqa amapuni chay wayqe pananchiskunataqa pisi kallpayachisunchu, nitaq nisunchu: Imaraykun predicanki wak llaqtayoq runakunata, nispaqa. Jehová Diosqa ancha valorniyoqpaqmi qhawarin lliw runaq kawsayninta, ñoqanchispas pay hinan qhawarinanchis (Col. 3:10, 11).

²⁰ Sichus Jehová Dios hina runamasinchista qhawarisunchis chayqa, lliw runamanmi predicasunchis imaynaña kaqtinkupas: mana wasiyoqña thanta p’achayoqña, otaq mana allintaña kawsaqtinkupas. Wak llaqtayoq runa mana allintaña tratawaqtinchispas manan chayraykuchu mana allinta yuyaykusunchis llaqtanmanta otaq ayllunmantapas. Apóstol Pablotan wakin runakuna mana allinta trataranku, chaywanpas payqa predicashallaranmi chay llaqtayoq runakunata (Hech. 14:5-7, 19-22). Pabloqa yacharanmi chay llaqtakunamanta wakin runakuna Jesuspa qatikuqnin kanankuta.

21. ¿Imaynatan yanapawanchis Jehová Dios hina hukkunata qhawariy?

²¹ Qhawasqanchispas hina lliw wayqe panakunatan maymantaña kaqtinkupas Jehová Dios hina qhawarinanchis. Dios hina wayqe pananchiskunata qhawarisunchis chayqa, congregacionpin thakpi huk nisqalla kawsasunchis. Chay hinallatataqmi predicasqanchis runakunatapas qhawarinanchis. Chhaynapin runakunata allinta yanapasunchis ‘mana pimanpas sayapakuq’ Jehová Diosta munakunankupaq. Jehová Diosninchisqa lliw runakunatan munakun, ‘llapallanku paypa kamasqan’ kasqankurayku (Job 34:19).

¿Imanispan kutichiwaq?

• Huchayoq runa kayninchispi, ¿imallatan wayqe pananchiskunapi qhawarisunman?

• Jehová Dios hina, ¿imatan wayqe pananchiskunapi qhawarinanchis?

• Kay estudiopi yachasqanchis hina, ¿imaynatan qhawarinanchis wak llaqtayoq wayqe panakunata?

• Jehová Dios hina, ¿imaynatan qhawarinanchis predicasqanchis runakunata?

[Tapuykuna]

[26 paginapi foto]

¿Imatan ruwasunman wak llaqtayoq runakunata allinta reqsinanchispaq?

[28 paginapi fotokuna]

¿Imatan ruwasunman aswan askha runakunaman allin willakuykunata predicananchispaq?