1929 watapin agosto-setiembre killakunapi 9 p’unchayllapin 10.000 más predicaqkuna Estados Unidos nacionpi predicaypi yanapakurqanku. Chaypin 250.000 librokunata folletokunata rakimurqanku, chaypiqa waranqa hina colportorkuna otaq precursorkunan yanapakurqanku. Bulletin * qelqapin willakurqan 1927-1929 watakunapaqqa aswan askha precursorkuna yapakusqanmanta.

1929 watapi 29 octubre killapin Estados Unidospi askha bancokuna, fabricakuna, chakrapi llank’aqkunapas fracasoman haykurqanku. Chaymi waranqanpi runakuna mana llank’anayoq qhepakurqanku. Hinaspapas 1933 watapin sapa p’unchay bancokuna askha wasikunata qechupurqanku.

Chhayna sasachakuykunapi tarikuspa, ¿imatan ruwarqanku tukuy tiemponkuwan Diosta serviqkuna? Askha iñiqmasinchiskunan carronkuta wasiman tukuchirqanku, chhaynapin manaña pagarqankuchu wasi alquilerta, impuestota ima. Chaykunan yanaparqan manaña nishuta gastanankupaq. * Hatun huñunakuykunaman rispapas chay carrollankupiñan puñuqku. 1934 watapin Bulletin qelqapi lloqsimurqan imaynatas carronkuta wasiman tukuchinankuta luzniyoqta, cocinayoqta, puñunayoqta chiri mana haykunanpaq ima.

Askha precursorkunan carronkuta wasiman tukuchirqanku. Victor Blackwell willakun: “Noeqa manan yacharqanchu barcokuna ruwayta, chay hinan ñoqapas mana yacharqanichu carrota wasiman tukuchiyta”, nispa. Chaywanpas carrontan wasiman tukuchirqan.

Avery, Lovenia Bristow iñiqmasinchiskunan carronkuta wasiman tukuchirqan. Avery willakun: “Wasiytaqa apaqpunin kayku”, nispa. Harvey, Anne Conrow iñiqmasikunapas Bristow iñiqmasikunawan kuskan precursorkuna kallarqankutaq, paykunapas carronkutan wasiman tukuchirqanku. Chay wasinkuq perqanqa cartonmanta breawan llut’asqan karqan, chaymi carronku sapa puririqtin pisi-pisim anta cartonkuna p’akikurqan. Avery willakun: “Manan hayk’aqpas chay wasita hinaqa rikurqanichu”, nispa. Hinaspapas nirqanmi: “Conrow iñiqmasinchiskunaqa iskaynin wawakunantin ancha kusisqan kawsarqanku”, nispa. Harvey Conrow iñiqmasi nirqan: “Jehová Diosta servispaqa manan ima pisichikuypipas tarikurqaykuchu, Diosqa sumaqtan cuidawarqanku”, nispa. Chay qhepamanmi Harvey Conrow familiantin Galaad Escuelaman rirqanku, hinaspan Perú nacionpi misionerokuna karqanku.

1929 watapin Giusto, Vincenza iñiqmasikunapas familiantin precursorkuna karqanku. Wawayoq kanankuta yachaspa carronkuta huk sumaq wasiman tukuchirqanku, karpakunapi tiyasqankumantaqa aswan allinraqmi karqan. Paykunaqa  wawanwan kuskan Estados Unidos nacionpi tiyaq Italia nacionmanta runakunata predicarqanku.

Askha runakunan uyarirqanku allin willakuykunata, chaywanpas wakchakuna, mana llank’anayoq kaqkunaqa manan qolqeta qoyta atirqankuchu chaskisqanku qelqakunamanta. Chaymi precursorkuna imaymana cosaskunawan cambiaqku, iskay precursorakunan 64 cosaskunata chaskirqanku, chayqa tiendapaq lista ruwana hinan karqan.

Huk kutinmi Fred Anderson iñiqmasinchis chakrapi llank’aq runawan tuparqan, chay runan librokunata mañakurqan ichaqa mana qolqeyoq kasqanraykun mamanpa lentesninwan cambiananpaq nirqan. Vecinonpas munarqanmi qelqanchiskunata, ichaqa nirqanmi: “Manan lentesniy kanchu leenaypaq”, nispa. Vecinonpa lentesninwanqa atirqanmi leeyta, chaymi librokunamanta lentesmantawan qolqeta qorqan.

Herbert Abbott iñiqmasinchismi carronpi jaulata apaq, hinan kinsa otaq tawa wallpakunata huñuspa chayta vendespa gasolinata rantiq. Paymi willakun: “Mayninpiqa mana qolqeyoqmi qhepakuq kayku, ichaqa manan chaywanqa pisi kallpayarqaykuchu. Carroyku gasolinayoq kaqtinqa Jehová Diospi confiaspan predicashallarqayku”, nispa.

Chay tiempopi cristianokunaqa Jehová Diospi confiasqankuraykun atiparqanku sasachakuyninkuta. Huk kutinmi sinchita wayramusqanrayku Maxwell, Emmy Lewis iñiqmasikunaq carronta huk sach’a urmaspa iskayman parterapurqan. Maxwell willakun: “Chayqa manan pisi kallpayachiwarqankuchu llank’anaykuta saqenaykupaq. Askharaqmi ruwanayku kasharqan chaytan hunt’ayta munarqaykupas”, nispa. Llank’ayninkuta saqepunankumantaqa iñiqmasikunaq yanapayninwanmi carronkuta allicharqanku.

Kay tukukuy tiempopipas waranqanpi Testigokunan Jehová Diosta tukuy sonqowan servishanku. Ñawpa tiempopi precursorkuna hinan ñoqanchispas decidisqa kashanchis predicashanallanchispaq, Jehová Dios “amaña predicaychisñachu” niwananchiskama.