Gran Bretaña nacionmanta experienciakunata yachasqaykin kallpachasunki ama sayk’upunaykipaq. Kaypin yachallankitaq imaynatan ‘t’antaykita yaku [otaq mayu] pataman churaspa’, Diosta manaraq reqsiq runakunata yanapawaq chayta (Ecl. 11:1, Diosmanta Qhelqasqa).

Ñawpaqtaqa qan kikiykin kallpachakunayki ama sayk’upunaykipaq. Chaypaqqa iñiyniykipin qaqata sayanayki, Diosmanpas allinta k’askakunayki (Deut. 13:4). Chaytan Georgina iñiqmasipas ruwarqan. 1970 watapi Jehová Diospa testigonkunawan Bibliata estudiayta qallarishaqtinmi, Kyriacos sutiyoq qosan sinchita phiñakurqan. Imaymanatan ruwarqan Biblia estudiayta esposan saqepunanpaq, manan Testigokunata wasinman haykuchiqchu, qelqakuna chaskikusqantapas lliwtan wikch’upurqan.

Ichaqa astawanmi phiñakurqan Georgina huñunakuykunaman riyta qallariqtin. Huk kutinmi Huñunakuna Wasita rirqan ch’aqwa hatarichiq. Chaypin huk iñiqmasi repararurqan inglés simi rimananmantaqa griego simita aswan allinta rimasqanta, hinan griego rimaq iñiqmasita telefonopi waqyarurqan paywan rimananpaq. Chay iñiqmasi chayaramuspataq sumaqta rimapayarqan, hinan Kyriacos runaqa anchata admirakurqan chaywan, Bibliatapas estudiayta qallarirqan. Ichaqa iskay kinsa killakunalla estudiaruspan saqepurqan.

Chaymantaqa yapamantan kinsa wata hark’akurqan esposan Biblia estudiananta. Nirqanmi: “Bautizakunki chayqa saqerparisqaykin”, nispa. Chaymi Georginaqa bautizakunan p’unchay Diosta valekurqan qosan ama saqenanpaq. Iñiqmasikunan wasinta rirqanku Georginata hatun huñunakuyman apanankupaq, chaypin Kyriacos nirqan: “Qankuna ñawpariychis, ñoqaña esposaywan qhepaykichista hamusaqku”, nispa. Chaymi payqa tutamantan huñunakuypi qhepakurqan, ¡rikurqantaqmi esposanpa bautizakusqanta!

Chay p’unchaymantapachan Kyriacospa sonqon llanp’uyapurqan kawsaynintapas cambiapurqan, qhepamantaq bautizakapurqan. ¿Hayk’a watan pasasqa Testigokunawan esposan chayllaraq tupasqanmantapacha? ¡Yaqa tawa chunka watan! Kyriacos nin: “Maytan kusikuni esposay iñiyninpi qaqata sayasqanmanta”, nispa. Georginan nillantaq: “Qosayña hark’akuwarqan chaypas, ñoqaqa decidesqan kasharqani Diosmanta manapuni hayk’aqpas t’aqakunaypaq. Diosmantan sapa kutilla mañakuq kani, sonqoypitaqmi niq kani: ‘Hayk’aqllapas qosayqa iñipunmanmi Diospi’, nispa”, nispa.

¿Iman yanapallasunkimantaq qosaykita yanapanaykipaq? Mosoq runa kaywan p’achakuymi. Apóstol Pedron esposakunata nirqan: “Qosaykichista kasuychis. Ahinapin Diospa siminpi mana iñiq mayqen qosapas mana rimapayasqalla iñinqa warminpa allin purisqanta, ch’uya kawsasqanta manchakuyniyoq kasqanta [rikuspa]”, nispa (1 Ped. 3:1). Chaytan Christine iñiqmasi ruwarqan, ichaqa unaymantañan qosan bautizakapurqan. Payqa iskay chunka wata ñawpaqtan bautizakurqan, qosanmi ichaqa mana Diospi iñirqanchu. Chaywanpas repararqanmi esposanpa iñisqan allinpuni kasqanta. Chaymi John nin: “Kusisqatan rikuq kani, allin kallpatan hap’irqan, chaymi ñoqatapas yanapawaq sasachakuykunapi rikukuqtiy”, nispa.

Christine iñiqmasiqa manan hayk’aqpas qosanta mat’ipayaqchu Diospi iñinanpaq. Qosanmi nin: “Payqa repararqanmi Diospi iñinaypaq mat’ipayawaqtinqa astawan chhuchupakunayta. Chaymi pacienciawan pisi-pisimanta yanapawaq”, nispa. Christineqa Qhawaq otaq ¡Rikch’ariy! revistakunapi qosanpa yachay munasqan temakuna cienciamanta otaq kawsaymanta lloqsimuqtinmi niq: “Yachay munasqayki temakunan lloqsirqamun”, nispa.

Jubilakusqan qhepamanmi Johnqa huertan cuidayman dedicakurqan. Chaymi kawsasqanpi yuyaymanaspa tapukuyta qallarirqan: “¿Qonqayllachu runakuna paqarimurqan icha imapaqchu kamasqa karqanchis?” nispa. Huk kutinmi huk iñiqmasi parlapayarqan hinaspa Bibliamanta estudiota munachirqan. John nin: “Ñataq Dios kasqanpi iñisharqaniña chayqa, ‘estudiasunyá’ nirqani”, nispa.

Christineqa manan hayk’aqpas sayk’urqanchu qosanta yanapaspa. Payqa 20 watan Diosmanta mañakurqan qosan iñiq kapunanpaq, hinan rikurqan qosanpa bautizakusqanta. Kunanqa iskayninkun kusisqa Jehová Diosta servishanku. Johnmi nin: “Iskay ruwaykunan yanapawarqan Diospi iñipunaypaq. Ñawpaqtaqa Testigokuna munakuywan sumaqta rimapayawasqankun, chaymantataq Jehová Diospa testigonwan casarasqa kasqay, payqa munakuq, confianapaq hina, allin warmin”, nispa. Christineqa  1 Pedro 3:1 textopi nisqantan kasukurqan, rikurqantaqmi Diosta kasukuy allinpuni kasqanta.

Mayninqa wakin estudiachisqanchis runakunan Biblia estudiayta saqepunku. Chaymantan Salomón nirqan: “Tutamanta muhuykita tarpuy, ch’isinkamapas llank’ashallaypuni, manan yachankichu mayqenchus aswan allin kananta, ñawpaq tarpusqachus icha qhepakaqchus, icha iskayninchus allinkama kananta”, nispa (Ecl. 11:6). Wakin estudiantekunaqa unaymantañan Jehová Diosman asuykuyta allinpaq qhawarinku, iñiyninkupipas wiñanku (Sant. 4:8). Yaqapaschá estudiachisqayki runawanpas chay sucedenqa.

Chaymi sucederqan Alicewan. Payqa India nacionmantan Inglaterra nacionman ripurqan, 1974 watapitaq Bibliata estudiayta qallarirqan. Payqa hindi simitan rimarqan ichaqa inglés simitan allinta rimayta munarqan. Unaytan Bibliata estudiarqan, inglés simipi huñunakuykunamantaq mayninpi riq. Allinpaqña qhawarirqan Bibliamanta yachasqanta chaypas, hawa sonqollan estudiaq. Payqa qolqe maskhaypi fiestakuman riypin astawan afanakurqan, chaymi qhepaman estudionta saqepurqan.

Aliceqa yaqa 30 wata qhepamanmi estudiachiqnin Stella iñiqmasiman carta apachisqanpi kayta nirqan: “1974 watapi estudiachisqaykin kashani, maytachá kusikunki kay watapi kaq kinsa p’unchay huñunakuypi bautizakusqaymanta yachaspa. Qanmi yanapawarqanki kawsayniypi. Diospa simintan sonqoypi tarpurqanki, manaña chay tiempopi sonqoypi wiñarqanchu chaypas, manan hayk’aqpas qonqarqanichu yachachiwasqaykita”, nispa.

¿Imaynapin Bibliata yapamanta estudiarqan? 1997 watapi qosan wañupuqtinsi sinchi llakikuypi tarikusqa. Chaysi Diosmanta mañakuqtin 10 minuto pasasqallanman panjabí simita rimaq iskay Testigokuna wasinman chayasqaku, hinaspa Khuyakusqanchis wañuqkunapaq ¿ima suyakuymi kan? nisqa tratadota saqesqaku. Mañakusqanman Diospa kutichisqanta rikuspas Jehová Diospa testigonkunata maskhayta qallarisqa. Chaypaqqa panjabí simipi iñiq t’aqata maskhananpaq Stellaq saqesqan direcciontas maskhaspa tarirusqa. Chay huñunakuyman riqtintaq iñiqmasikuna sumaqta chaskisqaku. Pay nin: “Sumaqta chaskiwasqankun yanapawarqan llakikuyniy pisiyapunanpaq”, nispa.

Chaymantapachan Aliceqa llapa huñunakuykunaman rirqan, yapamantataq Bibliata estudiayta qallarirqan, 2003 watapitaq bautizakurqan. Payqa panjabí simitan allinta yacharurqan. Stellaman carta apachisqan tukuyninpin nin: “Anchatan agradecikuyki 29 wata ñawpaqta Diospa siminta sonqoypi tarpusqaykimanta, ñoqapaq allin ejemplo kasqaykimantapas”, nispa.

“Anchatan agradecikuyki 29 wata ñawpaqta Diospa siminta sonqoypi tarpusqaykimanta ñoqapaq allin ejemplo kasqaykimantapas.” (Alice)

¿Imatan chay experienciakunamanta yachanchis? Wakin estudiantekunaqa manan yuyaykusqanchis tiempopichu iñiyninkupi wiñanku. Chaywanpas sichus huch’uyyaykukuq sonqoyoq kanqaku, Diosmantapas yachayta munanqaku chayqa, Jehová Diosmi sonqonkupi tarpusqanchista wiñachinqa. Huk rikch’anachiypin Jesús nirqan: ‘Muhuqa lloqsimuspan wiñan, imaynachus wiñasqantaqa manan t’akaqqa yachanchu. Hallp’aqa kikillanmantan ruruchin: ñawpaqta q’achuta, chaymantataq espigata, hinamantañataq espigapi trigota hunt’achin’, nispa (Mar. 4:27, 28). Runakunaq sonqonpi tarpusqanchis muhuqa “kikillanmantan” pisi-pisimanta wiñan, manataqmi mayqenninchispas yachasunmanchu imaynapi wiñasqanta. Chaymi mana mich’akuspa Diospa siminta tarpushanallanchis, chayta ruwasun chayqa yaqapaschá qhepaman askhanpi cosechasun.

Hinaspapas kayta yuyariy: Diosmanta mañakuyqa atiyniyoqmi. Georgina, Christine iñiqmasikunapas mañakushallarqankun. Sichus qanpas ‘Diosmanta mañakushallankipuni’, manataq hukkunata yanapaspa sayk’upunkichu chayqa, yaqapaschá mayuwan apachisqayki ‘t’antata’ ‘[askha] p’unchaymanta tarikapullanki’ (Rom. 12:12; Ecl. 11:1).