Qallariy siglopi kay tiempopipas espirituwan pusachikuqkuna

‘Tukuy chaykunataqa kikin santo espiritullan ruwan.’ (1 COR. 12:11.)

1. ¿Imakunatan kay estudiopi t’aqwirisun?

PENTECOSTÉS fiestaqa ancha kusikunapaq ocasiontan yuyarichiwanchis, ¡chay pachan Jehová santo espiritunta serviqninkunaman qorqan! (Hech. 2:1-4.) Ahinapin chay tiempomantapacha Diosqa hukniraymanta runakunata espiritunwan pusarqan. Ñawpaq estudiopin qhawarirqanchis Diosqa espiritunwan hunt’aq sonqo runakunata yanapasqanmanta, paykunan sasa llank’aykunata aparirqanku. Qallariy siglopin ichaqa espíritu hukniraymanta runakunata yanaparqan. ¿Imaynata? ¿Imaynapin Diospa kallpan kay tiempopi allinninchispaq kanman? Qhawarisun.

‘Diospa warmi kamachin’

2. ¿Imaynapin María rikusqa espirituq ruwasqanta?

² Prometesqa espiritunta Dios runakunaman altos wasipi qoqtinmi Mariapas hunt’aq  runakunawan kuska chaypi kasharqan (Hech. 1:13, 14). Chay tiempopaqmi Mariaqa rikusqaña Diospa kallpan imaymana ruwasqanta. 30 wata más ñawpaqtan, doncella kashallasparaq santo espirituq atiyninwan Diospa Churinta wiksallikusqa (Mat. 1:20).

3, 4. ¿Imaynatan pay kikinta María qhawarikurqan, imaynatan ejemplonta qatikusunman?

³ ¿Imaraykun María chhayna sumaq qhawarisqa karqan? Chaytan yachanchis Diospa nisqanman hina ima ruwananta ángel willaqtin kutichisqanpi, nirqanmi: “Señorpa warmi kamachinmi kani; nisqaykiman hina ñoqapi ruwasqa kachun”, nispa (Luc. 1:38). Chhayna kutichisqanwanmi rikuchirqan sumaq sonqoyoq kasqanta, chayraykun tukuy sonqo Diospa munayninta ruwarqan. Manan onqoq rikhurisqanta wasimasinkuna imayna qhawarinankumantachu tapurqan, nitaq parlaqmasinwan sasachakuypi tarikunanmantachu. Pay kikinmantan huch’uyyaykukuspa rimarqan, chhaynapin rikuchirqan Jehová Taytanpi confiasqanta.

⁴ Mayninpin ñoqanchispas Dios serviyninchispi ima llank’aytapas sasa hunt’anapaq qhawarisunman, otaq sasachakuypi tarikusunman. Chhaynapi tarikuspaqa, tapukunanchismi: “¿Tukuy sonqochu Diospi confiani yanapayninwanqa imapas munasqanman hina lloqsinanpi? ¿Rikuchinichu tukuy imapas mañawasqanta hunt’anaypaq listo kashasqayta?” Manan iskayanchischu: sichus tukuy sonqo Diospi confiasun, Kamachiqninchista hina qhawarisun, munaynintapas ruwasun chayqa santo espirituntan qowasun (Hech. 5:32).

Pedro espirituq yanapayninta chaskin

5. ¿Imaynatan Pedro Pentecostés ñawpaqta santo espirituq yanapayninta chaskirqan?

⁵ María hinan apóstol Pedropas 33 watapi Pentecostés ñawpaqta santo espirituq yanapayninta chaskirqan. Jesusmi paymanpas qatikuqninkunamanpas supaykunata qarqonankupaq atiyta qosqa (Mar. 3:14-16). Bibliaqa manaña llapantachu willan chaypas, reparanchismi Pedro chay atiyta utilizasqanta. Diospa atiyninmi rikukullarqantaq chay apóstol Jesusta kasukuspa Galilea qochapi unu patanta payman risqanpi (leey Mateo 14:25-29). Pedroqa espirituq yanapayninwanmi chaykuna ruwayta atirqan. Diospa kallpanmi ichaqa Pedrota huk serviqninkunatapas hukniraymanta yanapananpaq kasharqan.

6. ¿Imakunatan Pedro ruwarqan espirituq yanapayninwan?

⁶ Pentecostés fiesta aparikushaqtinmi santo espíritu Pedroman huk discipulokunamanwan atiyta qorqan huk simikunapi rimanankupaq, chhaynapi Jerusalenman chayamuq wak llaqtayoq runakunaman predicanankupaq. Chay qhepamanmi chaypi huñunakuq runakunaman predicarqan (Hech. 2:14-36). Ñawpaqpin payqa mayninpi mana allinta yuyaykuspa ruwaq, manchapakuq runa karqan, ichaqa amenazaqtinkupas qatiykachashaqtinkupas kallpatan chaskirqan predicashanallanpaq (Hech. 4:18-20, 31). Chaymantapas, espiritun willarqan mana yachasqanta (Hech. 5:8, 9). Qollarqantaqmi atiyta huk wañusqata kawsarichinanpaq (Hech. 9:40).

7. ¿Ima yachachikuykunatan Pedro allinta entienderqan espirituwan akllasqa kaspa?

⁷ Manaraq Pentecostés fiesta aparikushaqtinqa Pedroqa entiendesqañan Jesuspa wakin yachachikuyninkunata (Mat. 16:16, 17; Juan 6:68). Ichaqa wakintan mana allintachu entiendesqa. Ejemplopaq, kinsa p’unchaymanta Cristo kawsarimpunanta, hanaq pachamanta kamachikamunantapas (Juan 20:6-10; Hech. 1:6). Chaymantapas, imaynapi huk runa espirituman tukuspa hanaq pacha gobiernopi yanapaytan mana entienderqanchu. ¿Hayk’aqmi chaykunata entienderqan? Santo espirituwan bautizasqa kaspa, hanaq pachaman rinanpaq suyakuyta chaskispañan.

8. ¿Imatan yachanku akllasqa cristianokunapas ‘wak ovejakunapas’?

 ⁸ Jesuspa discipulonkunaqa astawanmi imaymanata entienderqanku santo espirituta chaskiqtinku. Diospa yuyaychasqanmi Mosoq Rimanakuy Qelqakunata qelqarqanku, chaypin willarqanku Diospa munaynin imayna hunt’akusqanta (Efe. 3:8-11, 18). ¡Ancha allinninchispaqmi chay ruwasqankuqa! Kay tiempopiqa akllasqakunapas ‘wak ovejakunapas’ chaykunawanmi espiritualpi alimentakunchis (Juan 10:16). ¿Valoranchischu espirituq yanapayninwan Diospa Siminta astawan entiendesqanchista?

Pablo espirituwan hunt’aykusqa karqan

9. ¿Imatan Pablo ruwarqan santo espirituq yanapayninwan?

⁹ Pentecostés qhepaman huk wata hina pasaqtinmi Saulo sutiyoq runa santo espirituta chaskirqan, paytan qhepaman reqsikurqan apóstol Pablo nispa. Imaymanapin paytaqa espíritu yanaparqan, chaykunamanta wakinqa kay tiempopipas allinninchispaqmi. Ejemplopaq, yuyaycharqanmi chunka tawayoq librokunata qelqananpaq. Pedrota hinataq yanaparqan mana wañuq espiritual cuerpota chaskispa hanaq pachapaq kawsaripuymanta, hinallataq chaymanta sut’ita qelqananpaq. Hinaspapas, onqosqakunatan hampirqan, supaykunata qarqorqan wañusqakunatapas kawsarichirqan. Chaymantapas, espiritun atiyta qorqan aswan importante llank’ayta aparinanpaq. Kay tiempopipas Diosmi kallpachawashanchis chay llank’ayta hunt’ananchispaq, manaña milagropi hinachu chaypas.

10. ¿Imaynatan Pablota espíritu yanaparqan rimananpaq?

¹⁰ Chipre islapi kashaspan Pabloqa espirituwan hunt’a kaspa layqaq runata sut’ita nirqan mana allin ruwasqanta. Chay rimasqantan islapi kamachikuq allinta uyarirqan. “Señormanta Pabloq yachachisqanmanta” uyarispan anchata admirakurqan, hinan iñiq kapurqan (Hech. 13:8-12). Pabloqa yacharqanmi predicayta aparinapaqqa santo espirituta necesitakusqanta (Mat. 10:20). Chayraykun Éfeso cristianokunata nirqan: “Ñoqapaqpas mañapuwaychis, Diosninchispa qelqanmanta rimariqtiy yanapawananpaq”, nispa (Efe. 6:18-20).

11. ¿Imaynatan Pablota espíritu pusarirqan?

¹¹ Santo espirituqa yanaparqanmi wakin llaqtakunapi rimananpaq, huk kutikunapin ichaqa hark’arqan. Chaymantapas, pusarirqanmi misionero llank’ayninpi (Hech. 13:2; leey Hechos 16:6-10). Kay tiempopipas Jehová Diosqa utilizashallanmi espiritunta predicación aparikunanpaq. Ñoqanchispas Pablo hinan kallpachakushanchis valorwan tukuy sonqo predicananchispaq. Kunanqa manan apostolkunaq tiemponpi hinachu santo espíritu sut’ita reparanapaq hina pusariwashanchis, ichaqa manan iskayanchischu kunanpas allin sonqoyoq runakunaman pusawasqanchismanta (Juan 6:44).

“Imaymanan ruwaykunaqa kan”

12-14. ¿Kaqllatachu Diospa espiritun ruwan llapa serviqninkunapi? Explicay.

¹² Diosman kawsayninchista qopuqkunaqa,  kallpatan hap’inchis qallariy siglopi akllasqa cristianokunata Dios bendecisqanta yuyarispa. Corinto cristianokunaman carta apachisqanpin Pablo espirituq qokuyninkunamanta nirqan: ‘Imaymana atiy qokuykunan kan, ichaqa kikin espiritullan chaykunata qoqqa. Imaymanapin servisunman, chaywanpas huk kikin Señorllatan servinchis. Imaymanan ruwaykunaqa kan, chaywanpas kikin Diosllan llapanchispi tukuy imaymanata ruwan’, nispa (1 Cor. 12:4-6, 11). Rikusqanchis hina, ima llank’aytapas aparikunan kaqtinqa, espirituqa manan kaqllatachu ruwan sapanka Dios serviqkunapi. (Luc. 12:32; Juan 10:16). Yanapanmi ‘pisi t’aqa ovejakunata’ ‘wak ovejakunatapas’ (Luc. 12:32; Juan 10:16). Ichaqa manan kaqllatachu iñiq t’aqapi kaq llapa iñiqmasikunapi ruwan.

¹³ Ejemplopaq, umallikunaqa santo espirituwanmi nombrasqa kanku (Hech. 20:28). Ichaqa manan llapa espirituwan akllasqa cristianokunachu iñiq t’aqapi umalli kanku. Chaypin yachanchis espirituqa mana kaqllatapunichu llapa iñiqmasikunapi ruwasqanta.

¹⁴ Jehová Taytanchisqa “Diospa wawankuna nisqa kaytan” paykunapi churan, otaq wawankuna kasqankuta yachanankupaq reparachin. Chaytaqa espiritunwanmi ruwan, chay espirituwanmi Churin Jesusta kawsarichirqan, hinaspa hanaq pachapi wiñay kawsayta qorqan (leey Romanos 8:11, 15). Diosqa chay espiritutan utilizallarqantaq tukuy imaymanata kamananpaq (Gén. 1:1-3). Chaymantapas, Bezaleelta yanaparqan yupaychana karpa ruwayta, Sansonta yanaparqan runaq mana ruway atisqanta ruwananpaq, Pedrotapas unu patanta purinanpaq. Ichaqa kaytan reparana: Diospa espiritun huk runata pusarisqanqa manan kaqllachu hanaq pachaman rinanpaq akllasqanwanqa. Cristianokunata akllayqa espirituq huk hinata ruwasqallanmi, pichus akllasqa kanantataq Dios decidin.

15. ¿Wiñaypaqchu Dios espirituwan bautizasqa kayta aparinqa?

¹⁵ Rikusqanchis hina, unay tiempomantañan kay Hallp’api Dios serviqkuna karqan, imaymanapitaq santo espirituq yanapayninta chaskirqanku. Espirituwan bautizasqa kaspa akllasqa cristiano kayqa 33 wata Pentecostés fiestamantapachan qallarirqan, chayamunqataqmi tiempo tukukapunanpaq. Chaywanpas Diosqa yanapashallanqan serviqninkunata, paykunaman kallpanta qospa, chhaynapi wiñaypaq munayninta ruwanankupaq.

16. ¿Imatan cristianokuna aparishanku santo espirituq yanapayninwan?

¹⁶ ¿Imatan Jehová serviqkuna aparishanku santo espirituq yanapayninwan? Apocalipsis 22:17 kutichin: ‘Santo espirituwan Corderoq esposanwanmi ninku: ¡Hamuy! nispa. Pipas uyariqqa nichun: ¡Hamuy! nispa. Pipas ch’akichikuqqa hamuchun, kawsay unuta ukyay munaqqa mana qolqellawan ukyachun’, nispa. Espirituq kallpachasqanmi cristianokunaqa lliw ‘munaq’ runakunata invitashanku Diospa qosqan kawsay unuta ukyanankupaq. Akllasqa cristianokunan chay llank’ayta umallishanku, wak ovejakunataq yanapashanku. Espirituq pusarisqanmi huk nisqalla llank’anku. Imaña suyakuyninku chaypas, Diosmanmi qokurqanku ‘Yayaq, Churiq, santo espirituq sutinpi [...] bautizakuspa’ (Mat. 28:19). Llapankun kawsayninkupi espirituwan pusachikunku (Gál. 5:22, 23). Iskaynin t’aqa cristianokunapas ch’uyata kawsanankupaq kallpachakusqankupin yanapachikunku (2 Cor. 7:1; Apo. 7:9, 14).

Mañakushallasun santo espirituta

17. ¿‘Imaynatan rikuchinchis Diospa espiritun ñoqanchispi kasqanta’?

¹⁷ Hanaq pachapaqña otaq kay pachapaqña suyakuyninchis chaypas, Diosmi ‘hatun atiyta’ qowasun hunt’aq sonqowan Diosta servispa premioman aypanapaq (2 Cor. 4:7). Mayninpin runakuna asipayawanchis  mana pisipaspa Diospa Gobiernomanta willasqanchisrayku. Chayrayku, yuyarisunpuni ‘Cristorayku k’amisqa kasqanchista’. Ichaqa sichus predicashallasun chayqa, rikuchisunmi ‘Diospa atiyniyoq espiritun [ñoqanchisman] uraykamusqanta’ (1 Ped. 4:14).

18, 19. ¿Ima yanapaytan Dios qowasun santo espiritunwan, imata ruwanapaqmi decidisqa kashanchis?

¹⁸ Sonqomanta mañakuspaqa santo espiritutan chaskisun, chaytaq imapas yachasqanchista astawan yapanqa, hinallataq Diosta tukuy sonqo serviy munasqanchistapas. Biblian nin: “[Diosmi] allin munayninman hina allinkaq ruwayta munachisunkichis hinaspa ruwachisunkichis”, nispa. Tukuy tiempon kallpachakunanchis ‘manchakuywan khatatataywan, qespichisqa kananchispaq’. ¿Imaynatan chay ruwayta atisunman? Santo espirituwan yanapachikuspa, hinallataq “Diospa kawsachiq siminta” estudianapaq kallpachakuspa (Fili. 2:12, 13, 16).

¹⁹ Tukuy sonqo Diospa espiritunpi confiasun chayqa, tukuy sonqowanmi espiritual ruwayninchiskunata hunt’asun. Kallpachakusunmi sapa kuti aswan allinta ruwanapaq, Diospa yanapaynintataq maskhasun (Sant. 1:5). Paymi yanapawasun Simin Qelqata entiendenapaq, sasachakuykunata atipanapaq allin willakuykunata predicanapaqpas. Diosmanta santo espiritunta mañakuspaqa kaytan yuyarina: “Mañakuychis qosunkichismi, maskhaychis tarinkichismi, waqyakuychis kicharimusunkichismi” (Luc. 11:9, 13). Chhaynaqa, Diosmanta mañakushallasun ñawpaqpi hina kay tiempopipas espiritunwan pusawashanallanchispaq.

¿Kutichiwaqchu?

• ¿Bendicionkunata chaskinapaq imatan Mariamanta yachananchis?

• ¿Imaynatan santo espíritu Pablota pusarirqan?

• ¿Imaynatan espíritu kay tiempopi pusariwanchis?

[Tapuykuna]

[24 paginapi dibujo]

Santo espirituq yanapayninwanmi Pablo millay espiritukunata qarqorqan

[26 paginapi foto]

Diosqa llapanchismanmi santo espiritunta qowanchis, ima suyakuyniyoqña kanchis chaypas