Kusisqalla iñiqmasikunawan kasun

SAPA kutillanmi aswan sasa kusisqa kawsay. Askha runakunan sasapaq qhawarinku hukkunawan sumaqta kawsayta. Kay tiempopin astawanqa hatun llaqtakunapi runakuna paykunallapaq kawsanku.

Psicobiología nisqamanta yachachiq Alberto Oliverio nin: “Hukkunamanta t’aqakuspa kawsayqa mast’arisqan kashan [...]. Hatun llaqtakunapiqa kanpunin chhayna kawsay, chaymi oficinapi llank’aqmasikunaq, wasimasikunaq, tiendapi atiendeqkunaq imayna kawsasqankuta mana yachakunchu”, nispa. Chhaynata kawsaspan askha runa sinchi llakipi tarikunku.

Ichaqa ancha allinpunin cristianokunaq imayna kawsasqanchis kusisqa kasqanchispas. Pablo nirqan: “Kusisqallapuni kaychis”, nispa (1 Tes. 5:16). Cristianokunapaqqa askha razonkunan kan chhaynata kawsanapaq  iñiqmasinchiskunawan kusisqallapuni kawsanapaqpas. Tukuy atiyniyoq Jehová Diostan yupaychanchis, entiendenchismi Bibliapi cheqaq yachachikuykunata, Diospa phiñakuyninpi salvasqa kaspa wiñay kawsay suyakuyniyoqmi kanchis, anchatataqmi kusichiwanchis chay bendicionkunata runakuna chaskinankupaq yanapayqa (Sal. 106:4, 5; Jer. 15:16; Rom. 12:12).

Cheqaq cristianokunaqa reqsisqan kanchis kusisqa kasqanchismanta hukkunawanpas sumaqta kawsasqanchismanta. Pablo Filipos cristianokunaman nirqan: “Chay hina kaqtinqa kusikuspan llapaykichiswan q’ochukusaq. Chay hinallataq qankunapas kusikuychis, ñoqawan kuskataq q’ochukuychispas”, nispa (Fili. 2:17, 18). Chay textollapin iskay kutita rimashan iñiqmasinchiskunawan kusisqa kaymanta, kuska q’ochukuymantawan.

Ichaqa manan hukkunamanta karunchakuspa sapallanchis kawsanachu, chayta ruwaspaqa manan cristianomasinchiskunawan kusirikusunmanchu. Pablo niwanchis: “Señorwan hukllachasqa kaspa q’ochukuychis”, nispa (Fili. 3:1). ¿Imaynatan iñiqmasinchiskunawan chayta hunt’asunman?

Iñiqmasinchiskunawan kusikusun

Filipos cristianokunaman Pablo cartata qelqaspaqa, yaqapaschá predicasqanrayku Roma llaqtapi carcelpi kasharqan (Fili. 1:7; 4:22). Ichaqa manan chayraykuchu predicayninpi pisikallpayarqan, aswanpas kusikurqanmi tukuy atisqanpi Jehová Diosta servispa, ‘vino hich’ana ofrendata hina’ kawsayninta Diosman qospa (Fili. 2:17). Pabloq imayna sientekusqanwanmi yachanchis kusisqa kayqa mana imaynapi tarikusqanchismantachu kasqanta, payqa carcelpiña kashaspapas nirqanmi: “Astawanraqmi kusikusaqpas”, nispa (Fili. 1:18).

Filipos llaqtapi iñiq t’aqataqa Pablon qallarichirqan, chaymi paykunata anchata munakurqan. Yacharqanmi Diosta servispa kusisqa kasqanta paykunaman willaspaqa iñiqmasinkuna kallpachananta. Chaymi qelqarqan: “Wawqe-panaykuna, yachanaykichistan munani, tukuy imaymana sucedewasqanqa allin willakuykunatan astawan wiñarichin. Chay hinapin Cristorayku preso kasqayta Roma reypa wasinpi kaq soldadokunapas wakin runakunapas yachankuña”, nispa (Fili. 1:12, 13). Imayna tarikusqanmanta willaspaqa munarqanmi Filipos cristianokunapas pay hina kusisqa kanankuta. Paykunaqa kusikurqankuchá Pablomanta yachaspa, ichaqa kallpachakunankun karqan carcelpi kashasqanmanta ama sinchita llakikuspa ejemplonta qatikunankupaq (Fili. 1:14; 3:17). Chaykamaqa payrayku Diosmanta mañakunanku karqan, atisqankuman  hinataq yanapaykunata apachinanku karqan (Fili. 1:19; 4:14-16).

¿Pablo hinachu mana pisikallpayaspa kusisqalla kanchis? ¿Pay hinachu allin kaqta qhawarinchis kawsayninchispi predicacionninchispipas? Iñiqmasinchiskunawan kaspaqa allinmi kanman predicacionninchispi ima allinpas kasqanmanta willay. Manan ancha allin experienciakunaraqchu kanan. Yaqapaschá willasunman uyariwananchispaq hina predicay qallarisqanchismanta, imayna yuyaymanachisqanchismanta, huk textomanta allinta parlarisqanchismanta otaq predicashaqtinchis runakuna Jehová Diospa testigonta hina qhawarimuwasqanchismanta. Sapa kuti iñiqmasinchiskunawan chaykunamanta rimaspaqa kuskan kusikusunchis.

Diospa askha siervonkunan imaymana sacrificiokunata ruwanku predicaq lloqsinankupaq. Precursorkuna, watukuq umallikuna, betelitakuna, siervos internacionales, misionerokuna iman tukuy atisqankuta ruwanku Diosta kusisqa servinankupaq. ¿Kusikunchischu chay ‘llank’aqmasinchiskunawan’? (Col. 4:11.) Chhayna kaqtinqa, rikuchisunmanmi chhayna llank’asqankumanta agradecekusqanchista. Paykunatan sumaqta kallpachasunman huñunakuykunapi, asambleakunapi ima. Yaqapaschá ‘atikuqtinqa’ mikhunata invitasunman, chaypin kallpachawananchispaq experienciakunata willariwasunman, chhaynapi ñoqanchispas tukuy sonqowan Diosta servinapaq (Fili. 4:10).

Sasachakuypi kaqkunawan kusikusun

Pabloqa aguantarqanmi qatiykachasqa kayta huk sasachakuykunatapas, chaykunan yanaparqan astawan hunt’aq sonqo Diospaq kananpaq (Col. 1:24; Sant. 1:2, 3). Chaymantapas, kusikurqanmi mana pisipaspa allin ejemplonwan Filipos iñiqmasinkunata yanapaspa, paykunapas qhepamanqa chhayna sasachakuykunapin tarikunanku karqan. Kusikuyninmanta willananpaqmi paykunaman qelqarqan: “Cristoraykun qankunaqa samiyoq kankichis, manan iñinallaykichispaqchu, aswanpas payrayku ñak’arinaykichispaqwanmi. Qankunaqa rikurqankichismi muchusqayta, qankunapas chay hinallatataqmi muchushankichisña, uyarishallankichistaqmi muchushasqaytapas”, nispa (Fili. 1:29, 30).

Kunanpas askha cristianokunan predicasqankurayku qatiykachasqa otaq hark’asqa kashanku. Mayninpiqa maqasqan kanku otaq hukniray sasachakuykunapi tarikunku, yaqapaschá hermanonchiskunata iñiymanta t’aqakuq runakuna yanqamanta tumpanku, familianku mana allinta tratanku otaq estudiaqmasinku llank’aqmasinkupas paykunamanta burlakunku. Jesusmi willarqan chaykunamanta ama admirakunapaq nitaq pisikallpayanapaq, aswanpas chaykuna hawa kusikunanchis kasqanta, nirqanmi: “Kusisamiyoqmi kankichis, ñoqarayku k’amisuqtiykichispas qatiykachasuqtiykichispas, hinallataq tukuy mana allinkunata llullakuspa qankunamanta rimaqtinkupas. Kusikuychis q’ochukuychis, hanaq pachapi premioykichisqa hatunmi”, nispa (Mat. 5:11, 12).

Huk lado nacionkunapi munakusqanchis iñiqmasinchiskuna sinchi qatiykachasqa kasqankumanta informekuna chayamuwaqtinchisqa, manan sinchita llakikunanchischu, aswanpas kusisqan sientekunanchis iñiyninkupi mana pisipasqankumanta. Chaymantapas Diosmantan mañakunanchis aguantanankupaq ama pisikallpayanankupaqpas (Fili. 1:3, 4). Chay iñiqmasinchiskunapaqqa manan astawanqa ruwayta atisunmanchu, ichaqa iñiq t’aqanchispi kaq cristianokunatan yanapasunman pruebakunapi tarikuqtinku paykunapi interesakuspa. Chaymantapas familiantin Diosta yupaychasqanchismanmi invitasunman, ñoqanchiswan kuska predicanankupaq otaq huk rato kuska pasarinanchispaq.

Kaypi yachasqanchis hina, askha razonkunan kashan iñiqmasinchiskunawan kusisqa kawsananchispaq. Ama kay pachapi runakuna hinaqa hukkunamanta t’aqakuspa ñoqallanchispaq kawsasunchu, aswanpas iñiqmasinchiskunawan kuska kusikusun. Chayta ruwaspan munanakuspa huk nisqalla iñiq t’aqapi kawsasun, anchatataq kusikusun paykunawan kaspa (Fili. 2:1, 2). Amapuni qonqasunchu Pabloq nisqanta, paymi nirqan: “Señorwan hukllachasqa kaspa kusikullaychispuni. Huktawanmi niykichis: ¡Kusikullaychispuni!”, nispa (Fili. 4:4).

[6 paginapi kaq fotota horqorqan]

Globo terráqueo: cortesía de Replogle Globes