‘Santo espirituq [...] rurunqa’ Diostan hatunchan
‘Santo espirituq [...] rurunqa’ Diostan hatunchan
“Askhata rurusqaykichispin Yayayqa hatunchasqa.” (JUAN 15:8, MR.)
1, 2. a) ¿Imaynatan hukkunata kallpachasunman? b) ¿Ima regalotan chaskinchis Diosta aswan allinta servinapaq?
ALLIN iñiyniyoq cristianan huñunakusqan t’aqapi huk sipasta llakisqata rikuspa predicaq lloqsinankupaq invitan. Predicasqankuman hinan chay sipasqa llakikuyninta willakun, qhepamantaq Jehová Diosta anchata agradecekun chay iñiqmasin yanapasqanmanta. Casarasqa cristianokunan kusirikunapaq ruwasqanku huñunakuypi ancha kusisqallaña willanku huk nacionpi imayna predicamusqankumanta. Chaypin huk wayna makilla uyarishan. Watakuna pasasqan qhepamanmi chay waynaqa huk llaqtakunata predicaq rinanpaq preparakuspa chayta yuyarin, paytaqa chaypi uyarisqanmi kallpacharqan misionero kananpaq.
2 Yaqapaschá ñoqanchispas huk cristianoq yanapayninwan kawsayninchista cambiarqanchis otaq ñoqanchis hukkunata yanaparqanchis. Manaña rimapayasqanchis kawsayninta cambianmanchu chaypas, sapa kutillanmi iñiqmasinchiskuna necesitanku kallpachanata. Ichaqa, ¿imatan necesitanchis iñiqmasikunata aswan allinta yanapanapaq Diosta aswan allinta servinapaqpas? Diospa yanapaynintan, chay yanapaytan qowanchis santo espiritunwan (Luc. 11:13). Diospa santo espiritun ñoqanchispi kaqtinqa, aswan sumaq cristianomanmi tukupunchis paypa munasqanman hinataqmi tukuytapas ruwanchis. ¡May sumaqmi chay regaloqa! (Leey Gálatas 5:22, 23.)
3. a) ¿Imaynapin santo espirituq ‘rurunta’ ñoqanchispi wiñachisqanchis Diosta hatunchan? b) ¿Ima tapukuykunatan kutichisun?
3 Diosmantan hamun santo espirituqa, chaymi yanapawanchis Diosman rikch’akuq kanapaq (Col. 3:9, 10). Ichaqa, ¿imaraykun kallpachakunanchis Diosman rikch’akuq kanapaq? Chaymanta rimaspan Jesús apostolninkunata nirqan: “Askhata rurusqaykichispin Yayayqa hatunchasqa”, nispa (Juan 15:8, MR). * Santo espirituq ‘rurunta’ ñoqanchispi wiñachisun chayqa, rimasqanchiswan ruwasqanchiswanmi Kamaqninchista hatunchasun (Mat. 5:16). ¿Imapin cristianokuna hukniray kanku kay pachapi runakunamanta? ¿Iman yanapawasun santo espirituq rurunta ñoqanchispi wiñachinapaq? ¿Imaraykun chayta ruway sasa kanman? Chaymantan kunan yachasun, chayman hinataq santo espirituq ruruchisqan munakuymanta, q’ochukuymanta, thak kaymantawan yachasun.
Santo espirituq rikhurichisqan munakuy
4. ¿Imayna munakuytan Jesús yachachirqan?
4 Santo espirituq rikhurichisqan munakuyqa manan kay pacha runakunaq munakuynin hinachu. ¿Imarayku? Diosmanta hamusqanrayku. Chaytan Jesús rikuchirqan Orqo Patapi yachachishaspa (leey Mateo 5:43-48). Chaypin willarqan mana chanin runakunapas munakuqninkutaqa munakusqankuta. Paykunaqa ninkun: “Munakuwanki chayqa ñoqapas munakusaykin”, nispa. Chayqa manan cheqaq munakuychu aswanpas ayni kutichiy hinallan. Cristianokunan ichaqa ‘hanaq pachapi kaq Yayanchispa wawankuna kasqanchista’ rikuchinanchis. Jehová Dios hinan runakunata rikunanchis munakunanchispas, manataqmi pimanpas kaqllawanqa kutichinanchischu, enemigonchiskunatapas munakunanchismi. ¿Atisunmanchu chhayna munakuyta?
5. ¿Imaynatan rikuchisunman cheqnikuwaqninchiskuna munakusqanchista?
5 Pablomanta Silasmantawan yuyarisun. Filipos llaqtapi predicashaqtinkun paykunata hap’ispa maqarqanku, carcelpi wisq’aspataq chakinkuta cepopi hap’iykachirqanku. Carceleropas millaytachá tratarqan. Terremoto kaqtin libre kapuspa manan nirqankuchu: “¡Kunan yachachun!” nispaqa. Chay runata munakuspa paypi interesakuspa iman usqhaylla yanaparqanku, chay qhepamantaq chay carcelero familiantin Diospi iñipurqanku (Hech. 16:19-34). Kay tiempopi cristianokunapas kay kamachikuytan kasukurqanku: “Qatiykachaqniykichiskunata saminchaychis” (Rom. 12:14).
6. ¿Imakunata ruwaspan rikuchisunman iñiqmasinchiskuna munakusqanchista? (Qhaway 21 paginapi recuadrota.)
6 Iñiqmasinchiskuna munakusqanchismi ichaqa aswan hatun, chaymi paykunarayku ‘wañuytapas mana manchakunchischu’ (leey 1 Juan 3:16-18). Ichaqa huk ruwaykunapipas rikuchisunmanmi munakusqanchista; yaqapaschá ruwayninchiswan rimayninchiswan phiñachinakusqanchista allichapuspa (Mat. 5:23, 24). Ichaqa, ¿ñoqanchista phiñachiwarqanchis chayri? ¿‘Huchanta pampachaykunapaq’ hinachu sonqonchis kashan, icha phiñasqallachu kashanchis? (Sal. 86:5.) Santo espíritu ñoqanchispi munakuyta wiñachisqanmi yanapawasun tukuy sonqowan hukkunata pampachanapaq ‘imaynan Cristo [“Jehová”, NM] pampachawarqankichis’ hinata (Col. 3:13, 14; 1 Ped. 4:8).
7, 8. a) ¿Imapin tupan Diosta munakuy runamasinchista munakuywan? b) ¿Iman yanapawasun Jehová Diosta astawan munakunapaq? (Qhaway kay paginapi fotokunata.)
7 ¿Iman yanapawasun iñiqmasinchiskunata sonqomanta munakunapaq? Hanaq pacha Taytanchisman astawan asuykuymi (Efe. 5:1, 2; 1 Juan 4:9-11, 20, 21). Chaypaqqa tiempota t’aqananchis sapanchispi paymanta mañakunapaq, Bibliata leenapaq, yuyaymananapaq ima. Chayta ruwasun chayqa astawanmi Diosta munakusun.
8 ¿Imatan ruwasunman mañakunapaq, Bibliata leenapaq, yuyaymananapaqpas p’unchaypi huk horalla kaqtin? Ancha chaninpaqchá chay horataqa qhawarisunman, manachá chay ratopiqa huk ruwaykunawan tiemponchista usuchisunmanchu. ¡Aswanchá mana chhaynachu! Manan pipas hark’awasunmanchu munasqanchis rato Jehová Diosman asuykunanchispaq yaqa llapanchispataqmi makinchispi Biblia kashan leenanchispaq. Ichaqa manan huk ruwaykunawan Diosninchispaq tiempo t’aqasqanchista suwachikunachu. ¿Sapa p’unchaychu tiemponchista t’aqashanchis Jehová Diosman astawan asuykunapaq?
‘Santo espirituq kusikuy qosqan’
9. ¿Imanisunmanmi santo espirituq kusikuy qosqanmanta?
9 Santo espirituq rurunqa manan chinkanchu, sasachakuykunapiña kashanchis chaypas ñoqanchispin kashan. Chayta entiendenapaq rimasun kusikuymanta. Kusikuyqa mana unuq kasqanpi mana wañuq planta hinan. Askha cristianokunan ñawpaq tiempopi ‘sinchita ñak’arishaspankupas Diospa siminta chaskirqanku santo espirituq kusikuy qosqanwan’ (1 Tes. 1:6). Kunanpunin askha cristianokuna hark’asqa kashanku otaq hatun sasachakuykunapi tarikushanku. Ichaqa Diosmi espiritunwan paykunata kallpachashan, ‘ahinapin takyasqa tukuy pacienciawan [otaq kusikuywan] lliw imatapas muchushanku’ (Col. 1:11). ¿Imaynapin chay kusikuyta chaskinchis?
10. ¿Imakunawanmi Jehová Dios kusichiwanchis?
10 Satanaspa qosqan “qhapaq kaykunaqa tukurqokuqllan”, Diospa qowasqanchis qhapaq kaykunan ichaqa wiñaypaq (1 Tim. 6:17; Mat. 6:19, 20). Qhepa tiempoman wiñay kawsayta prometewasqanchis, iñiqmasinchiskunawan teqsimuyuntinpi huk familia hinalla kawsasqanchis iman anchata kusichiwanchis, astawanqa Jehová Diospa amigon kasqanchis. Qatiykachasqa kashaspa Davidpa nisqanta hinan ñoqanchispas ninchis: “Munakuyniykiqa kawsaymantapas aswan chaniyoqraqmi, chaymi yupaychasqayki, kawsanaykamaqa saminchasqaykin”, nispa (Sal. 63:3, 4). Chaypi nisqan hina, sinchi sasachakuykunapiña tarikusunman chaypas sonqonchismi kusikuywan Diosta hatunchanqa.
11. ¿Imaraykun Jehová Diosta ancha kusisqa yupaychananchis?
11 Llapa cristianokunatan Pablo nin: “Señorwan hukllachasqa kaspa kusikullaychispuni. Huktawanmi niykichis: ¡Kusikullaychispuni!”, nispa (Fili. 4:4). ¿Imaraykun Jehová Diosta ancha kusisqa yupaychananchis? Chaywanmi rikuchinchis Jehová Dioslla kamachikuq kasqanta Satanaspa iskayachisqan yanqa kasqanta. Satanasqa llapa runakunamantan kay hinata nin: “Runakunaqa manan tukuy sonqomantachu Diosta kasukunku”, nispa (Job 1:9-11). Sichus kamachisqa hinalla Diosta servisunman manataq kusisqachu kasunman chayqa manan tukuy sonqomantachu servishasunman. Chaymi salmistaq nisqanta kasukunanchis, nirqanmi: “Señor Diosta kusisqa yupaychaychis, kusisqa takin-takin payman asuykuychis”, nispa (Sal. 100:2). Arí, Diosta servispaqa tukuy sonqowanmi llank’ananchis kusisqataqmi kananchis.
12, 13. ¿Imakunan yanapawasunman llakikuykuna ñit’iwaqtinchis?
12 Chaywanpas mayninqa imapas llakichiwasunpunin, pisikallpayasuntaqmi kanpas (Fili. 2:25-30). ¿Iman yanapawasun llakikuyninchiskunata atipanapaq? Efesios 5:18, 19 textopi nisqantan hap’ikunanchis, chaypin nin: “Santo Espirituwan hunt’a kaychis. Qankunapura kallpachanakuychis salmokunawan, yupaychana takikunawan, Santo Espirituq yuyaychasqan takikunawan. Señorman takispa payta tukuy sonqo yupaychaychis”, nispa. ¿Imaynatan chaypi nisqanwan yanapachikusunman?
13 Llakikuykuna ñit’iwaqtinchisqa Diosmantan mañakunanchis, allin kaqkunapi kusikunapaq kaqkunapitaqmi yuyaymanananchis (leey Filipenses 4:6-9). Wakinqa Diospaq takikunata uyarispa otaq takispan kallpachakunku allinkunapipas yuyaykunku. Huk cristianon sasachakuyninkuna ñit’iqtin sinchi llakisqa tarikuq. ¿Iman payta yanaparqan? Paymi nin: “Sapa kutinmi Diosmanta mañakuq kani, umallaymantan Diospaq takikunatapas yacharurqani. Chay takikunata sonqollaypi otaq kunkawan takisqaymi sonqoyta ‘thak’ niyachiq. Chay p’unchaykunallapin lloqsimurqan Acerquémonos a Jehová nisqa libro. Watapi iskay kutita leesqaymi sonqoypaq hampi hina karqan. Jehová Diosqa samincharqanmi tukuy kallpachakusqayta”, nispa.
Thak-kayqa hukllachawanchismi
14. ¿Imaynapin rikukun santo espíritu thak kawsaypi hukllachawasqanchista?
14 Askha nacionkunamanta iñiqmasinchiskunawan huñunakuykuna kasqanpin rikukun tukuy rikch’ayniyoq runakunawan huk hinalla kawsasqanchis. Chaymi rikuchin Diospa llaqtanpi huk familia hinalla thakpi kawsasqanchista. Runakunaqa anchatan admirakunku tukuy llaqtamanta runakuna, cheqninakuq llaqtakunamanta runakunapas ‘santo espirituq kallpachasqan huk sonqolla kasqankumanta, hukkuna-hukkunawan thak-kaypi kawsasqankumanta’ ima (Efe. 4:3). Askha cristianokunapaqqa sasan karqan cheqnisqanku runakunawan huk hinalla kawsay, chaymi chayqa ancha admirakunapaqpuni.
15, 16. a) ¿Imaraykun Pedropaq sasa karqan wak llaqtayoq runakunata allinpaq qhawariy? b) ¿Imaynatan Jehová Dios yanaparqan ñawpaq yuyaykusqanta saqenanpaq?
15 Sasan llapa nacionkunamanta runakunata hukllachayqa. Chhayna kasqanta yachanapaq yuyarisun apóstol Pedrota. ¿Imaynatan pay qhawariq mana judío runakunata? Nirqanmi: “Qankunaqa yachankichismi, judío runapaqqa manan chaninchu wak llaqtayoqkunawan rimananpas wasinman haykuykunanpas”, nispa. Chay qhepamanmi ichaqa nirqan: “Diosmi yachachiwan ama pitapas ‘millaymi, qhellin’ nispa qhawanaypaq”, nispa (Hech. 10:24-29; 11:1-3). Paytaqa llapa israelitakunata hinachá wawa kasqanmantapacha yachachirqanku llaqtamasinkunallata munakunanpaq. Llapa judiokuna hinataqchá wak llaqtayoq runakunata enemigota hina qhawarispa cheqnikurqan. *
16 Pedroqa manchapakuspachá Cornelioq wasinman haykurqan. ¿Atirqanchu Pedro ‘cuerpoq allin k’askanasqa kasqan’ hina, wak llaqtayoq runawan “thak-kaypi kawsayta”? (Efe. 4:3, 16.) Arí, atirqanmi, ñawpaq p’unchaykunallatan yuyaykusqanta cambiapusqa. ¿Iman yanaparqan chayta ruwananpaq? Jehová Diosmi santo espiritunwan sonqonta kicharirqan, huk mosqoypi hinataqmi willarqan llapa runakunata sumaqta qhawarinanpaq (Hech. 10:10-15). Chaymi Pedroqa Corneliota nirqan: “Kunanraqmi entiendeni, Diosqa manan mayqen runatapas rikch’ayninta qhawaspachu akllan, aswanpas may suyupipas payta yupaychaspa chanin-kayta ruwaqtaqa chaskinmi”, nispa (Hech. 10:34, 35). Pedroqa saqepurqanmi ñawpaqpi yuyaykusqanta, chaymi huk-hinalla ‘iñiq-masinkunawan’ kawsarqan (1 Ped. 2:17).
17. ¿Imaraykun Diospa llaqtanpi huk hinalla kawsasqanku admirakunapaq?
17 Pedro hinan kay tiempopi cristianokunapas yuyaykusqankuta cambiapushanku (leey Isaías 2:3, 4). “Llapa suyukunamanta, ayllukunamanta, llaqtakunamanta, tukuy rimaykunamantawan” millonninpi runakunan Diospa ‘munayninman’ hina kawsashanku (Apo. 7:9; Rom. 12:2). Wakinqa kay pacha espirituq munasqanman hinan kawsarqanku, cheqninakuspa, maqanakuspa, t’aqanakuypi ima. Ichaqa Bibliata estudiasqanku, Diospa santo espiritunpiwanmi paykunata yanaparqan “hukkunawan thak-kaypi kawsanankupaq” (Rom. 14:19). Chaymi paykunaqa huk hinalla kawsasqankuwan Diosta hatunchashanku.
18, 19. a) ¿Imatan ruwasunman Diospa llaqtanpi huk familia hina thakpi kawsanapaq? b) ¿Imamantan qatimuq estudiopi yachasun?
18 ¿Imatan ruwasunman Diospa llaqtanpi huk familia hina thakpi kawsanapaq? Huñunakusqanchis t’aqakunapiqa askhan huk nacionkunamanta iñiqmasinchiskuna kashanku. Paykunaqa huk costumbrekunayoqmi kanku, manataqmi rimasqanchis simitapas allintachu t’oqyachinku. ¿Kallpachakushanchischu paykunata reqsinapaq? Chayta ruwananchispaqmi Biblia kallpachawanchis. Roma llaqtapi judiokunaman, wak llaqtayoq cristianokunaman ima carta apachisqanpin Pablo nirqan: “Diosninchis yupaychasqa kananpaq sumaqtapuni chaskiykunakuychis imaynan Cristopas chaskiykuwarqanchis hinata”, nispa (Rom. 15:7). ¿Mayqen iñiqmasiykitan qan astawan reqsiyta munawaq?
19 ¿Imatawanmi ruwasunman santo espirituq rurunta ñoqanchispi wiñachinanchispaq? Chaymantan qatimuq estudiopi yachasun santo espirituq soqta rurunmantawan.
[Uranpi willakuykuna]
^ párr. 3 Ruruymanta Jesús rimaspaqa manan ‘santo espirituq [...] rurullanmantachu’ rimasharqan aswanpas ‘Diospa sutinta siminchiswan rimaymantawanmi’, chaytaqa predicasqanchiswanmi sacrificiota hina haywashanchis (Heb. 13:15).
^ párr. 15 Levítico 19:18 textopin nin: “Aman vengakunkichu, amallataq llaqta-masiykikunapaqpas phiñakushallankichu, aswanpas qan kikiykita hinan runa-masiykitaqa munakunki”, nispa. Religionpi umalliqkunaqa ‘llaqta-masiykichis’ ‘runa-masiykichis’ nisqantan “judiokunamantan rimashan” nispa yachachiqku. Kamachikuy Simi qosqanpin Jehová Dios israelitakunata kamachisqa huk llaqtayoq runakunamanta t’aqakunankupaq. Ichaqa manan nirqanchu enemigonkuta hina rikunankupaq cheqnikunankupaqpas.
¿Imatan kutichisunman?
• ¿Imaynatan rikuchisunman iñiqmasinchiskuna munakusqanchista?
• ¿Imaraykun Jehová Diosta kusisqa yupaychananchis?
• ¿Imatan ruwasunman Diospa llaqtanpi huk familia hina thakpi kawsanapaq?
[Tapuykuna]
[21 paginapi recuadro]
“Paykunan cheqaq cristianokunaqa kanku”
Entre la resistencia y el martirio. Los testigos de Jehová durante el Tercer Reich nisqa libron, inglés simipi willan Hitler runaq kamachikusqan tiempopi Jehová Diospa testigonkuna hunt’aq sonqo kasqankumanta. Chaypin willan Neuengamme nisqa sasa llank’ana campopi huk judío wayna prisionero kashaspa Testigokuna rikusqanmanta, ninmi:
“Dachau sasa llank’ana campomanta askha judiokunata chayman aparuwaqtinkun chaypi kaq judiokuna mikhunankuta pakarqanku mana qoyuwanankurayku. [...] Manaraq chay guerra kashaqtinqa yanapanakuqmi kayku, chay wañuy kawsay tiempokunapitaq manaña hukkunapi interesakurqankuchu, sapankapas paykunallapin yuyaykuqku. Ichaqa, ¿yachayta munawaqchu imatan chay tiempokunapi Biblia Estudiaqkuna ruwarqanku chayta? Asnota hinaraqmi tuberiakuna allichaypi llank’achirqanku. Chay killakunapiqa sinchitan chiriq, ch’isiyaqtaqmi khutu unupi kaqku. Llapa runan admirakuqku: ‘¿Imaynapitaq chhayna chiripi kaspa aguantanku?’ nispa. Paykunataqmi niqku: ‘Jehová Diosmi kallpachawanku’, nispa. Paykunapas ñoqayku hinan sinchi yarqaypi kaqku. Chaywanpas chaskisqanku t’antata huñuruspan kuskanta paykuna mikhuqku kuskantataq Dachau nisqamanta chayllaraq chayamuq iñiqmasinkunaman qorqanku. Much’aykuspan sumaqta chaskiykuqku. Manaraq mikhushaspan Diosmanta mañakuqku. Chay qhepamantaq llapallanku kusisqa kaqku. ‘Manañan yarqawankuchu’ niqkun. Chayta rikuspan nirqani: ‘Paykunan cheqaq cristianokunaqa kanku’ nispa”, nispa.
[19 paginapi fotokuna]
Imaymana ruwanayoqña kaspapas, ¿t’aqashanchischu tiempota Diosman asuykunapaq?