“Kunanmi Diospa chaskinan tiempo”

“Kunanmi Diospa chaskinan tiempo, kunanmi Diospa qespichinan p’unchaypas.” (2 COR. 6:2.)

1. ¿Imaraykun yachananchis imatas ima tiempopi ruwananchista?

SALOMONMI qelqarqan: “Kay pachapiqa imaymanapaqmi tiempo kan, tukuypas maychus kananpin suceden”, nispa (Ecl. 3:1). Chaypi nisqan hina, sapankanchismi yachanchis ima tiempopi tarpunanchista, viajananchista, negocio ruwananchista, hukkunawan parlariytapas. Ichaqa yachanallanchistaqmi ima ruwaytachus astawan hunt’ananchis kasqanta. Chhaynapi chaytaraq ñawpaqta ruwananchispaq.

2. ¿Imaynatan yachanchis Jesusqa ima tiempopichus tarikusqanta allinta entiendesqanta?

² Jesusqa kay pachapi kashaspa allintan yacharqan ima tiempopi tarikusqanta ima ruwayta hunt’anantapas. Payqa yacharqanmi Mesiasmanta willaq profeciakuna hunt’akunan  kasqanta, chaymi yacharqan imakunata ñawpaqta ruwananta (1 Ped. 1:11; Apo. 19:10). Sut’itan reqsichikunan karqan prometesqa Mesías kasqanta, tukuy atisqantan Diospa Gobiernonmanta willanan karqan, paywan kamachimunankupaq runakunatapas huñunanmi karqan. Chaymantapas qatikuqninkunatan yachachinan karqan pachantinpi predicanankupaq, runakunata yachachinankupaqpas, chhaynapi paypa yachachisqan kanankupaq (Mar. 1:15).

3. ¿Imaynatan Jesusta kallpacharqan ima tiempopichus tarikusqanta yachasqan?

³ Ima tiempopichus kasqanta yachasqanmi Jesustaqa kallpacharqan kusikuywan Diospa munayninta ruwananpaq. Yachachisqankunatan nirqan: “Cosechanaqa askhallañan, llank’aqkunan ichaqa pisilla. Chay hinaqa, chakrayoqta valekuychis cosechanman llank’aqkunata kacha[mu]nanpaq”, nispa (Luc. 10:2; Mal. 4:5, 6). “Hanaq pacha qhapaqsuyun sispaykamun”, nispa predicamunankupaqmi chunka iskayniyoq qatikuqninkunata ñawpaqta akllarqan chaymantataq qanchis chunkata *, allintataqmi yachachirqan imakuna ruwanankuta. Paytaq “chunka iskayniyoq yachachisqankunata yachachispaña chaymanta ripurqan Galilea provincia llaqtakunapi yachachispa allin willakuykunata willamunanpaq” (Mat. 10:5-7; 11:1; Luc. 10:1).

4. ¿Imaynatan apóstol Pablo Jesucristota qatikurqan?

⁴ Jesucristoqa tukuy sonqopunin Diospaq llank’arqan, chaymi payqa qatikunapaq hinapuni. Apóstol Pablon iñiqmasinkunaman nirqan: “Ñoqamanta yachaqakuychis, imaynan ñoqapas Cristomanta yachaqakuni hinata”, nispa (1 Cor. 11:1). ¿Imaynatan Pablo Cristota qatikurqan? Astawanqa tukuy atisqanta allin willakuykunata willaspan. Chayraykun cartakuna qelqasqanpi iñiqmasinkunata kallpacharqan: ‘Ama qellakuychischu, rawrashaq sonqowan Diosta serviychis’, ‘Diospa llank’ananpi aswan-aswanta llank’aychis, ‘tukuy imatapas ruwaspaykichisqa tukuy sonqowan ruwaychis, Diospaq hinapuni’, nispa (Rom. 12:11; 1 Cor. 15:58; Col. 3:23). Apóstol Pabloqa manan hayk’aqpas qonqarqanchu Damascoman rishaqtin Jesucristo payman rikhurisqanta, Ananiasman Jesuspa nisqantapas, paymi nisqa: “Payqa serviwananpaq akllakusqaymi, chaymi ñoqamanta willanqa wak suyu runakunaman, reykunaman, Israel runakunamanpas”, nispa (Hech. 9:15; Rom. 1:1, 5; Gál. 1:16).

“Diospa chaskinan tiempo”

5. ¿Imaraykun apóstol Pablo rawrashaq sonqowan Diospaq llank’arqan?

⁵ Hechos qelqata leespan sut’ita reparanchis apóstol Pabloqa mana manchakuspa rawrashaq sonqowan predicaq kasqanta (Hech. 13:9, 10; 18:5). Payqa ima tiempopichus kasqanta yachaspan chhaynata Diospaq llank’arqan. Chaymi nirqan: “Kunanmi Diospa chaskinan tiempo, kunanmi Diospa qespichinan p’unchaypas”, nispa (2 Cor. 6:2). Chay simikunan qallariypi hunt’akurqan 537 watapi manaraq Jesús hamushaqtin, chay watapin Israel runakunaqa Babiloniamanta kutimpurqanku (Isa. 49:8, 9). Chhaynaqa ¿imamantan apóstol Pablo rimasharqan? Chaymantan yachasunchis.

6, 7. ¿Ima llank’aytan kay tiempopi chaskinku akllasqa cristianokuna? ¿Pikunan yanapakushanku?

 ⁶ Manaraq chay simikunata qelqashaspan Pabloqa rimarqan hanaq pachapaq akllasqa cristiano masinkunapiwan ancha allin llank’ayta chaskisqankumanta (leey 2 Corintios 5:18-20). Paymi nirqan: ‘Diosqa llapa runata paywan allipunachinaykupaqmi churawarqanku’, nispa. Runakunatan rogananku karqan: “Dioswan allipunaychis”, nispa.

⁷ Runakunaqa Edén huertapi Diospa contranpi hatarispankun paymanta karunchakapurqanku (Rom. 3:10, 23). Chayraykun ñak’ariyman wañuyman qaraykusqa karqanku. Chaymantan apóstol Pablo nirqan: “Yachanchismi Diospa tukuy imaymana kamasqankunaqa kunankama waqasqankuta muchusqankutapas, imaynan wachakuq warmi nanayta muchun hinata”, nispa (Rom. 8:22). Diosmi ichaqa yuyaykurqan rogasparaq runakunata: “Ñoqawan allipunapuychis “, ninanpaq. Chaymi apóstol Pablopas huk cristianokunapas runakunata rogananku karqan Dioswan allipunakapunankupaq. Chay tiempon Jesuspi llapa iñiqkunapaq ‘Diospa qespichinan p’unchay’ karqan. Kunanpas hanaq pachapaq akllasqa cristianokunaqa ‘wak ovejamanta’ cristianokunaq yanapayninwanmi runakunata nishanku: “Dioswan allipunaychis”, nispa (Juan 10:16).

8. Runakunawan allipunakapunanpaq Diospa waqyasqan, ¿imaraykun admirakunapaq?

⁸ Paywan allipunakapunankupaq runakunata Diospa waqyasqanqa admirakunapaqmi. Runakunaña paymanta karunchakapurqanku chaypas, Jehová Diosmi yuyaykurqan paywan allipunakapunankupaq (1 Juan 4:10, 19). ¿Imaynatan chayta ruwarqan? Pablon kutichin: “Diosqa Cristopin kasharqan runakunata pay kikinwan allipunachispa, runakunaq huchankunata mana qhawarispalla. Ñoqaykutataq allipunachiy simita willanaykupaq churawarqanku”, nispa (2 Cor. 5:19; Isa. 55:6).

9. ¿Imaynatan apóstol Pablo agradecekurqan Diospa khuyapayakuyninmanta?

⁹ Jehová Diosmi Churinta sacrificiopi qorqan runakuna iñispa huchankumanta pampachasqa kanankupaq, Paywanpas wakmanta amigontin kanankupaq. Chaymantapas serviqninkunatan hinantinman kacharqan runakunata: “Tiempo kashaqtinraq Dioswan allipunakapuychis”, ninankupaq (leey 1 Timoteo 2:3-6). Pabloqa imachus Diospa munaynin kasqanta entiendespa, ima tiempopichus tarikusqanta yachaspan tukuy sonqo runakunata yanaparqan ‘Dioswan allipunakapunankupaq’. Kunanpas Jehová Diosqa yanapashallanmi runakunata payman kutirikapunankupaq. Chaymi ñoqanchispas apóstol Pablo hina nisunman: “Kunanmi Diospa chaskinan tiempo, kunanmi Diospa qespichinan p’unchaypas”, nispa. Taytanchisqa ancha khuyapayakuq Diospunin (Éxo. 34:6, 7).

Hunt’asunpuni Diospa munasqanta

10. ¿Imatan akllasqa cristianokuna ruwarqanku kay tiempopipas ñawpa tiempopipas ‘qespichina p’unchay’ kasqanmanta yachaspanku?

¹⁰ Ñawpaqtaqa “Cristowan hukllachasqa” kaqkunan Dioswan allipunakapurqanku (2 Cor. 5:17, 18). Paykunapaqqa ‘qespichiyninku p’unchaymi’ qallarirqan 33 wata Pentecostés fiestapi. Chaymantapachan runakunata nirqanku: “Dioswan allipunaychis”, nispa. Kunanpas hanaq pachapaq akllasqa cristianokunaqa yanapashallankun runakunata chayta ruwanankupaq. Paykunaqa allintan yachanku rikhuriypi apóstol Juanpa rikusqan tawa angelkuna ‘kay pachapi tawantin wayrata hark’ashasqankuta’, chhaynapi kay pachaman ama wayraykamunanpaq. ‘Diospa chaskinan tiempopas’, ‘qespichinan p’unchaypas’ manan tukukunraqchu (Apo. 7:1-3). Chaymi kay pachapiraq kashaq akllasqa cristianokunaqa 1800 watakuna tukuymantapacha rawrashaq sonqowan pachantinpi runakunaman willashanku: “Dioswan allipunaychis”, nispa.

11, 12. ¿Imatan akllasqa cristianokuna ruwarqanku cosecha tiempopi tarikusqankuta yachaspanku? (Qhaway 15 paginapi dibujota.)

 ¹¹ Los testigos de Jehová, proclamadores del Reino de Dios libropi nisqan hina, 1800 watakuna tukuyta hinan Russellqa yanapaqninkunantin yacharqanku cosecha tiempopi kawsashasqankuta, chaymi runakunaman Bibliamanta cheqaq yachachikuykunata willananku karqan. ¿Imaynatan chayta ruwarqanku? Paykunaqa manan religionkunaq umallinkuna hinachu huñunakuynillankuman runakunata invitarqanku. Aswanpas chay akllasqa cristianokunaqa qhawarirqanku huk hinamanta Diospa Gobiernonmanta willanankupaq. Paykunaqa cienciaq ñawparisqanwanmi yanapachikurqanku.

¹² Chay cristianokunaqa allin willakuykunata willanankuraykun yanapachikurqanku tratadokunawan, folletokunawan, revistakunawan, librokunawan ima. Qelqallarqankutaqmi discursokunata yachachikuykunatapas askha periodicokunapi lloqsimunanpaq. Chaymantapas tiyasqanku nacionpi wak nacionkunapipas uyarikuq radiokunapin Bibliamanta rimaqku, cinepas mana rimaynillayoq kashaqtinmi paykunaqa rimayniyoq peliculakunata ruwarqanku. Sasaña kaqtinpas rawrashaq sonqowan llank’asqankuraykun kunanqa qanchis millón masña Diosta servishanku, paykunapas huk runakunatan nishallankutaq: “Dioswan allipunapuychis”, nispa.

13. Diospa munayninmanta apóstol Pabloq, ¿ima nisqantan uyarikunanchis?

¹³ Kunanpas “Diospa chaskinan tiempo kashan”. Maytan Jehová Diosta agradecekunchis ancha khuyapayakuyninpi paywan allipunakapunanchispaq willakuyta uyarichiwasqanchismanta. Chaymi tukuy sonqo uyarikunchis apóstol Pabloq nisqanta, paymi nirqan: “Valekuykiku Diospa sumaq sonqo-kayninta ama pisichanaykichispaq”, nispa (2 Cor. 6:1). Jehová Diosqa sumaq sonqo-kayninta runakunaman rikuchin Cristowan ‘runakunata pay kikinwan allipunachinanraykun’ (2 Cor. 5:19).

14. ¿Iman sucedeshan askha nacionkunapi?

¹⁴ Satanasqa yaqa llapa runakunaq yuyaynintan tutayachishan Diosman ama asuykunankupaq, munakuq kayninpi imachus munasqanmantapas mana yachanankupaq (2 Cor. 4:3, 4; 1 Juan 5:19). Chaywanpas askhan Diosmanqa kutirikushanku, Diospa contranpi runakuna hatarisqanrayku ñak’ariykuna kasqanta rikuspa. Allin willakuykunata pisichasqanku nacionkunapipas askha runakunan Dioswan allipunakapushanku. Chaymi tukuy atisqanchista ruwananchis: “Dioswan allipunapuychis”, nispa runakunaman willamunanchispaq.

15. Runakuna thak kanankupaq willakuyta apananchismantaqa ¿imatan yachanankuta munanchis?

¹⁵ Cristianokunaqa manan: “Diosman asuykunkichis chayqa yanapasunkichismi sasachakuyniykichispi, ahinapin thak sientekunkichis”, nispallachu predicanchis. Chayllatan runakunaqa religionninkupi maskhanku, pastorkunataq runakunaq munasqanta ruwanku (2 Tim. 4:3, 4). Ñoqanchismi ichaqa mana chaypaqchu runakunata maskhamunchis. Aswanpas paykunamanmi ninchis: “Jehová Diosmi Cristowan huchaykichista pampachasunkichis, chhaynapin atinkichis Dioswan allipunakapuyta”, nispa (Rom. 5:10; 8:32). ‘Diospa chaskinan tiempon’ ichaqa tukukapunanpaqña kashan.

 ‘Rawrashaq sonqowan Diosta serviychis’

16. ¿Iman Pablota kallpacharqan rawrashaq sonqowan Diosta servinanpaq?

¹⁶ ¿Imaynatan Jehová Diosta kusikuywan servisunman? Wakinqa manchali kasqankuraykun sasachakunku hukkunawan rimayta. Ichaqa Jehová Diosta kusisqa servisqanchistaqa manan uyallanchispichu rikuchinchis, chayqa manan imayna runa kasqanchismantachu dependen. Apóstol Pablon nirqan: ‘Rawrashaq sonqowan Diosta serviychis’, nispa (Rom. 12:11). Pabloqa kinsa chunka watan rawrashaq sonqowan Jehová Diospaq llank’arqan, Jesuspa waqyasqanmantapacha Romapi wañupunankama. Chhayna kusikuywan llank’ananpaqqa mañakullaqpunin Diosmanta santo espiritunwan kallpachananpaq, chaymi payqa nirqan: ‘Atiy qowaqniypa kallpachawasqanwanmi tukuy imaymanata atini’, nispa (Fili. 4:13, NM). Maytan paymantaqa yachasunman.

17. ¿Iman kallpachawasun “rawrashaq sonqowan” Diospaq llank’ananchispaq?

¹⁷ Imaynan nina rawrashanallanpaqqa llant’ata churashanallanchis, chhaynallataqmi “rawrashaq sonqowan” Diosta servishanallanchispaqpas santo espiritutan necesitanchis. ¿Imaynatan chay espirituta chaskisunman? Jehová Diospa imaymana qowasqanchista chaskikuspanchismi, chaykunan iñiyninchispi kallpachawasun. Chaymi kallpachakunanchis sapallanchis, hinallataq familiantin Bibliata estudiananchispaq, Diosmantapas mana p’itiytan mañakunanchis, manan huñunakuyninchiskunamanpas faltakunanchischu. Tukuy chaykunan kallpachawasun “rawrashaq sonqowan” Jehová Diosta servinanchispaq (leey Hechos 4:20; 18:25).

18. ¿Ima ruwaypin cristianokuna yuyayninchista churananchis?

¹⁸ Cristianokunaqa tukuy sonqon Jehová Diosta servinanchis, tukuy yuyayninchistan churananchis munayninta hunt’ananchispaq imaynan Jesuspas ruwarqan hinata (Heb. 10:7). Jehová Diosqa llapa runakuna paywan allipunakapunankutan munan. Chayrayku ñoqanchispas Jesús hina, apóstol Pablo hina tukuy atisqanchista ruwasun “rawrashaq sonqowan” Diospaq llank’ananchispaq.

[Uranpi willakuy]

Yuyarisunchis

• ¿Ima ruwaytan aparirqanku apóstol Pablopas huk cristianokunapas?

• ¿Imaynapin yachanchis kay pachapiraq kashaq akllasqa cristianokuna ‘Diospa chaskinan tiempopi’ allinta llank’asqankuta?

• ¿Iman kallpachawanchis “rawrashaq sonqowan” Diospaq llank’ananchispaq?

[Tapuykuna]

[12 paginapi dibujo]

Apóstol Pabloqa manan hayk’aqpas qonqarqanchu Jesucristo payman rikhurisqanta