Wawaykikunata yanapay Jehová Diospa llaqtanta allinta reqsinankupaq

WAWAKUNAQA munashallankun imamantapas yachayta. ¿Imakunatan wawakuna tapukunkuman karqan Israel runakuna Egiptopi chayllaraq pascua fiestata celebrashaqtinku? Yaqapaschá tapukurqanku: “¿Imaraykun ovejata nak’akurqan?”, “¿Imaraykun papay punkuq chakanta yawarwan llusimushan?”, “¿Maytan risunchis?” nispa.Wawakunaq chhayna tapukusqankuqa manan Jehová Diosta phiñachinmanchu karqan, chaytaqa yachanchis qhepaman pascua fiestata imayna celebranankumanta Israel runakunaman nisqanpi, khaynatan nirqan: “Wawaykichischus tapusunkichis: ¿Imataq kay ruwayniykichisri? nispa chayqa, ninkichis: Kayqa Señor Diospa uywa nak’asqa Pascuan. Paymi Egipto suyupi Israel runakunaq wasinta alqarparirqan. Egipto runakunata muchuchishaspanmi wasiykuta mana imanarqanpaschu”, nispa (Éxo. 12:24-27). Qhepamanpas Jehová Diosqa yuyarichirqanmi tayta-mamakunaman ‘kamachikuyninkunamanta, chaninchayninkunamantawan’  wawanku tapukuqtinqa kutichinanku kasqanta (Deu. 6:20-25).

Qhawarisqanchis hina, Jehová Diosqa munarqanmi wawakunaq tapukuyninkuman kutichinankuta, chaymi wawakunataqa kallpachanman karqan Qespichiqninku Jehová Diosta munakunankupaq. Kunanpas chaytan Diosqa munan. Chaymi wawakunataqa yanapananchis Jehová Diospa llaqtanmanta allinta yachanankupaq, entiendenankutaq chaypi imapas ruwakusqanqa allinninkupaq kasqanta, chhaynapin Jehová Diosta munakunqaku, llaqtantapas allinpaq qhawarinqaku. ¿Imaynatan chaypaq wawaykikunata yanapawaq? Qatiqninpi chaymanta yachasunchis.

Iñiq t’aqamanta

Wawaykikunaqa allintan yachananku huñunakushasqaykichis iñiq t’aqamanta. Chaypaqqa llapan huñunakuykunamanmi wawaykichista apanaykichis. Chhaynapin kasukunkichis Israel runakunaman Jehová Diospa nisqanta, paymi nirqan: “Llapan qharikunata, warmikunata, wawakunata [...] ima huñunkichis, kamachikuy simi leesqata uyarinankupaq. Ahinapin Diosniykichis Señor Dios manchakuyta yachanqaku, tukuy kay kamachikuy simikunatapas makilla hunt’anqaku. Chaymi chaykunata mana yachaq wawqeykichiskunapas uyarinqaku, hinaspan paykunapas Diosniykichis Señor Diosta manchakullanqakutaq”, nispa (Deu. 31:12, 13).

Wawakunaqa huch’uyninkumantapachan Jehová Diosmanta yachankuman. Apóstol Pablon Timoteoman nirqan: “Wawa kasqaykimantapachan Diospa Simin Qelqakunataqa yacharqanki”, nispa (2 Tim. 3:15). Huñunakuykunapiqa huch’uy erqechakunapas entiendenkun chaypi yachachikuykunataqa, yachashankuñataq  Jehová Diosman takisqanchis takikunatapas. Yachallankutaqmi Bibliata huk qelqanchiskunatapas imayna utilizayta, reparallankutaqmi Cristoq cheqaq qatikuqninkunaqa tukuy sonqomanta munanakusqankuta. Jesusmi nirqan: “Mosoq kamachikuytan churapuykichis: Qankunapura munanakuychis. Imaynan ñoqapas munakuykichis, ahinata qankunapas munanakuychis. Chhaynapin ñoqaq yachachisqaykuna kasqaykichista llapa yachanqaku qankuna munanakuqtiykichis”, nispa (Juan 13:34, 35). Huñunakuykunapi munakuywan tratanakusqanchisqa wawakunaq sonqonmanmi chayanqa, chaytaq kallpachanqa mana faltakuspa rinankupaq.

Tempranochus huñunakuykunaman chayankichis, manataq usqhayllachu lloqsipunkichis chayqa, askha amigokunatan chaypi wawaykichiskuna tarinqaku. Wiñaymasinkunallawan ama huñukunankupaqqa kurak iñiqmasikunatawanmi reqsichiwaqchis. Kurakkunawan huñukuspankuqa anchatan wawaykikuna paykunamanta yachanqaku. Imaynan ñawpaq tiempopi Zacariaspas Judapi kamachiq rey Uziasman “Dios manchakuyta” yachachiq, chhaynallatataqmi kay tiempopipas unayña tukuy sonqonkuwan Jehová Diosta serviq cristianokunaqa wawakunata yanapanqaku (2 Cró. 26:1, 4, 5). Chaymantapas Huñunakuy Wasipi kashaspaykichisqa yachachiwaqchismi chaypi kaq Bibliotecata imayna utilizanankumanta, tableropi imakunata k’askachikusqanmanta, hukkunamantapas.

Pachantinpi Jehová Diospa llaqtanmanta

Wawakunaqa yachanankun pachantinpi pachak waranqa más iñiq t’aqakuna kasqanta. Willaychis Diospa llaqtan imayna organizasqa kashasqanta, imakuna ruwasqanta, imaynata chaypi yanapakunankumantawan. Willallaychistaq imarayku hatun huñunakuykunata, iñiq t’aqakunata watukuq umalliq chayamunantapas kusikuywan suyakusqanchista (qhaway  “¿Imakunamantan rimawaqchis Familiantin Diosta Yupaychana Ch’isipi? nisqa recuadrota 28 paginapi).

Atikuqtinqa invitawaqmi wasiykiman mikhunankupaq watukuq umallita, misionerokunata, betelitakunata, tukuy tiemponkuwan Jehová Diosta serviq huk cristianokunatapas. Ama yuyaykuychu: “Paykunaqqa manan tiemponku kanmanchu wawakunapaq”, nispaqa. Imaynan Jesuspas wawakunata munakuywan chaskiq sumaqtataq paykunawan parlaq, chhaynan paykunapas kanku (Mar. 10:13-16). Sichus wawaykichis chay cristianokunamanta uyarinqaku sumaq experienciakunata, reparanqakutaq Jehová Diosta servisqankumanta kusisqa kasqankuta chayqa, paykunapas tukuy tiemponkuwanmi Diosta serviyta munankuman.

Chaymantapas Jehová Diospa llaqtanmanta astawan yachanankupaqqa familiantinmi t’aqwiwaqchis Los testigos de Jehová, proclamadores del Reino de Dios, nisqa librota, chaypin qhawarichiwaq imaynatan wakin cristianokuna Jehová Diosta servirqanku tukuy sonqonkuwan, k’umuykukuywan ima, imaynata paykunawan pachantinpi allin willakuykunata willachisqanmantawan. Video nisqakunawanpas yachachiwaqmi ñawpa tiempopi, kay tiempopipas Diospa llaqtanpi imakuna ruwakusqanmanta. Atikuqtinqa visitawaqchismi nacionniykichispi otaq huk nacionpi kaq Betelta. Chaypin wawaykichisqa umankuman churanqaku kunanpas Jehová Diosqa, apostolkunaq tiemponpi hina, kay pachapi kaq llaqtanta umalliq ‘allin yuyayniyoq hunt’aq kamachiwan’ pachantinpi serviqninkunata pusarishasqanta, espiritual mikhuyta qoshasqantapas (Mat. 24:45-47; Hech. 15:22-31).

Sapanka wawaykiq sonqonman chayaqta yachachiy

Wawaykichisman yachachispaykichisqa yuyariychis imaynata Jesús apostolninkunaman yachachisqanmanta. Huk kutinmi paykunata nirqan: “Askharaqmi qankunaman ninay kashan, chaywanpas kunanqa  sasa entiendeyraqmi kasunkichisman”, nispa (Juan 16:12). Jesusqa manan yachachisqanwanqa paykunata sayk’uchiqchu, aswanpas pisi-pisimantan yachachiq, chhaynapi allinta entiendenankupaq. Qankunapas chhaynallatataq ruwaychis. Diospa llaqtanmanta yachachispaykichisqa ama sayk’unankukama rimapayaychischu. Chhaynapin yachashallayta munanqaku, kusikuywantaq yachanqakupas. Entiendesqankuman hinan ñawpaqpi yachasqaykichista wakmanta kutipawaqchis, astawantaq chaymanta sut’inchawaqchis.

Diospa llaqtanqa yanapawanchismi Jehová Diosman astawan asuykunanchispaq. Chayrayku tukuy sonqomanta Diospa llaqtanpi llank’aq wayna-sipaskunaqa mana faciltachu urmanku Satanaspa mast’arisqan ruwaykunaman (Rom. 12:2). Jehová Diospa llaqtanmanta wawaykichiskunaman astawan yachachispaykichisqa anchatan kusikunkichis. Maytan munayku wawaykichis Jehová Diosta hunt’aq sonqowan servinankuta, llaqtanmanta ama karunchakunankutapas.

[28 paginapi foto recuadropiwan]

 ¿Imakunamantan rimawaqchis Familiantin Diosta Yupaychana Ch’isipi?

Kaykunamantan yachawaqchis:

▪ Huñunakushasqaykichis iñiq t’aqamanta. Chaypin rimawaqchis hayk’aq imaynata chay iñiq t’aqa qallarisqanmanta, mayqen Huñunakuy Wasikunapi huñunakusqaykichismantapas. Invitawaqchismi chay iñiq t’aqapi unayña kashaq mayqen iñiqmasitapas, chhaynapi wawaykichiskunaq tapukuyninman kutichinankupaq.

▪ Willay imarayku huñunakuyninchiskuna, hatun huñunakuyninchiskunapas ruwakusqanmanta, imaynata chaykuna paykunata yanapananmantawan.

▪ Willay imarayku Diospa llaqtanpi askha escuelakuna aparikusqanmanta. Chay escuelakunamanta graduakuqkuna ima allinkuna ruwashasqankumantawan.

▪ Wawakunaqa entiendenankun allin willakuykunata sapa kutilla predicay ancha importante kasqanta. Watantinpi Jehová Diospa testigonkunaq predicasqankumantan willakun Anuario nisqa libropi, yachachiy imaynatan paykunapas predicasqankuwan yanapakunkuman chayta.

▪ Diospa llaqtanpiqa imaymanapin wayna-sipaskunaqa tukuy tiemponkuwan Jehová Diosta servinkuman. Chaymantan astawan yachawaqchis Organizados para hacer la voluntad de Jehová nisqa libropi 10 capitulopi.

▪ Wawakunaqa yachanankun imarayku iñiq t’aqapi imatapas ruwakusqanmanta. Allinta sut’inchay imarayku Diospa llaqtanpiqa mana pipas munasqanman hinallachu imatapas ruwasqanta. Qhawarichiy iñiq t’aqapi imapas allinta ruwakunanpaqqa umallikunata kasukunanku kasqanta.

[Foto]

Unayña Diosta serviq cristianokunawan amigontin kasqankuqa wawaykichispa allinninpaqmi kanqa

[26 paginapi dibujokuna fotokunapiwan]

Wawakuna Diospa llaqtanmanta tapukuqtinkuqa ñawpaq tiempopi hinan kunanpas tayta-mamakunaqa kutichinku