Jehová Diospa llaqtanpin llank’ashallarqanipuni

Khaynatan willakun Vernon Zubko

CAMPOPIN wiñarqani, Stenen llaqta cercapi, chayqa tarikun Canadá nacionpa Saskatchewan provincianpin. Taytaypa sutinmi karqan Fred mamaypataq Adella, paykunan anchata kallpachakurqanku Diosmanta yachachiwanankupaq mana imaykupas faltawanankupaqpas, kurak panaymi karqan Aurellia, sullk’aykunataq Alvin, Allegra, Daryl. Kunankamapas ancha agradecesqan kashayku Bibliamanta cheqaqta yachachiwasqankumanta.

Taytaymi karqan hanaq pachapaq akllasqa cristiano, payqa mana manchakuspan predicaq. Anchatapunin llank’aq familianta uywananpaq, llapa runamantaq Diosmanta willaq chhaynapin yachaqku Testigo kasqanta. Mana manchakuspa predicasqan, Diosmanta mana hayk’aqpas upallakusqanmi yachachiwarqan ñoqapas chhayna kanaypaq. Niwallaqpunin: “Diospa llaqtanpi llank’ashallay chhaynapin mana sasachakuykunaman urmankichu”, nispa.

Stenen llaqtaq callenkunapin predicaq kayku, hinallataq comunidadkunapipas, ñoqapaqmi ichaqa sasa karqan. Sapanka llaqtapin kaqkupuni waynachakunamanta burlakuqkuna. Huk kutinmi, pusaq watayoq kashaspay Qhawaq, ¡Despertad! revistakunata rakisharqani, chayllamanmi huk waynachakuna muyuykuwaspa mosoq sombrerochayta ch’utirqowaspanku ladoypi kaq posteman churarqorqanku. Aswanmi huk hermano qhawamuwashasqa, hamurqospataq niwarqan: “Vern, ¿iman pasashan?” nispa. Hinan chay waynachakunaqa pasapurqanku. Chaywanmi yacharqani callepi predicaspaqa mana poste hinachu sayarayananchis kasqanta. Erqe kashaspay chhayna sasachakuykunapi tarikusqaymi yachachiwarqan qhepaman mana manchakuspa wasin-wasinta predicanaypaq.

1951 watapin 13 wataypi kashaspa bautizakurqani wawqey Alvinwan kuska. Bautismomanta Jack Nathan hermanoq discurso rimamusqantaqa yuyashaniraqmi, chaypin kallpachawarqanku Jehová Diosmanta ama huk killapas rimay saqenaykupaq. * Familiayqa imamantapas aswan allintan qhawariqku precursor kayta. Chaymi 1958 watapi estudiayta tukuspay Winnipeg (Manitoba) llaqtaman ripurqani precursor kaspa Diosta servinaypaq. Taytayqa kusikurqanmi paywan kuska madera cepillaypi llank’asqaymanta, chaywanpas paypas mamitaypas munaqkun tukuy tiempoywan Diosta servinayta, chaymi mana hark’awarqankuchu huk llaqtaman ripunaytaqa.

Huk llaqtaman predicaq rini, chaypin casarakurqani

1959 watapin sucursalmanta nimurqanku munaqkuna Quebec provinciaman rinankuta, chaypi pisilla predicaqkuna kasqanrayku.  Hinan Montrealta rirqani. Chayqa hukniraymi ñoqapaq karqan, chaypin yachanay karqan francés rimayta, huk costumbrekunamantaq yachakunay karqan. Iñiq t’aqakunata watukuq umallin niwarqan: “Ama hayk’aqpas ninkichu: ‘Maymantachus hamusqay llaqtapiqa manan khaynatachu ruwaq kayku’”, nispa; chay niwasqanqa anchatan yanapawarqan (1 Cor. 9:22, 23).

Quebec llaqtapiqa manan karqanchu precursor compañeroy. Febrero killapi 1961 watapin tukuy tiempopaq huk compañerayoq kapurqani, Shirley Turcotte hermanawanmi casarakapurqani, paytaqa Winnipeg llaqtapin reqsirqani. Paypas tukuy sonqonkuwan Jehová Diosta serviq familiamantan hamun. Chay tiempopiqa manan yuyaykullarqanipaschu imaynatas qhepaman anchata kallpachawanman chaypiqa.

Gaspé hallp’apin predicayku

Casarakusqaykumanta iskay wata qhepamanmi precursor especial kanaykupaq nombrawarqanku, hinan Rimouski (Quebec) llaqtaman kachawarqanku. Chiri pasay tiempotan, sucursalmanta niwarqanku Gaspé hallp’api predicanaykupaq, chayqa tarikun Canadá nacionpa Inti lloqsimuy ladonpin. Chaypi lliw runaman tukuy atisqaykuta predicanaykupaqmi kamachiwarqanku (Ecl. 11:6). Huk killa predicamunaykupaqmi carroykupi aparqayku waranqa más revistakunata, yaqa tawa pachak librokunata hina, apallarqaykutaqmi mikhunaykutapas p’achaykutapas. Kantumantan sapanka llaqtakunata predicarqayku. Chay llaqtapi kaq radiopin willamurqanku Jehová Diospa testigonkuna chayamusqankumanta, nimurqankutaq ama pipas qelqanchiskunata chaskinankupaq. Ichaqa yaqa llapankun entiendesqaku qelqanchiskunatapas munachimushankuman hinata, chaymi chaskikurqanku.

Chay tiempopaqqa chayllaraqmi Gobiernoqa wakin llaqtakunapi Testigokunata nisqa predicanankupaq libre kasqankuta, chaymi mayninpiqa policía apawaqku comisariaman. Chhaynan karqan huk llaqtapi predicashaqtiyku, yaqa llapa runakunan chaskikusharqanku qelqanchiskunata, ichaqa huk polician hamuspa comisariaman apawarqanku. Chay llaqtapi kaq abogadon kamachimusqa amaña predicanaykupaq. Policiakunaq umallinqa manan chaypichu kashasqa, chaymi abogadoman rikuchirqani Canadapi tarikuq sucursalpa carta qelqamusqanta, chaypin sut’ita willarqan predicanaykupaq libre kasqaykuta. Leerqospa hinan niwarqan: “Manan qankunawanqa hucha tariyta munanichu. Chayta ruwanaypaqqa curan kamachiwarqan”, nispa. Hinan wakmanta kutirqayku maypichus predicasharqayku chayman, chhaynapi predicanaykupaq libre kasqaykuta runakuna reparanankupaq.

Paqarisnintan comisariaman kutirqayku policiakunaq umallinwan rimamunaykupaq, hinan payqa nishu phiñasqa telefonopi waqyaspa abogadota imaymanata nirqan. Chaymantataq niwarqanku: “Wakmanta imapas kanqa chayqa, ñoqa kikiyta waqyamuwaychis chaymanta encargakunaypaq”, nispa. Manaña chay llaqtamantachu karqayku, pisillataña francés rimaytapas yacharqaykuchu chaypas, chay llaqta runakunaqa sumaqtan chaskiwaqku. Chaywanpas tapukurqaykun: “¿Hayk’aqllapas servinqakuchu Jehová Diosta?” nispa. Qhepa watakunaman Huñunakuy Wasikunata sayarichinaykupaq kutispaykun yacharqayku predicasqayku runakunamanta askha Testigo kapusqankuta. Chaypin repararqayku tarpusqaykuta Jehová Dios ‘wiñachisqanta’ (1 Cor. 3:6, 7).

Sumaq herenciata chaskikuyku

1970 watapin ususiyku Lisa nacerqan. Payqa Jehová Diospa qowasqanku herencia kasqanraykun ancha kusikuyta apamuwarqanku. Esposaywan ususiywanqa ñoqawan kuskan llank’arqanku Huñunakuy Wasikunata sayarichiypi. Ususiykun estudionta tukuspa niwarqanku: “Qankunaqa ñoqaraykun tukuy tiempowan Dios serviyta saqerqankichis, chaymi precursora kanaypaq yuyaykuni”, nispa. Payqa iskay chunka watañan precursora kashan, kunanqa Sylvain qosanwan kuska. Iskayninkun wak nacionkunapi yanapakurqanku Huñunakuy  Wasikunata, huk wasikunatapas sayarichiypi. Familiantinmi decidikuyku imachus kapuqnillaykuwan kawsanaykupaq, chhaynapi Jehová Diosta astawan servinaykupaq. Precursora kayta qallarishaspa ususiykuq niwasqankutaqa manan hayk’aqpas qonqarqanichu. Paymi kallpachawarqan 2001 watapi wakmanta precursor kanaypaq, kunankamapas precursormi kashani. Chaymi yanapawan ima ruwasqaypipas Jehová Diosman hap’ipakunaypaq, imachus necesitasqallaykuwan kusisqa kawsanaykupaqpas.

¿Imayna cristianon kana Huñunakuy Wasikunata sayarichinapaq?

Sichus Jehová Diospa ima qowasqanchis llank’anapipas listo kashanchis yanapakunanchispaq chayqa, ancha kusikuytan tarisun. Ancha allinpaqmi qhawarini Comité Regional de Construcción nisqapi llank’ayta, chhaynapin Quebec provinciapi, wak llaqtakunapipas iñiqmasikunawan kuska Huñunakuy Wasikunata hatarichishayku.

Huñunakuy Wasita sayarichiypi llank’aqkunamantaqa yaqapaschá wakinqa mana kusatachu rimamunku discursota qospa, wasi hatarichiypin ichaqa kusa llank’aq kanku. Chay munasqa hermanokunaqa tukuy atisqankutan imachus yachasqankuwan yanapakunku. Jehová Diosmi paykunataqa yanapan huñunakunapaq munay wasikunata sayarichinankupaq.

Wakin iñiqmasikunan tapuwarqanku: “¿Imayna cristianon kanay Huñunakuy Wasikunata sayarichiypi llank’anaypaq?” nispa. Chayman kutichispan niyman: “Ñawpaqtaqa Jehová Diostan Wawantawan munakunanchis, hinallataq llapa iñiqmasinchiskunatapas”, nispa (1 Cor. 16:14). Diospaqpas hunt’aq sonqon kana, chhaynapi imapas mana munasqanchisman hina kaqtinqa mana phiñakusunchu Diospa llantan contra, kallpachawasuntaq qhepaman yanapakushanallanchispaqpas.

Maytan Jehová Diosta agradecekuni

Papayqa 1985 watapin wañukapurqan, Jehová Diospa llaqtanpi llank’ashanallaypaq yuyaychawasqanqa anchatan yanapawarqan. Paypas llank’ashallanchá, hanaq pachapi herencianku chaskiq cristianokuna hina (Apo. 14:13). Mamitayqa 97 watanpiñan kashan, apoplejía nisqawan onqosqanraykun manaña allintachu rimayta atin. Bibliaq yachachikuyninkunatan ichaqa kusata yuyan. Cartakuna qelqamuwasqankupiqa churamullanpunin textokunata, kallpachawallankupunitaq tukuy sonqoykuwan Diosta servishanallaykupaq. Llapa wawankunan anchata agradecekuyku chhayna munakuq tayta-mamayoq kasqaykumanta.

Esposay Shirleymantapas anchatan Jehová Diosta agradecekuni. Paytan mamitan yuyaychasqa: “Qosaykiqqa kashallanqapunin Diospa llaqtanpi ruwanankuna, chaymi mana sientepakunaykichu hukkunaman tiemponta qoqtinqa”, nispa; chaytaqa yuyarillaqpunin. 49 wata ñawpaqta casarakuspaykun rimanakurqayku yuyaqyapunaykukama kuska Jehová Diosta servinaykupaq, kay pachapi millay kawsay tukukapusqan qhepaman kawsashallaspaykutaq kuska wayna-sipasman tukupunaykuta, chhaynapi wiñaypaq Jehová Diosta servishanallaykupaq. Tukuy tiempon “Señorpa llank’ananpi aswan-aswanta” llank’ashallarqaykupuni (1 Cor. 15:58). Jehová Diostaq munakuywan qhawariwarqanku manan imatapas faltachiwarqankuchu.

[Uranpi willakuy]

[31 paginapi foto]

“Familiantinmi rimanakuyku imachus kapuqnillaykuwan kawsanaykupaq, chhaynapi Jehová Diospaq aswan-aswanta llank’ashanallaykupaq”