Solteralla kaqkunapas kusisqan kankuman

“CASARAKUSPATAQ kusisqa wiñaypaq tiyakapuranku.” Chhaynatapunin wawakunapaq cuentokuna tukun. Peliculakunata novelakunata qhawaspan wakin runakunapas kayta yuyaykunku: casarakuspallan pipas kusisqa kanman. Hinaspapas yaqa llapa llaqtakunapin wiñay hunt’asqa wayna sipaskunata casarakunankupaq mat’ipayanku. 25 watanpi kashaspan Debby niran: “Runakunaq rimasqanmi llapa sipaskunata tanqawanku casarakuyllapiña yuyaykunaykupaq. Casarakusqayki qhepamanñan kusisqa kawsanki nispan yuyaychawanku”, nispa.

Jehová Diospa yuyaykusqanta yachaq runakunan ichaqa mana chhaynatachu yuyaykunku. Ñawpa tiempopi israelita runakunaqa yaqa llapankun casarasqa karanku, chaywanpas Bibliaqa willanmi kusisqa kawsaq solterokunamanta. Kay tiempopi wakin cristianakunapas manan casarakuyta munankuchu, wakintaq solteralla kashanku imapipas tarikusqankurayku. Imaraykuña soltero otaq soltera kashanku chaypas, ¿tarinkumanchu kusisqa kawsayta?

Jesusqa Taytanpa kamachisqanta hunt’aqmi hamuran chaymi mana casarakuranchu. Willarantaqmi wakin qatikuqninkunapas solterolla qhepakunankumanta (Mat. 19:10-12). Payqa willaranmi soltero kayta “atiqqa” sonqonpipas yuyayninpipas chayta hap’ikunanpaq, chhaynapi soltero kawsayninpi astawan imakunatapas ruwananpaq.

Wakin soltera cristianakunaqa manapunin casarakuyta munankuchu Diospa munayninta astawan ruwanankurayku. Ichaqa, ¿paykunallapaqchu kanman Jesuspa yuyaychasqan? (1 Cor. 7:34, 35). Manan paykunallapaqchu. Wakin cristianakunaqa munankun casarakuyta ichaqa manaraqmi tarinkuchu paykunapaq hina qosata. Ana, 30 watanta pasaq soltera cristianan kayta willakun: “Qayninpallan huk llank’aqmasiy qonqaylla niwan ñoqawan casarakuy munasqanta. Sonqoypiña chay rato kusirikurani chaypas manan munaranichu, ñoqaqa munani Jehová Diosta astawan munakunaypaq yanapawaq qosatan”, nispa.

Ana hinan askha cristianakunapas “Señorpi iñiqwanpuni” casarakuyta munanku, chaymi manapuni munankuchu mana iñiq qharitaqa (1 Cor. 7:39; 2 Cor. 6:14). * Manan Diospa kamachikuyninta p’akiyta munankuchu chaymi allin qosata tarinankukama soltera qhepakunku. Chhaynapi tarikuq cristiana, ¿imatan ruwanan kusisqa kananpaq?

Allinpaq kasqantan qhawarina

¿Iman yanapawasun ima munasqanchispas mana hunt’akuqtin? Sonqonchispi imayna yuyaykusqanchismi. Carmen, tawa chunka watanta pasaq soltera cristianan nin: “Kusisqan kani aypay atisqaywan, manataqmi munapayanichu mana aypay atisqaytaqa”, nispa. Arí, yaqapaschá mayninpiqa sapanchis rikukusun otaq llakisqapas tarikusun. Ichaqa yuyarinanchismi Hallp’antinpi askha cristianomasinchiskuna chhaynapi tarikusqankuta,  chaymi yanapawasun mana sinchita llakikuspa ñawpaqllaman purinapaq. Hinaspapas Jehová Diosmi askha soltera cristianakunata yanapashan soltera kasqanku tiempopi allinkunata ruwaspa kusisqa kanankupaq, ima sasachakuyninku kaqtinpas atipanankupaq (1 Ped. 5:9, 10).

Askha soltera cristianakunan reparanku soltera kasqanku allinpaq kasqanta. Ester sutiyoq soltera cristianan 35 watanpi hinaña kashan, paymi nin: “Kusisqa kawsanaykipaqqa imaynapiña tarikuspapas allinkunata ruwasqaykimantan kusikunayki”, nispa. Carmenmi kayta nillantaq: “Solteraña casarasqaña kaspapas Reinopaq ñawpaqta llank’asaq chayqa Jehová Diosqa qowallanqan ima allin kaqtapas. Manaña munasqayman hinachu kawsani chaypas kusisqan kani, kusisqallataqmi kasaqpas”, nispa (Sal. 84:11).

Ñawpa tiempopi solterokuna solterakuna

Jefté runaq ususinpas casarakuytan munaran, ichaqa taytanpa prometekusqanta hunt’ananraykun sipas kasqanmantapacha Diosta yupaychana wasipi yanapakunan karan. Payqa manañan atiranchu qosayoq kayta wawakunayoq kaytapas, chaychá iskay killa hunt’a llakikuymanta waqaran. Ichaqa tukuy sonqowanmi Jehová Diosta yupaychana wasipi serviran wañupunan p’unchaykama. Chaymi Bibliaq willasqan hina, Israelpi sipaskuna watapi huk kutita watukuq riqku kallpachanankupaq (Jue. 11:36-40, NM).

Profeta Isaiaspa tiemponpi eunuco otaq kapasqa runakunapas llakisqapaschá tarikuranku chhaynapi tarikusqankumanta. Bibliaqa manan willanchu imarayku wakin runakuna kapasqa kasqankuta. Chay runakunaqa manan Diospa llaqtanpi chaskisqachu karanku nitaqmi casarakuytapas wawayoq kaytapas atirankuchu (Deu. 23:1). Chaywanpas Jehová Diosqa yacharanmi sonqonkupi imayna sientekusqankuta allinpaqtaqmi qhawariran rimanakuy simita kasukusqankutapas. Kaytan niran: ‘Wasiypin churasaq sutinkuwan qelqasqa saywa rumita [...] mana hayk’aq chinkaq sutiyoqmi kanqaku’, nispa. Chaywanqa nisharan Diospa Reinonpi Jesús kamachikamuqtin chaypi wiñaypaq tiyanankutan. Jehová Diosqa manan hayk’aqpas paykunataqa qonqanqachu (Isa. 56:3-5).

Jeremiasmi ichaqa huk hinapiñataq tarikuran. Sasa tiempokuna kasqanrayku, hatun llank’ana chaskisqanta hunt’ananrayku iman Jehová Diosqa profeta kananpaq willaspa kamachiran ama casarakunanpaq. Kaytan niran: “Kay llaqtapiqa aman casarakunkichu, amallataq wawayoqpaschu kanki”, nispa (Jer. 16:1-4). Bibliaqa manan willanchu chay kamachikuyta chaskikuspa Jeremiaspa imayna sientekusqanmanta, ichaqa anchatapunis kusikusqa Jehová Diospa siminwan (Jer. 15:16). Watakunaq pasasqan qhepamanmi awqankuna Jerusalén llaqtata wata soqta killa hunt’a muyuykuranku. Chayta rikuspañachá Jeremiasqa reparakuran solterolla kananpaq kamachikuyta kasukusqan allinpuni kasqanta (Lam. 4:4, 10).

¿Ima allin ruwaykunan kallpachawasunman?

Jettepa ususinpas eunuco runakunapas Jeremiaspas solteroña qhepakuranku chaypas Diospa munaynintan ruwaranku, Jehová Diospas paykunataqa yanaparanmi. Paykunata hinan kay tiempopipas allin ruwaykuna kallpachawasunman. Huknin ruwayqa Reinomanta  allin willakuykunata willaymi. Chay allin willakuykunata askha warmikuna willanankumantan Biblia willaranña (Sal. 68:11). Chay askha warmikuna ukhupin waranqanpi solterakuna kashanku. Paykunaqa llank’ayninkupin saminchasqa kanku chaymi espiritual wawakunayoq kankupas (Mar. 10:29, 30; 1 Tes. 2:7, 8).

Chunka tawayoq wataña precursora kaq Loli sutiyoq soltera cristianan nin: “Precursora kaspan aswan allin kani. Imaymanan ruwanay kan chaymi mana sapaychu sientekuni. Predicaspa runakunata yanapasqaymi anchata kusichiwan”, nispa.

Askha soltera cristianakunan huk simikunata yachanku, chay simikunapi rimaqkunaman predicaspataq llank’ayninkuta yapanku. Anapas francés simipi runakunaman yachachispan anchata kusikun. Paymi kayta willakun: “Tiyasqay llaqtapiqa askha runakunan huk suyukunamanta kanku. Huk simita yachaspa chay runakunaman allin willakuykunata willarisqaytan mosoq llank’ayta hina qhawarini, chaymi yanapawan predicacionniypi aswan kusisqa kanaypaq”, nispa.

Solterakunaqa manan imamanpas watasqaraqchu kanku, chaymi wakinqa huk llaqtakunaman rinku predicaypi astawan yanapakamunankupaq. Lidiana sutiyoq soltera cristianan 35 watanpi hinaña kashan predicacionpi yanapanata necesitaq suyukunapitaqmi yanapakushan, paymi nin: “Jehová Diospa munayninta ruwanaykipaq astawan kallpachakuqtiykiqa astawanmi amigakunata tarinki munasqataqmi kankipas. Askha suyukunapin allin amigaykuna kan, paykunan anchata kallpachawanku”, nispa.

Biblian willan predicaq Felipe cristianomanta, paymi profetizaq tawa doncella ususikunayoq karan (Hech. 21:8, 9). Paykunapas taytanku hinapunichá tukuy sonqowan Diospaq llank’aranku, yaqapaschá Cesarea llaqtapi cristianokunatapas profetizay atisqankuwan yanaparanku (1 Cor. 14:1, 3). Chay sipaskuna hinan kay tiempopi soltera cristianakunapas iñiqmasikunata huñunakuykunapi kallpachanku.

Filipos llaqtapi tiyaq Lidia sutiyoq cristianapas allinkuna ruwaqmi karan (Hech. 16:14, 15, 40). Yaqapaschá payqa soltera otaq viuda karan, ichaqa sumaq qorpachakuq warmin karan, chaymi iñiq t’aqata watukuq cristianokunatapas wasinpi qorpachaq. Arí, Pablopas, Silaspas, Lucaspas wasinpin qorpachakuranku. Kay tiempopi chhayna qorpachakuq cristianakunapas Lidia hinan saminchasqa kanku.

¿Imatan ruwanayki munasqa sientekunaykipaq?

Allin ruwaykunaña kallpachawanchis chaypas llapallanchismi necesitanchis hukkunaq munakuyninta. ¿Imatan solterakuna ruwankuman munasqa sientekunankupaq? Ñawpaqtaqa yuyarinankun Jehová Dios llapanchistapas munakuwasqanchista, kallpachawasqanchista, uyariwasqanchistapas. Rey Davidpas mayninpiqa ‘sapallanmi khuyay llakisqa’ sientekuq, ichaqa tukuy sonqonwanmi Jehová Diosman asuykuq (Sal. 25:16; 55:22). Paymi kayta qelqaran: “Taytayña mamayña wikch’upuwanqa chaypas, qan Señor Diosmi uywakapuwanki”, nispa (Sal. 27:10). Arí, Diosqa munanmi llapa kamachinkunapas payman asuykuspa amigonkuna kanankuta (Sal. 25:14; Sant. 2:23; 4:8).

Hinaspapas Diospa llaqtanpiqa kashanmi espiritualpi tayta mamanchiskuna wayqe pananchiskunapas, paykunan iñiyninchispi kallpachawanchis (Mat. 19:29; 1 Ped. 2:17). Ñawpa tiempopi Dorcas cristianapas ‘ancha allinkunatan ruwaq, wakchakunatapas yanapaqmi’. Paypa ruwasqanta hina ruwaq soltera soltero cristianokunapas ancha kusikuytan tarinku (Hech. 9:36, 39). Loli sutiyoq cristianan kayta  nin: “Maytaña rini chaypas allin amigakunatan Diospa llaqtanpi maskhani munakuwanankupaq llakisqa kaqtiy yanapaykuwanankupaq ima. Allin amigantin kanaykupaqmi ñoqapas paykunata munakuni yanapanitaqmi kanpas. Pusaq congregacionkunapiñan yanapakushani llapallanpitaqmi allin amigakunata tarini. Wakinqa kuraq cristianakunañan kanku wakintaq sipaschakuna”, nispa. Arí, llapa cristianokunapas necesitankun munakunata kallpachanatapas. Paykunapi interesakusun chayqa munakuyninchistan rikuchisun paykunapas munakuwasuntaqmi (Luc. 6:38).

Diosqa manan hayk’aqpas qonqanqachu

Sasa tiempokunapi tiyasqanchisraykun Biblia niwanchis ima munasqanchistapas qhepaman saqesparaq Diosta servinanchispaq (1 Cor. 7:29-31). Chaymi Señorpi iñiqllawan casarakunankurayku solteralla qhepakuq cristianakunaqa ancha allin qhawarisqa kananku (Mat. 19:12). Ichaqa Jehová Diospa kamachikuyninta hunt’anankurayku soltera kaqkunaqa manan llakisqachu kananku.

Lidiana nin: “Ancha kusisqan kani Jehová Dioswan allinpi kanaypaq kallpachakuspa, paypa kamachinta ruwaspa purisqaymantapas. Wakin casado warmi qharikunaqa kusisqan kawsanku wakintaqmi ichaqa mana. Ñoqapas manan casada kaspachu nitaq soltera kaspachu aswan kusisqa kasaq”, nispa. Arí, Jesuspa nisqan hina Diosta servispa runamasinchistapas yanapaspallan cheqaq kusikuytaqa tarisun. Chaytaqa llapa cristianokunapas ruwasunmanmi (Juan 13:14-17; Hech. 20:35).

Arí, Jehová Diosqa saminchawasunmi payta kasukunanchisrayku tukuy ruwasqanchismanta, chayta yachasqanchismi anchata kusichiwanchis. Bibliapipunin nin: “Diosqa chaninpunin, payqa manan qonqanchu ruwasqaykichiskunataqa, [...] payta munakusqaykichistapas”, nispa (Heb. 6:10).

[Uranpi willakuy]

[25 paginapi willakuy]

“Kusisqan kani aypay atisqaywan, manataqmi munapayanichu mana aypay atisqaytaqa.” (Carmen)

[26 paginapi foto]

Lolipas Lidianapas ancha kusisqan kanku yanapanata necesitaq llaqtakunapi yanapakuspa

[27 paginapi foto]

Diosqa munanmi llapa kamachinkuna payman asuykunankuta