Chanin runakunan wiñaypaq Diosta hatunchanqaku

“Chanin runaqa manan hayk’aqpas urmanqachu, wiñaypaq yuyarinan payqa kanqa.[...] Mana tukukuqmi khuyapayakuq-kayninqa [“chanin kayninqa”, NM].” (SAL. 112:6, 9.)

1. a) ¿Ima sumaq suyakuymi kan Diospa chanin qhawarisqan runakunapaq? b) ¿Imatan tapukusunman?

¡ANCHA sumaq suyakuymi kashan Diospa chanin qhawarisqan runakunapaq! Paykunaqa wiñaypaqmi admirakunqaku Diosta astawan reqsisqankumanta. Kamasqankunamanta astawan yachaspankuqa tukuy sonqomantan payta hatunchanqaku. 112 Salmopi nisqan hina, chaypaqmi ichaqa chay runakuna chanin kananku. Ichaqa kaytapaschá tapukusunman: ¿Imaynatataq Jehová Diosri chanin ch’uya kashaspa huchayoq runakunata chaninpaq qhawariwasunman? Anchataña kallpachakunchis chanin kaqta ruwananchispaq chaypas, pantashallanchismi mayninpiqa hatun huchamanraqmi urmanchis (Rom. 3:23; Sant. 3:2).

2. ¿Ima iskay milagrotan Dios ruwaran ancha munakuyninpi?

² ¿Imatan Jehová Dios ruwaran huchayoq runakunata chaninpaq qhawarinanpaq? Ñawpaqtaqa, ancha munakuyninpin huk doncella sipaspa matrizninman munakusqan Churinpa kawsayninta churaran, chhaynapi mana huchayoq runa nacenanpaq (Luc. 1:30-35). Jesusta enemigonkuna wañuchiqtintaq Diosqa espíritu cuerpopi kawsarichimuran, chaypas huk hatun milagron karan (1 Ped. 3:18).

3. ¿Imaraykun Jehová Dios mana hayk’aq tukukuq kawsaywan Churinta premiaran?

 ³ Jehová Diosqa hanaq pachapi mana hayk’aq tukukuq kawsaywanmi Churinta premiaran, manaraq kay pachapi runa hina naceshaqtinqa manan chhayna kawsayniyoqchu karan (Heb. 7:15-17, 28). Diosqa anchatan kusikuran chhayna premiasqanwan, kay Hallp’api kashaspan Churinqa imaymana sasachakuypiña tarikuspanpas tukuypi Yayanta kasukuran. Chhaynapin Jesusqa Saqraq k’amisqanman kutichiran, Saqraqa niranmi: Runaqa manan munakuspachu Diosta servin aswanpas imaymanayoq kayta munaspallan, nispa (Pro. 27:11).

4. a) ¿Imatan Jesús ruwaran hanaq pachaman kutispa, chaskiranchu Jehová Dios ofrenda haywasqanta? b) ¿Imaynan sientekunki Jehová Dioswan Jesuswan qanrayku ruwasqankupi yuyaykuspa?

⁴ Chaymantapas “Cristoqa kikin hanaq pachamanmi haykurqan, ñoqanchisrayku Diospa qayllanpi [...] rikhurinanpaq” chhaynapi ‘pay kikinpa yawarninta’ huchanchisrayku Taytanman haywananpaq. Munakuq Jehová Yayanchisqa chaskiranmi ‘huchanchiskunata pampachawananchispaq’ Jesuspa ofrenda haywasqanta. Chayraykun ch’uya concienciawan ‘kawsaq Diosta serviyta’ atinchis. Ahinapin ñoqanchispas 112 Salmopi qallariy simikunaq nisqanman hina nisunman: “¡Yupaychasqa Señor Diosqa kachun!” nispa (Heb. 9:12-14, 24; 1 Juan 2:2).

5. a) ¿Imatan ruwananchis chaninta Dios qhawariwananchispaq? b) ¿Imayna qelqasqan kashan 111, 112 Salmo takikuna?

⁵ Chaninta Jehová Dios qhawariwananchispaqqa iñishanallanchismi Jesuspa sacrificakusqanpi. Sapa p’unchaymi Diostaqa agradecekunanchis anchata munakuwasqanchismanta (Juan 3:16). Chaymantapas estudiashanallanchismi Bibliata, yachachisqanman hina kawsananchispaqtaq kallpachakunanchis. Ch’uya concienciawan Diosta serviy munaqkunataqa 112 Salmoq nisqanmi yanapawasunman. Kay salmoqa 111 salmo takiwanmi tupan. Hebreo rimaypiqa iskaynin capitulon qallarin: “¡Hatunchasqa Jah kachun! otaq ¡Aleluya!” nispa. Chayta nisqan qhepamanmi chay takikunaqa 22 liniapi qelqasqa kashan, sapankan qallarin huk hebreo letrawan, chay letrakunaqa 22 llapanpi. *

Kusisqa kanku

6. ¿Ima bendicionkunatan chaskin 112 Salmopi Diosta manchakuq runa?

⁶ “Kusisamiyoqmi Señor Diosta manchakuqqa, kamachikuyninkunawanpas ancha kusikuqqa. Wawankunaqa kay pachapi atiyniyoqmi kanqa, chanin runakunaq mirayninqa saminchasqan kanqa.” (Sal. 112:1, 2.) Qhawasqanchis hina salmistaqa huk runallamantan qallariypi rimashan 2 versiculopin ichaqa ‘chanin runakuna’ nin. Chaypin yachanchis 112 Salmo askha runamanta rimasqanta. Chayraykun apóstol Pablopas Diospa yuyaychasqan Salmo 112:9 textopi nisqanman hina qallariy siglopi cristianokunaman qelqaran (leeychis 2 Corintios 9:8, 9). Kay Salmo takiqa allintan rikuchin imaynata kay tiempopi Cristota qatikuqkuna kusisqa kanankuta.

7. ¿Imapaqmi Dios serviqkunata yanapan Diosta manchakusqanku, imaynatan qhawarinanchis kamachikuyninkunata?

⁷ Salmo 112:1 versiculoq nisqan hina cheqaq  cristianokunaqa Jehová ‘Diostan manchakunku’ chaymi ancha kusisqa kanku. Kamachikuyninkunata kasukuspa Diosta manchakuymi cristianokunataqa yanapan Satanás contra qaqa sayanankupaq. Paykunaqa ‘ancha kusikuywanmi’ Bibliata estudianku Diospa kamachikuyninkunatapas kasukunku. Huknin kamachikuyninta kasukusqankuraykun pachantinpi Reinomanta allin willakuykunata predicanku. Chaymantapas kallpachakunku runakunata Bibliamanta yachachinankupaq, mana allin kawsaq runakunamanpas Diospa juicion chayamushasqanmanta willanku (Eze. 3:17, 18; Mat. 28:19, 20).

8. a) ¿Imaynatan Jehová Dios bendeciran kay tiempopi serviqninkunaq kallpachakusqanta? b) ¿Ima saminchaykunatan chaskinqaku kay Hallp’api tiyanankupaq suyakuyniyoqkuna?

⁸ Chay kamachikuykunata kasukusqankuraykun Diosta serviqkunaqa qanchis millón masña pachantinpi kashanku. Manan pipas neganmanchu “kay pachapi atiyniyoqm[an]” tukupusqankumanta (Juan 10:16; Apo. 7:9, 14). Kay Hallp’apaq munayninta Dios hunt’aqtinqa askha saminchaykunataraqchá chaskinqaku. Kay Hallp’api tiyanankupaq suyakuqkunaqa “manchay ñak’ariymanta” pakaykusqa kanqaku, hinaspa kay pachapi tiyanqaku chaypiqa “tukuy imapas chaninkaman kanqa”. Armagedón p’unchaypi pakaykusqa kaqkunaqa aswan ‘saminchasqan kanqaku’ millonninpi kawsarimpuqkunata chaskispanku. ¡May kusikuymi chay suyakuyqa! Tiempowantaq, Diospa kamachikuyninkunata kasukuspa ‘anchata kusikuqkunaqa’ mana huchayoq ch’uya runaman tukupunqaku, wiñaypaqtaq ‘Diospa wawan’ kapunqaku (2 Ped. 3:13; Rom. 8:21).

Kaqninchiskunawan yanapakusun

9, 10. ¿Imatan cristianokuna ruwaranku espiritualpi qhapaq kayninkuwan? ¿Imaynapin chanin kayninku ‘mana tukukuq’ kanqa?

⁹ “Kawsaykunan qhapaq kaykunan wasinpiqa hunt’a, paypa qoykukuq [“chanin”, NM] kayninqa mana tukukuqmi, sumaq sonqon, khuyapayakuqmi, chanintaqmi, laqhayaqpi lliphipiykuq k’anchaymi chanin runakunapaqpas.” (Sal. 112:3, 4.)  Ñawpaq tiempopi Diosta serviq wakin runakunaqa qhapaqmi karanku. Allinpaq Diospa qhawarisqan runakunan ichaqa llapanku qhapaq kankuman manaña imaymana kaqnikunayoqchu kanku chaypas. Diosta k’umuykukuspa serviqkunaqa yaqa llapankun wakcha kanku, chayraykupaschá paykunaqa pisichasqa kanku imaynan Jesuspa tiemponpipas karanku hina (Luc. 4:18; 7:22; Juan 7:49). Ichaqa qhapaqña wakchaña kanchis chaypas, llapanchismi espiritualpiqa Diospa munayninta ruwaspa qhapaq kasunman (Mat. 6:20; 1 Tim. 6:18, 19; leeychis Santiago 2:5).

¹⁰ Hawisqa cristianokunaqa manan paykunallapaqchu waqaychanku espiritualpi qhapaq kayninkuta nitaq wak ovejamanta kaqkunapas. Aswanpas paykunaqa ‘lliphipishankun’ Satanaspa kamachisqan laqhayaq pachapi ‘chanin runakunapaq’ k’anchay kaspanku. ¿Imaynata? Diosmanta yachasqankuta runamasinkuman willaspa. Diospa enemigonkunaqa manan hayk’aqpas Reinomanta predicacionta qolluchiyta atinqakuchu, chay ruwaymanta askha bendicionkuna kasqanqa “mana tukukuqmi” kanqa. Sichus Diosta serviqkuna sasachakuykunapiña tarikuspapas kallpachakushallanqaku Diospa chaninpaq qhawarisqan kanankupaq chayqa, ‘mana tukukuq’ wiñay kawsaytan chaskinqaku.

11, 12. ¿Imakunapaqmi Diosta serviqkuna kaqninkuta qonku?

¹¹ Diosta serviqkunaqa hawisqa cristianokunamantaña ‘ancha askha runakunamantaña’ kanku chaypas, tukuy sonqomantan kaqninkuta qonku. Salmo 112:9 texto nin: “Wakchakunamanmi kaqninta rakiykun” , nispa. Cheqaq cristianokunaqa yanapankun pisichikuypi tarikuq iñiqmasinkuta necesitaq runakunatapas. Hatun ñak’ariykuna kaqtinpas yanapankun. Jesuspa nisqan hina, chhayna yanapasqankuwanpas anchatan kusikunku (leeychis Hechos 20:35; 2 Corintios 9:7).

¹² Qhawaq revistata ruwakunanpaqpas askha qolqen necesitakun, kay revistaqa 172 rimaykunapin ruwakushan, chay rimaykunata rimaq askha runakunaqa manan qhapaqchu kanku. Chaymantapas kay revistataqa mana uyariqkunapaq, mana rimaqkunapaq, ñawsakunapaq iman ruwakun.

Sumaq sonqon, chanintaqmi

13. ¿Pikunan aswan sumaq sonqowan qoykukuq kanku, imaynatan paykunaman rikch’akusunman?

¹³ “Allin runaqa qoykukuqmi, qolqentapas mañariqmi.” (Sal. 112:5.) Yachasqanchis hina askha runakunan mana sumaq sonqowanchu qonku. Wakinqa allin qhawarisqa kanallankupaqmi qonku, wakintaq mana qoyta munashaspa hawa sonqolla qonku. Pipas pisichawaspanchis yanapawasunman chayqa, manan kusikuywanchu chaskisunman. Ichaqa ¡may sumaqmi sumaq sonqowan qoq runakunaq yanapayninta chaskiyqa! Jehová Diosmi aswan sumaq sonqowan qoykukuqqa, payqa kusikuywanmi imatapas qon (1 Tim. 1:11, NM; Sant. 1:5, 17). Jesucristopas Taytan hina sumaq sonqowan qoykukuqmi karan (Mar. 1:40-42). Sichus chaninta Dios qhawariwananchista munanchis chayqa, tukuy sonqomantan kusikuywan qonanchis astawanqa Diosta reqsinankupaq runakunata yanapaspa.

14. ¿Imaynatan ‘chaninta imatapas ruwasqanchista’ rikuchisunman?

¹⁴ “Chaninninpi imapas ruwaqmi.” (Sal. 112:5.) Profeciaq nisqan hina, allin yuyayniyoq hunt’aq mayordomoqa Diospa chanin kamachikuyninkunaman hinan patronninpa kaqninkunata qhawan (leeychis Lucas 12:42-44). Chay ruwasqankun rikukun umalliqkunata Bibliaq nisqanman hina ruwanankupaq yanapasqankupi, mayninpin chay umallikunaqa hatun huchaman urmaqkunata yanapananku. Chanin ruwasqankuqa rikukullantaqmi congregacionkunapi, misionerokunaq tiyasqanku wasikunapi, Betel wasikunapipas Bibliaq nisqanman hina kamachikuykunata churasqankupi. Ichaqa manan umalliqkunallachu chanin kaqtaqa ruwananku, llapanchismi chaninta imatapas ruwananchis cristianomasinchiskunawan, mana iñiq runakunawan, negocio ruwasqanchispipas (leeychis Miqueas 6:8-11).

Chanin runakunapaq bendicionkuna

15, 16. a) ¿Imaynatan chanin runakuna sasachakuykunata aguantanku? b) ¿Imata ruwanankupaqmi Diosta serviqkuna kallpachakushallanqaku?

¹⁵ “Chanin runaqa manan hayk’aqpas urmanqachu, wiñaypaq yuyarinan payqa kanqa.  Manan millay willakuykunata manchakunchu, sonqonqa manan kuyurinchu, Señor Diosmanmi hap’ipakushan. Manan sonqonqa kuyurinchu, manan manchakunchu, asikuspan awqankunatapas qhawan.” (Sal. 112:6-8.) Manan hayk’aqpas kunan hinaqa mana allin willakuykunamanta uyarikuranchu. Uyarillanchismi guerrakunamanta, terrorismomanta, mosoq onqoykunamanta, kaqmanta rikhurimuq onqoykunamanta, mana allin ruwaykunamanta, wakchakaymanta, Hallp’a qhellichaymanta ima. Diospa qhawarisqan chanin runakunapas ñak’arinkun chaykunawan, ichaqa manan chayraykuchu manchakunku hamuq tiempopi imakuna kananmanta. “Sonqonqa manan kuyurinchu.” Paykunaqa yachankun pisi tiempollamantaña tukuy mana allin kaqta tukuchispa sumaq kawsayta Dios apamunanta. Ima sasachakuypi tarikuspankupas Jehová Diosman hap’ipakusqankuraykun mana pisipankuchu. Diosqa manan hinallatachu qhawan ‘urmanankuta’ aswanpas yanapanmi kallpachantaqmi sasachakuykunata aguantanankupaq (Isa. 12:2).

¹⁶ Chaninkunaqa aguantanallankutaqmi enemigonkuq cheqnikuyninta llullakusqankutapas, ichaqa manan hayk’aqpas paykunataqa enemigonku upallachiranchu nitaqmi atinqakupaschu. Aswanpas Diosta serviqkunaqa tukuy atisqankutan kallpachakunku Diospa kamachisqanta hunt’anankupaq, chayrayku mana sayk’uspa Reinomanta willakuykunata predicashanku llamp’u sonqo runakunatapas yanapashanku Jesusta qatikunankupaq. Kay millay pachaq tukukuynin chayamushasqanman hinan astawanraq runakunaqa qatiykachawasun hark’awasun ima, chayqa tukunqa Gog nisqa Saqra Diospa llaqtan contra hatariqtinmi. Chayraqmi ‘asikuspa awqanchiskunaq’ urmasqanta qhawasun. Jehová Dios wiñaypaq sutinta ch’uyanchasqanta rikuspaqa ¡maytachá kusikusun! (Eze. 38:18, 22, 23.)

Hatunchasqan kanqaku

17. ¿Imaynapin chanin runakuna hatunchasqa kanqaku?

¹⁷ Saqrapas kamachisqan pachapas manaña kapuqtinqa ancha kusisqan huknisqalla Jehová Diosta hatunchasunchis. Llapallan Diospa chanin qhawarisqan runakunapaqqa chaymi wiñaypaq premionku kanqa. Paykunaqa manan enemigonkuq atipasqanchu kanqaku, Diosmi chaninkunapaq prometeran: “Yupaychanan payqa [“hatunchasqan kanqa”, NM]”, nispa (Sal. 112:9). Paykunaqa kusikuymantan Jehová Diosta hatunchanqaku ancha hatun kamachikuq kasqan contra hatariq runakunata tukuchiqtin.

18. ¿Imaynatan hunt’akunqa Salmo 112:10 textoq nisqan?

¹⁸ “Chayta rikuspan millay runaqa phiñapakun, kirunta k’utupakuspan tukukapunqa. Millay runaq munapakuyninqa qollupunqan.” (Sal. 112:10.) Diospa llaqtan contra hatariqkunaqa pisi tiempollamantañan “tukukapunqa”. Envidiakuyninku, cheqnikuyninku, predicasqanchista tukuchiyta munasqankupas paykunawan kuskan “manchay ñak’ariy[pi]” qollupunqa (Mat. 24:21).

19. ¿Imamantan mana iskayananchischu?

¹⁹ Qanrí, ¿chaypichu kanki millay runakunaq chinkapusqanta rikunaykipaq? Manaraq kay pacha p’uchukapushaqtin ima onqoywanpas otaq kuraqña kasqaykirayku wañupuqtiykipas, ¿chanin runakunawanchu kawsarimunki? (Hech. 24:15.) Chhaynan kanqa, sichus iñishallanki Jesuspa sacrificakusqanpi, chaymantapas 112 Salmopi ‘chanin runa’ hina Jehová Diosman rikch’akunaykipaq kallpachakushallanki chayqa (leeychis Efesios 5:1, 2). Jehová Diospa nisqanqa hunt’akunqapunin, paykunapas chanin ruwasqankupas “wiñaypaq yuyarinan” kanqa. Arí, Diosqa wiñay wiñaypaqmi paykunata yuyarinqa munakunqapas (Sal. 112:3, 6, 9).

[Uranpi willakuy]

Yuyaymananapaq tapuykuna

• ¿Imaraykun Jehová Diosta hatunchananchis?

• ¿Imakunan kay tiempopi cheqaq cristianokunata kusichin?

• ¿Imayna qoqtan Jehová Dios munakun?

[Tapuykuna]

[25 paginapi dibujo]

Chaninta Dios qhawawananchispaqqa Jesuspa sacrificakusqanpin iñinanchis

[26 paginapi fotokuna]

Contribucionkunata sonqomanta churasqanchiswanqa yanapanchismi hatun sasachakuypi tarikuqkunata, qelqakunata ruwakunanpaq rakikunanpaqpas