Confianapaq jina runaqa ima kamachikuy kasqantapas kasukunmi, ima rimasqantapas junt’anmi, manataqmi llullakunchu. Chaymi tayta-mamanpas, amigonkunapas, llank’ananpi jefenpas paypi confianku.

Confianapaq jina kanki chayqa, tayta-mamaykiqa manan jark’asunkikuchu imachus ruway munasqaykita.

Sarahi nin: “Tayta-mamayki qanpi confianankupaqqa kallpachakunaykin allin yuyaywan imatapas ruwanaykipaq, sapallaykiña kashaspapas”, nispa.

BIBLIAPIN NISHAN: “Allintapuni kausaychis kay pacha runakuna ukhupiqa”, nispa (2 Corintios 13:5).

Tayta-mamayki qanpi astawan confianankupaqqa kaykunatan ruwanayki:

Manan llullakunaykichu. Sichus llullakunki chayqa manan pipas qanpi confianqachu. Chaymi imapiña pantaranki chaypas sut’illanta willakunayki, chhaynapin jujkunaqa qanpi confianqaku.

Carlosmi nin: “Mana allinniykipaqña kaqtinpas sut’illanta willakunki chayqa, jujkunan qanpi astawan confianqaku”, nispa.

BIBLIAPIN NISHAN: “Tukuy imapitaqmi honrado kaytapas munayku”, nispa (Hebreos 13:18).

Junt’anaykin ruwanaykikunawan. Estados Unidos nacionpin askha llank’aqkunata tapuranku: “¿Imaynan runakuna kananku llank’anayoq kanankupaq?”, nispa. Jinan yaqa llapanku niranku: “Llank’anaykipi imakunatas kamachisunkiku chaykunatan ruwanayki”, nispa. Chhaynaqa kunanmantapacha imachus ruwanaykiwan junt’anki chayqa, kuraq kaqtiykipas yanapasunkin.

Sarahi nin: “Tayta-mamayqa kusikunkun paykunaq mana tanqasqallan kamachiwasqankuta ruwaqtiy, ruwanaykunata junt’aqtiymi paykunaqa astawanraq noqapi confianku”, nispa.

BIBLIAPIN NISHAN: “Qanqa [...] chay nimusqaymantapas astawanraqchá ruwankipas”, nispa (Filemón 21).

Pacienciakunaykin. Wayna-sipaskunaq wiñasqankutaqa ratollan reparanchis, allin yuyaywan imatapas ruwasqankutan ichaqa mana faciltachu reparanchis.

Victormi nin: “Tayta-mamaykipas juj runakunapas manan ratollachu qanpi confianqaku, ichaqa sapa kutilla imachus ruwanaykikunawan junt’anaykipaq kallpachakunki chayqa, pisi-pisimantan qanpi confianqaku”, nispa.

BIBLIAPIN NISHAN: “P’achakuychis [...] pacienciawan”, nispa (Colosenses 3:12).