Jesusmi qatikuqninkunata yachachirqan thaj kayta maskhanankupaq. Ichaqa juj kutinmi paykunata nirqan: “Ama piensaychischu kay pachaman jamusqaywan thaj kay kanantaqa; manan thaj kayta apamuqchu jamuni, aswanmi espadata churaq. Noqaqa t’aqanachiqmi jamuni: Churin taytan contra kanqa, ususitaq maman contra, qhachuntaq suegran contra”, nispa (Mat. 10:34, 35). ¿Imatan Jesús chaywan nisharqan?

Jesusqa manan munarqanchu familiakuna t’aqanasqa kanankutaqa. Ichaqa allintan yacharqan pipas qatikuqnin kayta munaqkunaqa sasachakuypi tarikunankuta. ¿Imarayku? Pipas Diosta servinanpaq bautizakusqan qhepamanqa yaqapaschá familianman mana gustanqachu chay ruwasqan, jinaspa jark’asqa kanman Diosta servinanpaq. Chhaynapi tarikuspaqa manan facilchu Jesuspa yupinta qatikuyqa.

Biblian llapanchista kallpachawanchis lliu runawan sumaqta kausananchispaq (Rom. 12:18). Ichaqa yaqapaschá Jesuspa yachachikuyninkunaqa juj “espada” jina kanman wakin familiakunapaq. Chayqa pasanman familia ukhumanta jujlla Bibliata estudiaqtinmi, chay familiamanta wakinqa manapaschá munankumanchu Biblia estudiayta, jinaspa jark’akuyta qallarinkuman (Mat. 10:36).

Jehová Diosta serviqkunaqa imaymana sasachakuykunapin tarikushanku. Wakinpaqqa familiankun juj religionniyoq kanku, chaywanpaschá wakinqa mat’ipayasqa kanku Diospa cheqnikusqan fiestakunapi kanankupaq. Chhaynapi tarikuspan paykunaqa rikuchinanku Jehová Dios munakusqankuta. Chaymi Jesusqa nirqan: “Pipas taytantapas mamantapas noqamanta astawan munakuqqa manan noqapaq jinachu”, nispa (Mat. 10:37). Chaywanchu Jesús nisharqan, ¿tayta-mamanchista amaña munakunanchispaq? Manan. Aswanpas chaywanmi yachachiwasharqanchis imamantapas Jehová Dios serviy aswan importante kasqanta. Chayraykun familianchismanta pipas Dios serviyta jark’awaqtinchisqa mana chay familianchispaqqa phiñasqachu kanchis, aswanpas munakushallanchismi. Noqanchispaqqa Jehová Diosta munakuymi aswan importanteqa kanan.

Familianchismanta pipas Dios servinanchista jark’akuwaqtinchisqa llakisqan kanchis. Ichaqa Jehová Diosta serviqkunaqa Jesuspa nisqantan yuyarinanchis. Paymi nirqan: “Pipas discipuloy kayta munaqqa ñak’arina k’aspinta chaskispan qhepayta jamunan, mana chayqa manan noqapaq jinachu kanqa”, nispa (Mat. 10:38). Chhaynaqa, Jesusta qatikuqkunaqa allintan yachanchis sasachakuykunapi tarikunanchista, mayninpiqa familianchiskunan Dios serviyta jark’akuwasunman. Chhaynaña kaqtinpas kallpachakunanchismi allin runa kasqanchista imachus ruwasqanchiswan rikuchinanchispaq. Yaqapaschá chhayna kasqanchista rikuspa jark’akuwaqninchis familianchis Biblia estudiayta tiempowan munankuman (1 Ped. 3:1, 2).