Askha runakunan llaki onqoywan kashanku
“Allinña kashaspapas noqaqa llakisqallan kashani”.
“Allintaña ruwashaspapas noqaqa llakikushallanin. Sonqoypin nini: Kunallanmi sinchita llakikusaq, nispa”.
“Noqaqa imatachus chay p’unchaypi ruwasaq chayllapin piensayta munani, ichaqa qonqayllan imaymanamanta llakikuyta qallarini”.
Llaki onqoywan kashaq runakunan chaykunata nirqanku. Qanri, ¿mayninpi chayta nirqankichu? Yaqapaschá wakin familiaykikunapas llaki onqoywan tarikushanku.
Manan qanllachu chhaynapiqa tarikushanki. Kay pachapiqa askha runakunan llaki onqoywan kashanku. Jujkunataq llakikunku wakin familianku chhaynapi tarikusqanmanta.
Tukukuy p’unchaykunapiqa sinchi sasa tiempokunan chayamunan karqan, chaymi askha runakuna llaki onqoywan tarikushanku (2 Timoteo 3:1). Organización Mundial de la Salud nisqan nin: “Mundontinpiqa pusaqmanta juj runan llaki onqoywan kashan”, nispa. Coronavirus onqoy kasqanraykun 2020 watapi aswan askha runakuna llaki onqoywan jap’ichikurqanku.
Chhaynaqa, ¿imatan ruwawaq mayqen familiaykipas llaki onqoywan kaqtin otaq qanpas llaki onqoywan tarikuspa?
¿Imaynan mana llaki onqoyniyoq runa?
Mana llaki onqoyniyoq runaqa allinmi sientekun, atinmi sapa p’unchay imachus ruwananta ruwayta. Ima sasachaytapas atinmi atipayta, allintan llank’anantapas ruwan, kusisqataqmi ruwasqanwan tarikun.
¿Imaynan llaki onqoyniyoq runa?
-
MANAN mana kallpayoqchu tarikun.
-
ICHAQA imapas pasasqanwanmi payqa sinchita llakikun, jinaspa mana allinkunapi piensayta qallarin, mayninpitaq waqaspalla kashan otaq kikin cuerponta k’irikun.
-
Mayninpiqa manan jujkunawan amigontin kayta atinchu, manataqmi imachus ruwanankunata ruwayta atinchu.
-
Chay onqoyqa jap’iwasunmanmi ima edadniyoqña, may llaqtamantaña, ima religionmantaña, qolqeyoqña, wajchaña, allin estudioyoqña kasunman manaña chaypas.
Yanapayta mañakuy
Mayninpiqa wakin runakunaqa qonqayllan cambianku, askhata otaq pisita mijuyta qallarinku, otaq manaña puñuyta atinkuchu, otaq sapa kutilla sinchita llakikunku. Sichus qantapas otaq mayqen familiaykitapas chay pasashasunkichis chayqa, allinmi kanman doctorman riy, jinan payqa yanapasunkichis imaraykuchus chay pasashasunkichis, ima tratamientotas necesitashankichis chayta yachanaykichispaq.
Señorninchis Jesusmi juj kutipi nirqan: “Qhali runakunaqa manan doctorta necesitankuchu, onqosqakunan ichaqa necesitanku”, nispa (Mateo 9:12). Allin tratamientota chaskispaqa manañan nishutañachu llakikunki, jinaspa ñaupaqpi jina imatapas ruwayta atinki, kusisqataq kankipas. Sichus unayña llakisqalla kashanki chayqa, usqhayllan doctorman rinayki allin tratamientota chaskinaykipaq. a
Bibliapiqa manan willanchu imaynata jampichikunanchismantaqa, ichaqa chaypi nisqanqa yanapawasunmanmi allin sientekunanchispaq. Qatimuqpin yachasun ima yachachikuykunas yanapawasunman allin sientekunanchispaq chayta.
a Kay Qhawaq revistaqa manan nishanchu mayqen tratamientos allin kanman chaytaqa. Sapankanchismi allinta qhawarispa decidinanchis ima tratamientotachus chaskisunman chayta.
Astawan yachanaykipaq
BIBLIAMANTA TAPUYKUNA
¿Yanapawasunmanchu Biblia llakikuy onqoywan kashaqtinchis?
Llakikuy onqoyta atipanaykipaq kinsa yanapaykuna.
BIBLIAMANTA YACHACHIKUYKUNA
¿Imaraykun Dios jinallata qhawan ñak’ariykunata?
Biblian juj sumaq suyakuyta qowanchis.
¡MAKILLAN KASHANA!
Askha wayna-sipaskunan llaki onqoyman urmashanku | ¿Imatapas Biblia willashanmanchu chaykunamanta?
Bibliaqa sumaq yuyaychaykunatan qon sinchi llakisqa otaq llaki onqoywan kashaq wayna-sipaqkunapaq.
¡RIJCH’ARIY!
“Umanmantan mana allinchu kashan” ¿ima ninanmi chay?
Umankumanta mana allin kaqkunapaq 9 yanapaykunata tariy.
NOQAYKUMANTA
¿Munawaqchu wasiykiman jamunaykuta?
Bibliaq yachachisqanta astawan t’aqwiriy otaq Jehová Diospa testigonkunamanta astawan yachay
