Leeqkunaq tapukusqan
Ezequiel libropi 37 capitulopin willashan iskay k’aspikuna jujllaman tukupusqanmanta. ¿Imawanmi chay tupan?
Profeta Ezequielwanmi Jehová Diosqa willachiran paypa serviqninkuna prometesqa allpaman kutimpunankuta, jinaspa juj llaqtallaña kapunankuta. Chay profeciaqa kay tiempopipas junt’akuranmi, chaymi Diosta serviqkuna jujllachasqa kashanku.
Jehová Diosmi profeta Ezequielta kamachiran iskay k’aspipi qelqananpaq. Jujninpin qelqanan karan: “Uray ladopi kaq Judá suyu runakunapiwan”, nispa; jujninpitaq qelqanan karan: “Wichay ladopi kaq Josepa miraynin Efraín suyu runakunapiwan”, nispa. Chaymantataq iskaynin k’aspikunata “ch’ulla k’aspita” jina jap’inan karan (Ezeq. 37:15-17).
Jujnin k’aspipi “Efraín” nisqaqa Israel llaqtapi chunka ayllukunatan representaran. Chay ayllukunamantaqa Efraín ayllun aswan jatun karan. Chay ayllukunata kamachiq primer rey Jeroboampas chay ayllumantan karan (Deut. 33:13, 17; 1 Rey. 11:26). Chay aylluqa Josepa wawan Efrainmantan paqariran (Núm. 1:32, 33). Joseqa jatun bendiciontan papan Jacobmanta chaskiran, chaymi Efraín ayllu aswan importante karan. 740 watapi manaraq Jesús jamushaqtin, profeta Ezequielpas manaraq chay profeciata willashaqtinmi Asiria runakuna chay chunka ayllukunata munaychakuranku, chaypi tiyaq runakunatapas presota apapuranku (2 Rey. 17:6). Tiempowantaq Babilonia llaqta Asiria llaqtata atiparan. Chhaynaqa Ezequiel chay iskay k’aspikunamanta willashaqtinqa yaqa llapa Israel runakunan ch’eqerisqa kasharanku jinantin Babilonia nacionpi.
607 watapi manaraq Jesús jamushaqtinmi Babilonia runakuna iskay aylluyoq Judá nacionta atiparanku, jinaspa runakunata Babiloniaman presota aparanku. Chay kutipin chunka aylluyoq Efraín nacionmanta puchuqkunatapas apankuman karan. Judá nacionpi reykunaqa llapankun Judá ayllumanta karanku, sacerdotekunapas Judá ayllupin tiyaqku Jerusalenpi templo kasqanrayku (2 Crón. 11:13, 14; 34:30). Chayraykun “Judá” nispa niqku chay iskay aylluyoq nacionta.
¿Jayk’aqmi Judá nacionwan Efraín nacionwan chay iskay k’aspikuna jina jujllachakuranku? 537 watapi manaraq Jesús jamushaqtinmi. Chay watapin iskaynin nacionkunamanta wakin runakuna Jerusalenman kutipuranku templota wajmanta ruwanankupaq. Chhaynapin Israel nacionqa manaña iskaypichu t’aqasqa kasharan, aswanpas juj nisqallan Jehová Diosta serviranku (Ezeq. 37:21, 22). Chhayna jujllachasqa kanankumantaqa profeta Isaiaspas Jeremiaspas willarankuñan (Is. 11:12, 13; Jer. 31:1, 6, 31).
Chhaynaqa Ezequielpa profecianqa Jehová Dios serviqninkunata jujllachananmantan rimasharan (Ezeq. 37:18, 19). ¿Junt’akuranchu chay profecía kay tiempopipas? Arí, 1919 watapin junt’akuyta qallariran. Chay wata ñaupaqtaqa Satanasqa Diospa llaqtanta jujpaqkama ch’eqerichiytan munaran. Chay watapin ichaqa Diospa llaqtan pisi-pisimanta jujllachakuranku.
Chay tiempopaqqa Diospa llaqtanpi kaqkunaqa yaqa llapankun cielopaq ajllasqakuna karanku (Apo. 20:6). Paykunaqa Ezequielpa willasqan ‘Judapa k’aspin’ jinan karanku. Pisillan karanku paraisopi tiyanankupaq suyakuyniyoqkunaqa. Tiempowanmi ichaqa askha kapuranku (Zac. 8:23). Chhaynapin ‘Efrainpa k’aspin’ jina kapuranku.
Kay tiempopiqa iskaynin clase cristianokunan juj sonqolla Jehová Diosta servishanku. Paykunaqa juj reyllayoqmi kanku, paymi Jesucristo. Paymantan Ezequiel rimasharan ‘kamachiy David’ nispa (Ezeq. 37:24, 25). Jesusmi qatikuqninkunapaq Yayanmanta mañapuran: “Yayáy, llapallanku jujllapuniña kanankupaqmi mañakuyki, imaynan qanpas noqawan jujlla kashanki, noqapas qanwan jujlla kashani, chay jinallataq paykunapas noqanchiswan jujllapuniña kanankupaq”, nispa * (qhaway kay uraypi willakuyta) (Juan 17:20, 21). Jesusqa willallarantaqmi “pisi t’aqa” ajllasqa discipulonkuna, “waj oveja” discipulonkunapiwan ‘ch’ulla t’aqalla’ kanankumanta, juj michiqnillayoq kanankumantawan (Juan 10:16). Chhayna jujllachasqan Diospa llaqtanqa kunan tiempo kashan.
^ párr. 10 Tukukuy p’unchaykunamanta willashaspan Jesusqa askha ejemplokunata churaran. Ñaupaqtan payqa rimaran ‘allin yuyayniyoq junt’aq kamachimanta’, paykunaqa pisillan kanku, Diospa llaqtantataqmi umallishankupas (Mat. 24:45-47). Chaymantataq Jesusqa willaran cielopaq ajllasqakunamanta ejemplokunata (Mat. 25:1-30). Ultimotataq rimaran Cristoq wayqenkunata yanapaqkunamanta, paykunaqa kay pachapin tiyanqaku (Mat. 25:31-46). Yaqa chhaynallataqmi Ezequielpa profecianpas kay tiempopi junt’akushan. Ñaupaqtan junt’akuran cielopaq ajllasqakunawan, chaymantataq paraisopi tiyanankupaq suyakuyniyoqkunawan. Paykunatan representaran ñaupaq tiempopi chunka aylluyoq nación. Chay profeciapi nisqan jina, kunanpas cielopaq kaqkunawan kay pachapaq kaqkunawan juj nisqallan llank’ashanku.
