1. a) ¿Imatan Jeftepas Anapas ruwaranku? (Kay paginapi dibujokunata qhaway.) b) ¿Ima tapuykunamanmi kay estudiopi kutichisun?

JEFTEQA mana manchakuq umallin karan, Anataq juch’uyaykukuq warmi karan; payqa qosanta familianta iman sumaqta atiendeq. Paykunaqa Jehová Diostan adoraranku, sapankankun Diosman juj promesata ruwaranku, tukuy sonqowantaqmi junt’aranku promesa ruwasqankuta. Sichus Jehová Diosman prometekurankiña chayqa Jefteq ejemplonta Anaq ejemplonta iman qatikuwaq. Ichaqa, ¿imatan nikun “promesa” nispa? ¿Imaraykun Diosman promesa ruwasqanchis ancha importante? ¿Imatan Jeftemanta Anamantawan yachasunman? Kay estudiopin chay kinsa tapuykunaman kutichisun.

2, 3. a) ¿Imatan nikun “promesa” nispa? b) Bibliaq nisqanman jinaqa, ¿imatan ruwananchis juj promesata ruwaspa?

² Bibliapi “promesa” nispaqa nishan Diosman imatapas qonapaq, ruwanapaq, tukuy tiemponchiswan servinapaq otaq imatapas mana ruwanapaq prometekusqanchistan. Ichaqa chay promesa ruwananchispaqqa manan pipas  tanqawananchischu aswanpas noqallanchismantan kanan. Jehová Diosqa ima promesa ruwasqanchistapas ancha chaninpaqmi qhawarin, chaymi munan allinta yuyaykuspa ruwananchista junt’ananchistapas, chaytan yuyarinanchis ima promesata ruwanapaqpas. Diospaqqa promesa ruwasqanchisqa juj juramento jinan. Pipas juj juramentota ruwaspaqa chayman jinan tukuy imatapas ruwanan (Gén. 14:22, 23; Heb. 6:16, 17). ¿Imaynatan Diosman promesa ruwasqanchista qhawarinanchis?

³ Moisespa chaskisqan kamachikuypi nisqanman jinaqa, pi runapas junt’ananpunin karan Jehová Diosman promesa ruwasqantaqa. Números 30:2 textopin nin: “Rimarisqantaqa junt’anqapunin”, nispa. Chay qhepamantaq rey Salomón qelqaran: “Diosman prometekuspaykiqa usqhayllata junt’ay, Diostaqa manapunin mana yuyayniyoqkunaqa kusichinchu. Junt’ay prometekusqaykitaqa”, nispa (Ecl. 5:4). Señor Jesuspas niranmi: “Aman mana junt’anaykipaqqa jurankichu, junt’ankipunin Jehová Diosman prometekusqaykikunataqa”, nispa (Mat. 5:33).

4. a) ¿Imaraykun ancha chaninpaq qhawarinanchis Diosman promesa ruwasqanchista? b) ¿Imatan Jeftemanta Anamantawan yachasunman?

⁴ Jehová Diosman promesa ruwasqanchistaqa manan común ruwayta jinallachu qhawarinanchis aswanpas ancha importantepaqmi. Sichus Jehová Dioswan allinpi kayta munanchis chayqa junt’ananchispunin promesa ruwasqanchista. Rey Davidmi niran: ‘¿Pitaq Señor Diospa orqonman wichanqa? ¿Pitaq ch’uya wasinpi kashanqa? [...] mana llullakuspa juraqmi’, nispa (Sal. 24:3, 4). ¿Ima promesatan Jehová Diosman Jeftepas Anapas ruwaranku? ¿Facilchu paykunapaq kanman karan promesa ruwasqanku junt’ay?

5. a) ¿Imatan Jefté Diosman prometeran? b) ¿Uyariranchu Dios mañakusqanta?

⁵ Jeftepa promesa ruwasqanmanta yachasun. Payqa Amón runakunawanmi maqanakunan karan, chay runakunaqa Diospa enemigonkunan karanku (Juec. 10:7-9). Jefteqa Diostan rogakuran chay guerrapi atipachinanpaq, chaypaqmi prometeran: “Noqamanchus Amón runakunata jap’ichiwanki chayqa, paykunata atiparuspa kutipushaqtiy, mayqenchus wasiymanta ñaupaqta taripamuwanqa, chaytan qanman ruphachina sacrificiota jaywamusqayki”, nispa. Diosqa uyariranmi mañakusqanta jinan chay guerrapi atipachiran. Chaymantan Jefteqa guerraq tukusqan qhepata wasinman kutipuran, wasinman chayashaqtinmi sapallan ususin lloqsimuran payta chaskiq, chhaynapin ususin Jehová Diospaq t’aqasqa kapuran (Juec. 11:30-34). ¿Imatan Jeftepa ususin ruwanan karan?

6. a) Jeftemi Diosman juj promesata ruwaran ¿facilchu karan paypaq ususinpaqpas chay promesata junt’ay? b) ¿Ima nishanmi Deuteronomio 23:21, 23; Salmo 15:4 textokunapi promesa ruwaymanta?

⁶ Jefté promesa ruwasqanta junt’ananpaqqa Diosta adorana karpamanmi ususinta kachanan karan chaypi Diosta servinanpaq. ¿Comuntachu Jefté chay promesata  ruwanman karan? Manan. Yaqapaschá payqa yacharanña ususin ñaupaqta wasinmanta lloqsimuspa chaskinanta. Paypaqqa sasachá karan Diosman prometesqanta junt’ay, chaymi Payqa ususinta rikuspa “llakikuymanta p’achanta llik’ikuran”. Chaymantapas Diosmantaq ususinta entregapunan karan chayqa manan jayk’aqpas casarakunanchu karan, manataqmi Jeftepaqa juj wawankuna karanchu miraynin kashanallanpaqpas. Chaychá ususinpas orqo-orqoman waqaq ripuran. Chaywanpas Jefteqa junt’ananpunin karan chay promesa ruwasqanta. Chaymi niran: “Señor Diosmanmi prometekurani, chaytaqa junt’asaqpunin”, nispa. Ususintaq niran: “Papáy, ñataq Señor Diosta nirankiña chayqa, noqawan junt’allay”, nispa (Juec. 11:35-39). Jeftepas ususinpas tukuy sonqon Diosta munakuranku, chaymi sasaña karan chaypas, junt’aranku chay promesawan (leey Deuteronomio 23:21, 23; Salmo 15:4).

7. a) ¿Ima promesatan Ana ruwaran? ¿Imaraykun chayta ruwaran? b) ¿Uyariranchu Jehová Dios Anaq mañakusqanta? c) ¿Imatan Samuel ruwanan karan? (Willakuyta qhaway.)

⁷ Kunanqa Anaq promesa ruwasqanmantañataq yachasun. Paytaqa mana wawayoq kasqanmantan sinchita pisichaqku (1 Sam. 1:4-7, 10, 16). Chaymi Jehová Diosmanta mañakushaspa juj promesata ruwaran; niranmi: “Tukuy-atiyniyoq Señor Diosníy, kay warmi wawaykimanta yuyarikuway, llakikuyniypi amapuni qonqarpariwaychu. Kay warmi kamachiykimanqa juj qhari wawatayá qoykuway, chay qowasqaykitaqa qanllamantaqmi pasaqta qopusqayki, manan chujchantapas rotukunqachu”, nispa (1 Sam. 1:11). * Jehová Diosqa uyariranmi Anaq mañakusqanta, jinan wata pasaymanta juj qhari wawata onqokapuran, sutintataq “Samuel” nispa churaran. Onqoq kashaspaqa may kusisqachá Anaqa kasharan, ichaqa manan chayraykuchu qonqaran Diosman promesa ruwasqanta. Chaymi wawan naceqtin niran: “Diosmanta mañakusqay wawan”, nispa (1 Sam. 1:20).

8. a) ¿Facilchu karan Anapaq promesa ruwasqanta junt’ay? b) ¿Imatan yachachiwanchis Salmo 61 texto Anaq promesa ruwasqanmanta?

⁸ Samuel kinsa watachanpi jina kashaqtinmi Anaqa Siló llaqtapi yupaychana karpaman payta pusaran. Chaypin Elí sacerdoteman pusaspa niran: “Kay wawatan Señor Diosmanta mañakurani, jinan payqa qowaran. Kunantaqmi Señor Diosllamantaq qopunaypaq pusampushani, tukuy kausasqan p’unchaypin Señor Diosllataña servispa kausanqa”, nispa. (1 Sam. 1:24-28). Chaymantapachan Samuelqa Dios yupaychana karpapi tiyapuran. Biblian paymanta nin: “Samuelqa Señor Diosta servispa jatunña wiñasharan”, nispa. (1 Sam. 2:21). Anapaqpas manachá facilchu karan promesa ruwasqanta junt’ayqa. ¿Imarayku? Dios yupaychana karpapi saqesqanmantapachaqa manañachá munakusqan wawanta rikunanchu karan. Chaywanpas Anaqa junt’aranmi Jehová Diosman promesa ruwasqanta (1 Sam. 2:1, 2; leey Salmo 61:1, 5, 8).

9. ¿Imakunamantan yachasun?

 ⁹ Kaypi yachasqanchis jina, Jehová Diosman promesa ruwayqa manan común ruwaychu. ¿Ima promesakunatan ruwasunman? ¿Imatan ruwana chayta junt’anapaq? Chaytan kunan yachasun.

10. ¿Ima promesa ruwasqanchismi cristianokunapaq aswan importante? ¿Imaynatan chayta qhawarinanchis?

¹⁰ Manaraq bautizakushaspaqa yaqapaschá Jehová Diosta niranchis: “Jehová Diosniy qanllapaqñan noqaqa kausasaq. Imaña kaqtinpás qanpa munayniykitan ruwasaq, manan noqaq munayniytachu”, nispa. Chay promesa ruwasqanchismi ima promesamantapas aswan jatun. Jesuspa nisqan jina Diosman prometekuyqa noqanchistapas negakushasunman jinan (Mat. 16:24). Chay promesa ruwasqanchismantapachan ‘Jehová Diospaq kapunchis’ (Rom. 14:8). Manataqmi comun ruwaychu chayqa. Salmo takita qelqaq runa jinan noqanchispas ninanchis: “¿Imatan Señor Diosman kutichipusaq  tukuy allinkunata ruwapuwasqanmanta? Llapa runakunaq rikushasqanmi Señor Diosman prometekusqaykunata qopusaq”, nispa (Sal. 116:12, 14).

11. ¿Imatan bautizakusqanchis p’unchaypi rikuchiranchis?

¹¹ ¿Ñachu bautizakurankiña? Bautizakurankiña chayqa, allintan chayta ruwaranki. Chaywanmi rikuchisharanki Diosman entregakusqaykita. ¿Yuyashanki bautizakunaykipaq discursota? Yuyashanki chayqa, allintachá yuyashanki discurso qoqpa imachus tapumusqanta, chaypin payqa tapumuran: “¿Allintachu entiendenki Diosman prometekuspa bautizakusqaykiwan Jehová Diospa testigonña kasqaykita?”, nispa. Chay tapuyman “arí” nispa kutichispaykin lliuman rikuchisharanki Jehová Diosman entregakusqaykita, payllapaqña kausay munasqaykitapas. Chayta ruwasqaykiwanqa maytachá Jehová Diosqa kusikuran.

12. a) ¿Imakunatan tapukushanallanchis? b) ¿Imata ruwanapaqmi apóstol Pedro kallpachawanchis?

¹² Bautizakusqanchismantapachan Jehová Diosman prometeranchis tukuy tiempo payllata servinapaq. Bautismowanmi chayllaraq Dios serviyta qallarishanchis. Chaymi tapukunanchis: “Bautizakusqaymantapacha, ¿astawanchu Jehová Dioswan jujllachakushani? ¿Tukuy sonqowanchu payta servishani? (Col. 3:23) ¿Sapa kutichu paymanta mañakushani? ¿Sapa p’unchaychu Bibliata leeshani? ¿Mana faltaytachu juñunakuyman rishani? ¿Sapa kutichu predicacionman lloqsishani? Icha, ¿pisipashanichu Dios serviyniypi?”, nispa. Apóstol Pedroq nisqan jina manachus cuidakusun chayqa facil-llatan chiriyapusunman. Chaymi kallpachakunanchis iñiypi, yachaypi, aguantaq kaypi, Dios sonqo kaypi ima astawan wiñanapaq; chhaynapin mana jayk’aqpas Diosta saqesunchu (leey 2 Pedro 1:5-8).

13. ¿Ima ruwasqanwanmi bautizasqa cristiano junt’ananpuni?

¹³ Sichus Jehová Diosman prometekuranchisña payllata servinapaq chayqa junt’ananchismi chay promesa ruwasqanchista. Pipas Jehová Diosta manaña serviyta munanchu chayqa, manan ninmanchu: “Manan jayk’aqpas Diosmanqa prometekuranichu chaymi bautizakusqayqa mana valenchu”, nispaqa. * Sichus chay runa ima jatun juchamanpas urmanman chayqa Diosman iñiq t’aqaman iman cuentata qonqa (Rom. 14:12). Iñiyninpi chiriyapuq iñiqmasikunatan Jesús niran: “Munakuyniykiqa manañan qallariypi jinañachu”, nispa. Noqanchisqa manan paykuna jinachu kananchis, aswanmi tukuy atisqanchista kallpachakunanchis Diosta servinanchispaq, chhaynapin Jesús niwasunchis: “Yachanin imachus ruwasqaykita, imayna munakuqchus kasqaykita, imayna iñiqchus kasqaykita, Diospaq llank’ayniykipas imaynachus kasqanta, imayna aguantaqchus kasqaykitapas; chaymantapas kunankuna imapas ruwasqaykiqa ñaupaqpi ruwasqaykimantapas aswan allinraqmi kashan”, nispa (Apo. 2:4, 19). Arí, Jehová Diosta kusichinanchispaqqa payman prometekusqanchistan junt’ananchis.

14. ¿Ima promesan aswan importante kallanmantaq? ¿Imaynatan chay promesata qhawarina?

¹⁴ Casarasqaña kashanki chayqa, casarakusqaykipi promesa ruwasqaykipas ancha importanten. ¿Imarayku? Jehová Dios casarakuyta paqarichisqanrayku. Payqa ancha chaninpaqmi qhawarin chay promesa ruwasqaykita. Ejemplopaq, Jehová Diospa testigonkuna casarakuqtinkun prometenakunku wañukapunankukama Diospa munasqanman jina munanakunankupaq. Chaymi chay promesa ruwasqankutaqa junt’anankupuni, ¿imarayku? Jehová Diospa ñaupaqenpi promesa ruwasqankurayku. Casarasqakunaqa chhaynata promesa ruwasqankuwanmi rikuchishanku wañunankukama kuska tiyanankupaq (Gén. 2:24; 1 Cor. 7:39). Jesusmi niran: “Diospa jujllachasqantaqa ama pipas t’aqachunchu”, nispa. Arí, pipas casarakuyta munashan chayqa manan t’aqanakuy yuyaywanchu casarakunan (Mar. 10:9).

15. ¿Imaynatan runakuna casado kausayta qhawarinku? ¿Imaynatan cristianokuna casado kausayta qhawarinanchis?

¹⁵ Pantaq runakunataq kanchis chayqa, casado kausaypiqa kanqapunin sasachakuykuna. Bibliapas ninmi: “Casarakuqkunaqa ñak’ariypin tarikunqaku”, nispa (1 Cor. 7:28). Kay tiempo runakunaqa manan respetankuchu casado kausayta, chaymi ninku: “Casado kausayniypi ima sasachakuypipas tarikusaq chayqa divorciakapusaqmi”, nispa. Cristianokunan ichaqa ancha chaninpaq casado kausayta qhawarinanchis, ¿imarayku? Jehová Diospa ñaupaqenpi prometekusqanchisrayku. Sichus chay promesa ruwasqanchista mana junt’asunchu chayqa Diostapas llullakushasunman jina kanman. Yachasqanchis jina, Jehová Diosqa cheqnikunmi llullakuqkunataqa (Lev. 19:12; Prov. 6:16-19). Chaymi casarasqa cristianokunaqa apóstol Pabloq nisqanta yuyarinanku, paymi nin: “Warmiman watasqa kashanki chayqa, ama ripuypi piensaychu”, nispa (1 Cor. 7:27). Arí, Pabloq nisqan jina Jehová Diosqa cheqnikunmi t’aqanakuyta. Chaymi mana pipas esposanmanta otaq qosanmanta divorciakunanraykuqa jujwan pantananchu (Mal. 2:13-16).

16. ¿Ima ninmi Biblia divorciakapuymanta t’aqanakapuymantawan?

¹⁶ ¿Ima kallaqtinmi pipas esposanmanta otaq qosanmanta divorciakapunman? Bibliaq nisqan jina, mayqenninkupas jujwan pantallaqtinmi divorciakapunman. Ichaqa mana juchata ruwaqqa munaspaqa perdonanmanmi juchallikuqta (Mat. 19:9; Heb. 13:4). T’aqanakapuymanta rimaspapas Bibliaqa sut’illantan riman (leey 1 Corintios 7:10, 11). Chaypi nisqan jina, manan pipas ima jawallapas t’aqanakuyta atinmanchu. Ichaqa wakin cristianokuna munaspaqa t’aqanakunkumanmi vidan peligropi tarikuqtin, esposapas otaq qosapas Testigo kashaspa Diospa contranpi kapuqtin. *

17. ¿Imatan casarasqa cristianokuna ruwananku kusisqa kausanankupaq?

¹⁷ ¿Imatan umalliqkuna ruwankuman  mayqen casado warmi-qharipas sasachakuypi tarikuspa yanapayta mañakuqtinku? Yaqapaschá tapunkuman: “¿Qhawarankichischu ¿Cómo sabes si es amor? nisqa videota? ¿Estudiarankichischu Familiaykiwan kusisqa kawsakuy nisqa folletotapas?”, nispa. Chay videopi yanapaykunaqa folletopi yanapaykunapas Bibliamanta orqosqan kashan, chaykunan llapa casarasqakunata yanapanqa sumaqta kausanankupaq. Juj casarasqa iñiqmasin niran: “Chay folletota estudiasqaykumantapachan kusisqa kausashayku”, nispa. Juj hermanan willakullantaq: “22 wataña casarasqa kasharayku chaypas yaqañan t’aqanakapusharayku. Testigoña karayku chaypas manan entiendenakusharaykuchu. Chayllamanmi ¿Cómo sabes si es amor? nisqa video chayamuran, chaytan qhawarayku, chayraqmi yapamanta kusisqa kausashayku”, nispa. Sichus casarasqakuna Jehová Diospa kamachisqanman jina kausanqaku chayqa, astawanmi casado kausayninkupi jujllachakunqaku kusisqataqmi kausanqakupas.

18, 19. a) ¿Imatan cristiano tayta-mamakuna ruwashanku? b) ¿Imaynatan tukuy tiemponkuwan Diosta serviq iñiqmasikuna prometesqankuta junt’ashanku?

¹⁸ Ñaupaq parrafokunapin yacharanchis Jefté Anaq promesa ruwasqankumanta. Chay promesa ruwasqankumantan Jefteq ususin Anaq wawanpas tukuy tiemponkuwan Diosta serviranku. Kay tiempopipas askha cristiano tayta-mamakunan wawankuta kallpachashanku tukuy tiemponkuwan Diosta servinankupaq, chaymi wakinqa tukuy tiemponkuwan Diosta servishanku. Paykunataqa llapanchismi kallpachananchis Diosta servishanallankupaq (Juec. 11:40 NM; Sal. 110:3 NM).

¹⁹ Diospa llaqtanpiqa yaqa 67.000 iñiqmasikunan tukuy tiemponkuwan Diosta servishanku. Paykunamanta wakinmi Betelpi, construccionpi, asamblea ruwana wasipi ima llank’ashanku; wakintaq watukuq umalli, precursor especial, misionero, escuelapi yachachiq ima kanku; jujkunataq Bibliamanta escuelakuna aparikunanpaq encargakunku. Paykunaqa llapankun prometenku Diospa llaqtanpi ima llank’ana chaskisqankutapas allinta junt’anankupaq. Chaymantapas prometellankutaqmi kapuqnillankuwan kusisqa kausanankupaq. Paykunaqa imachus prometesqankuman jinan junt’anku Diospa llaqtanpi llank’ayninkuta.

20. ¿Imaynatan Diosman prometekusqanchista qhawarinanchis? ¿Imaraykun chhaynata qhawarinanchis?

²⁰ ¿Kaypi yachasqanchismanta mayqen promesakunatan Jehová Diosman ruwaranchis? Icha, ¿kinsantintachu ruwaranchispas? Kaypi yachasqanchis jina, promesa ruwayqa ancha importanten, chaymi tukuy atisqanchista ruwananchis chayta junt’anapaq (Prov. 20:25). Sichus Diosman prometekusqanchista mana junt’asunchu chayqa Jehová Diostan phiñachisunman (Ecl. 5:6). Noqanchispas salmista jinan Jehová Diosta ninanchis: “Sutiykitan wiñaypaq yupaychasaq, prometekusqaykunatapas sapa p’unchaymi junt’asaq”, nispa (Sal. 61:8).