KAYPI PIENSAY: Juj museotan rishanki, chaypiqa imaymana antiguo cosaskunan kashan. Yaqa llapanmi thanta gastasqa imaña kashan. Ichaqa jujnin obran mosoqlla kashan. Sumaq ruwasqa kasqanqa llapanpin sut’ita rikukun. Chaymi guiata tapunki: “¿Kaychu aswan mosoq llapanmantapas?”, nispa. Guiataq nisunki: “Manan, kayqa aswan antiguon, manataqmi arreglasqachu karan”, nispa. Jinan ninki: “¿Allin waqaychasqachu kasharan?”, nispa. Paytaq nillantaq: “Manan, kay kaqqa imaymanatan aguantaran wayrata paratapas, runakunapas tukuy imatan ruwaranku chayta ch’usaqyachinankupaq”, nispa. Yaqapaschá tapukunki: “¿Imamanta ruwasqataq kashanmanri?”, nispa.

Bibliaqa chay sumaq obrawanmi comparakun. Aswan antiguo libron, yaqa llapa libromantapas. Kanña antiguo librokuna chaypas, tiempowanqa thantakapurami antiguo cosaskuna jina. Chay librokunapi cienciamanta willasqankuqa tiempowanmi mosoq investigacionkunata ruwakusqanwan cambiapuran. Medicinamanta consejokuna qosqankuqa peligroson janpinanmantaqa. Chay antiguo librokunamantaqa wakin partenkunallañan quedan, chinkapuran otaq thantakapuran.

Biblian ichaqa jujniray. 3.500 wata antiguoña chaypas, mensajenqa kaqllan kashan. Jinaspapas imaymanatan ruwaranku: ruphachiranku, prohibiranku, saruncharanku ima. Ichaqa chaywanpas manan yachachikuyninkunaqa cambiaranchu. Mosoq investigacionkunawan manaña servipunanmantaqa, Bibliaq nisqanqa ñaupariranmi imaymana yachaypi (qhaway, “¿Mana serviqchu icha ñaupariranchu tiemponpaq?” nisqa recuadrota).

Yaqapaschá tapukuwaq: “¿Yanapawasunmanraqchu Bibliaq consejonkuna?”, nispa. Chayta yachanapaq piensay runakunaq sasa problemankunapi. ¿Mayqenkunan astawan manchakunapaq? Yaqapaschá guerrakuna, contaminación, maqanakuy, mana chanin ruwaykuna. Kunanqa piensay Bibliaq yachachikuyninkunapi, jinaspa tapukuy: “Chay yachachikuykunata lliupas kasukuqtiyku, ¿aswan allinchu kay mundo kashanman?”, nispa.

THAJ KAYTA MASKHANAPAQ

“Kusisqa kachunku thaj kausay kananpaq allipunachiqkunaqa, paykunan ‘Diospa wawankuna’ nisqa kanqaku” (Mateo 5:9). “Tukuy atisqaykichista ruwaychis lliu runawan sumaqta kausanaykichispaq” (Romanos 12:18).

KHUYAPAYAKUQ PERDONAQ KANAPAQ

“Kusisqa kachunku khuyapayakuqkunaqa, paykunan khuyapayasqa kanqaku” (Mateo 5:7). “Qankunapura paciencianakuychis, perdonanakuychis razonwanña pipaqpas phiñasqa kashankichis chaypas. Imaynan Jehová * Diospas tukuy sonqowan perdonarasunkichis chhaynallatataq qankunapas ruwaychis” (Colosenses 3:13).

JUJ RAZAKUNAWAN JUJ NISQALLA

Diosmi “juj runallamanta llapa runatapas ruwaran kay pachantinpi tiyanankupaq” (Hechos 17:26). ‘Diosqa lliutapas igual-llatan rikun, payta manchakuspa allin kaqta ruwaq runakunataqa may nacionmantaña kanku chaypas sumaqtan chaskin’ (Hechos 10:34, 35).

ALLPA PACHATA CUIDANAPAQ

“Señor Diosmi runata Edén huertaman churaran llank’ananpaq cuidananpaqwan” (Génesis 2:15). Diosmi ‘allpa pacha malograqkunata ch’usaqman tukuchinqa’ (Apocalipsis 11:18).

MUNAPAYAYTA, QHELLI JUCHATA CHEQNIKUNAPAQ

“Cuidakuychistaq tukuy imaymana munapayaymanta, runaqa askha imaymanayoqña kanman chaypas, manan chay imaymanankunachu kausaytaqa qonqa” (Lucas 12:15). “Qankunaqa ch’uya runakunan kankichis, chayrayku amapuni qankuna ukhupi rimayllapas kachunchu qhelli jucha ruwaymanta, tukuy imaymana millakunapaq kaqkunamanta, sinchi munapayaymantapas” (Efesios 5:3).

HONRADO ALLIN LLANK’AQ KANAPAQ

“Tukuy imapitaqmi honrado kaytapas munayku” (Hebreos 13:18). “Suwakuqpas amaña suwakuchunñachu, aswanpas honrado llank’anata maskhakuspa yachachun llank’ayta” (Efesios 4:28).

NECESITAQKUNATA YANAPANAPAQ

“Llakisqakunata sumaqta rimapayaspa kallpachanaykichispaq, pisipaqkunatapas yanapanaykichispaqwan; chaymantapas lliuwan pacienciakuq kaychis” (1 Tesalonicenses 5:14). ‘Ñak’ariypi tarikuq wajcha wawakunata viudakunatawanmi cuidananchis’ (Santiago 1:27).

Bibliaqa manan willayllachu willan chay yachachikuykunata, aswanpas yanapawanchismi valoranapaq, chayman jina kausanapaqpas. Sichus runakuna chayta kasukunkuman chayqa, pisillan kay  pachapi problemakuna kanman. Bibliapi consejokunaqa ancha allinmi, astawanqa kay tiempopi. Ichaqa, ¿imaynatan Biblia yanapasunkiman?

Jesusmi niran: “Runaqa imatapas allinta ruwasqanwanmi rikuchinqa yachayniyoq kasqanta”, nispa (Mateo 11:19). Cheqaqmi chayqa. Juj consejo allinchus icha manachus kasqanqa rikukun kasukuqtinchis ima resultado kasqanpin. Chaymi niwaq: “Bibliaqa ancha allinpunitaq chayqa, ¿yanapawasqanqa rikukunanmá riki vidaypi? ¿Yanapawanmanchu problemaykuna allichaypi?”, nispa. Ejemplota qhawarisun.

Dianaqa * imaymanakunayoqmi kusisqa kausaran. Ichaqa qonqayllan tukuyta pierdepuran. Ususinmi sipaschallaraq wañupuran, qosanwan t’aqanakapuran, mana qolqeyoqtaq rikukuran. Paymi nin: “Manañan yachakuranichu pichus kasqaytapas: mana wawayoq, mana qosayoq, mana wasiyoqmi rikukurani. Lliutan pierdepurani: pichus kasqayta, kallpayta suyakuyniytapas”, nispa.

Dianaqa repararanmi kay simikuna cheqaq kasqanta: “Qanchis chunka watallan kausayku, kallpasapakunataq pusaq chunkakama chayayku,  chaypas, chay watakunapiqa uma nanayllan, sasa kausayllan. Usqhayllan watakunaqa ripushan, noqaykupas chinkaripushaykun” (Salmos 90:10).

Dianaqa chay sasachakuykunatan Bibliaq yanapayninwan atiparan. Qatimuq kinsantin articulopin rikusun, askha runakuna vidankupi Bibliata kasukuspa allin kausasqankuta. Paykunaqa repararankun Bibliaqa qallariypi rimamusqanchis sumaq obra jina kasqanta. Manan mana serviqman tukupuq sinchi askha librokuna jinachu karan. Bibliaqa jujniray kasqanraykun chhayna. Jinaspapas chay libroq autorninqa Diosmi. ¿Imaraykun chayta ninchis? (1 Tesalonicenses 2:13.)

Yaqapaschá qanpas piensanki kay vidaqa juj tiempolla kasqanta, imaymana problemakunayoq kasqanta. Problemakunapi tarikuspa, ¿maypin consuelota, yanapayta consejotapas maskhanki?

Qhawarisuchis kinsa formapi imaynatan Biblia yanapawasunman vidanchispi chayta.

1. Problemakunapi ama tarikunapaq.

2. Problemakunata allichanapaq.

3. Problemakunata aguantanapaq.

Qatimuq articulokunan chaykunamanta rimanqa.