Casarakuqkunaqa huk compromisotan wañunankukama ruwanku. Chay compromisoqa karqan kuskalla kawsanankupaqmi problemakuna kaqtinpas kuska allichanankupaqmi.

Tiempoq pasasqanwan hinapaschá ichaqa sapa rato discutisqanku pisi-pisimanta karunchachipunman. Yaqapaschá chay hinapi tarikuspa ninkuman: “Imapaqñataq kay hinapiri kawsayman aswanpas t’aqanakapusaq”, nispa.

Manan compromiso ruwasqaykichischu problemaqa. Askha runakunan mana munankuchu compromiso ruwayta. Wakinqa ninkun: “Mana allinta decidispapas comprometerqokuyman hinaspa ñakapakushayman”, nispa. Ichaqa manan hinachu, aswanpas compromisoqa casarasqakunatan segurota sientechin imaynan anclapas allinta barcota sayachin hinata. Megan sutiyoq warmi nin: “Casarasqa kaspaqa manan t’aqanakuypichu mayqenpas piensan problema kaqtinqa”, nispa. * Nishu problemakunaña kanman chaypas manan t’aqanakuypichu piensanku aswanpas problema allichaypin (“ Compromisoqa casarasqakunatan yanapan” nisqa recuadrota qhaway).

Matrimonioykipi problemakuna kaqtinqa chayta aprovechay astawan hukllachakunaykichispaq amataq niychu “amapas comprometekuymanchu karqan” nispaqa. ¿Imaynatan chayta ruwawaq?

¿Iman qanpaq compromiso? “Wañuyllañan t’aqasunkichis”, ¿imaynatan chay simikuna sientechisunki: Watasqata hinachu icha segurotachu? Problemakuna kaqtin, ¿t’aqanakuytapachachu munanki? Matrimonioykitaqa manan iskay kinsa p’unchaypaq hinallachu qhawarinayki chaymi yanapasunki compromiso ruwasqaykita respetanaykipaq (Bibliaq yachachikuynin: Mateo 19:6).

Tayta-mamaykiq kawsasqanta qhawariy. Yaqapaschá compromiso ruwaytaqa pisi tiempollapaq qhawarinki tayta-mamaykiq t’aqanakusqanrayku. Leaqa casarasqañan, paymi nin: “Wawallaraq kashaqtiymi tayta-mamaykuna divorciakurqanku chaychus hina mayninpiqa qhawarini casarakusqaytaqa tukukapuqta hinalla”, nispa. Ichaqa ama llakikuychu, manan chayraykuchu qantapas chayqa pasasunki (Bibliaq yachachikuynin: Gálatas 6:4, 5).

Ama hawan ukhuntachu rimay. Sinchi renegasqa kashaspaykiqa ama niychu “¡wikch’usaykin!”, “¡ripusaq pichus munakuwaqniywan comprendewaqniywan!” nispaqa. Qhepamanmi chay nisqaykimanta arrepientekuwaq. ¿Imarayku? Chay simikunaqa munakuyniykichistan chiriyachin, chay hawan sinchi k’iriq simikunata ninakuyta qallaripuwaqchis. Aswanpas kay hinatan ninakuwaqchis: “Sumaqllata allichasun, ama phiñakuspalla”, nispa (Bibliaq yachachikuynin: Proverbios 12:18).

Munanakusqaykichista sut’ita rikuchiychis. Fotoykichista hap’iychis llank’asqaykichispi. Viajepi tarikuspaqa waqyanakushallaychis. Casado kawsayniykichismanta sumaqta rimaychis. Ama qonqaychischu huk miembrolla kasqaykichista chayrayku kay hinata ninaykichis: “Ñoqawan esposaywanqa otaq qosaywan ñoqawanqa”, nispa. Chhaynapin fiel kasqaykichista rikuchinkichis.

Hukkunata qhawariy. Problemankuta allichayta yachaq askha watakunaña casarasqakunata tapuy: “¿Imatan ruwankichis munanakushanallaykichispaq? ¿Iman yanapasunkichis comprometekusqaykichista hunt’anaykichispaq?”, nispa. Biblian nin: “Fierrotaqa fierrowanmi filochanku, chay hinatan runataqa runamasin allinyachin”, nispa (Proverbios 27:17). Chay textoq nisqan hina yanapayta mañakuy casarakuyninkupi sumaqta kawsashaqkunamanta.