¿IMA NINKUN RUNAKUNA?

Askha runakunan ninku: “Qolqepaq pukllayqa manan huchachu sichus mana leypa contranpichu kashan chayqa. Gobiernoq organizasqan sorteokunapi qolqe ganakusqanqa pobrekunata yanapanapaq iman apachikun”, nispa.

¿IMA NINMI BIBLIA?

Bibliaqa manan rimanchu qolqepaq pukllaymanta. Ichaqa yanapawanchismi imaynatan Dios qhawarin qolqepaq pukllayta chayta entiendenanchispaq.

Chay pukllaypiqa huk pukllaqkunaq qolqentan ganayta munanku, chay ruwayqa Jesuspa nisqan contrapin kashan, paymi nirqan: “Tukuy imaymana munapayaymanta cuidakuychis”, nispa (Lucas 12:15). Runaqa pukllan qolqeta munapayasqanraykun. Yachankuña mayninpi mana gananankuta chaypas qhapaq kayta munaspan runakunaqa chay pukllaykunapi askha qolqeta apostanku. Pukllana wasikunataq millonninpi premiokunata munachinku. Chaymi runakunata astawan tanqan pukllaspa facil-llata qolqe ganayta munanankupaq.

Qolqepaq pukllaqkunaqa paykunallapaq kananta munaspan hukkunaq qolqe pierdesqankuta apakunku. Biblian ichaqa kayta niwanchis: “Ama pipas kikinpa allinnillantaqa maskhachunchu, aswanpas runamasinpa allinninta maskhachun”, nispa (1 Corintios 10:24). Moisesman Diospa qosqan kamachikuypipas kaytan nishan: ‘Aman munapayankichu [...] runamasiykiq imantapas’, nispa (Éxodo 20:17). Qolqepaq pukllaqqa hukkunaq pierdenantan munan, hinaspa llapa qolqeta apakapunanpaq.

Bibliaq nisqan hina manan suertepichu confiananchis qolqeyoq kanapaqqa. Ñawpa tiempopin wakin israelitakuna manaña Jehová Diospiñachu confiapurqanku aswanpas “allin suertepaq” dioskunatan adorayta qallarirqanku. ¿Imaynatan Jehová Dios chayta qhawarirqan? Kaytan nirqan: “Aswanpas mana allinkaqtan ñawpaqeypi ruwarqankichis, millakusqaytan akllakurqankichispas”, nispa (Isaías 65:11, 12).

Wakin nacionkunapiqa chay pukllaykunapi qolqe ganasqankutan escuelakunata ruwanapaq, pobrekunata yanapanapaq ima qonku. Imapiña chay qolqekunata utilizanku chaypas, qolqepaq pukllayqa runakunatan tanqan munapayayman, paykunallapaq kananta munayman, facil-llata qolqe ganayman ima.

‘Aman munapayankichu [...] runamasiykiq imantapas’ (Éxodo 20:17)

¿IMA NINMI BIBLIA?

Biblian niwanchis: “Qhapaqyayta munaq runakunan ichaqa wateqayta mana atipaspa, toqllaman hina urmaykunku, hinaspan mana valeq waqllichiq munapayaypi rikukuspanku, chaykunawan chinkayman ñak’ariyman urmaykapunku”, nispa (1 Timoteo 6:9). Munapayaymi runakunataqa tanqan qolqepaq pukllayman. Munapayayqa sinchi mana allinmi, chaymi Biblia niwanchis: ‘Qankuna ukhupiqa ama rimayllapas kachunchu [...] munapayaymantaqa’, nispa (Efesios 5:3).

Qolqepaq pukllayqa facil-llata qolqe tariymanmi runakunata tanqan astawanqa qolqe sonqo kayman. Biblian nin: “Qolqe sonqo-kaymi tukuy mana allinkunaq saphinqa”, nispa. Qolqe sonqo runakunaqa chayllapaqñan kawsanku. Chaymi wakinkunataqa onqochin Diospipas mana iñipunkuñachu. Biblian nin munapayayman urmaqkunaqa ‘imaymana llakikunapi rikukunankuta’ (1 Timoteo 6:10).

Munapayaq runaqa manan imawanpas contentakunchu, nitaqmi kusisqapaschu kawsan qolqerayku. Eclesiastés 5:10 texto nin: “Qolqeman sonqollikuqqa, astawanpunin munan, imaymanayoq kayta munaqpas, astawanraqmi tariyta munan”, nispa.

Millonninpi runakunan qolqepaq pukllayman urmaykurqanku, kunantaq watasqa hina rikukapunku. Estados Unidos nacionpin millonninpi kan qolqepaq pukllayman vicioyoq runakuna.

Proverbios 20:21 texton yachachiwanchis munapayaq runakunaqa qhapaqpas kankumansi, ichaqa manan Diospa bendicionninta chaskinqakuchu. Chaymantapas qolqepaq pukllaywan vicioyoq runakunaqa manupi iman rikukunku, hinaspapas mana amigoyoq, mana trabajoyoq iman kapunku, familiankupas saqepunmi. Bibliaq nisqanta kasukuyqa pakaykuwanchismi pukllaspa imaymanakunapi tarikunanchismanta.

“Qhapaqyayta munaq runakunan ichaqa wateqayta mana atipaspa, toqllaman hina urmaykunku, hinaspan mana valeq waqllichiq munapayaypi rikukuspanku, chaykunawan chinkayman ñak’ariyman urmaykapunku” (1 Timoteo 6:9)