“Aman ima idolotapas, ima rikch’aytapas ruwakunkichu, hanaq pachapi kaqman rikch’akuqtapas, kay pachapi kaqman rikch’akuqtapas [...]. Aman chaykunaman k’umuykukunkichu, amallataq chaykunata yupaychankipaschu” (Éxodo 20:4, 5)

Hebreo Rimay Qelqakunapiqa otaq Ñawpaq Testamentopiqa askha kutitan huchachan imagenkuna yupaychayta

¿IMA NINKUN WAKIN RUNAKUNA?

Católico religionmanta huk qelqan nin: “Judiokunaqa askha imagenkunatan utilizaqku Diosta yupaychanankupaq”, nispa. Nillantaqmi: “Chay imagenkunatan paykunaqa yupaychaqku hatunchaqku”, nispa. Chaytaqa nin Jerusalén temploq perqankunapi t’ikakuna, rurukuna, animalkuna dibujasqa kasqanraykun (1 Reyes 6:18; 7:36).

KAYTAN YACHANAYKI:

Católico religionmanta qelqaqa chaytapaschá nin, ichaqa hunt’aq sonqowan Diosta serviq judiokunaqa manan chay templopi figurakunataqa yupaychaqkuchu. Manan may parte Bibliapipas ninchu “judiokunaqa imagenkunatan yupaycharqanku” nispaqa.

¿IMA NINMI BIBLIA?

Profeta Isaiaswanmi Dios kayta qelqachirqan: “Manan pipas ñoqa hina qhapaqchasqaqa kanqachu, ñoqallan yupaychasqaqa kanay, manan idolokunachu”, nispa (Isaías 42:8).

“Dios yupaychana wasiwan ídolo yupaychana wasiwanqa manan kaqkamachu [...], ama ima qhelli kaqtapas llamiychischu, hinan ñoqa chaskisqaykichis” (2 Corintios 6:16, 17)

“Ñawpa cristianokunaqa millakurqankuchá iglesiakunapi imagenkunata churanankupaq yuyaykuyllatapas, ídolo yupaychaqta hinachá qhawarinkuman karqan pillapas imagenkunaman k’umuykuqtaqa” (Cristiana iglesiamanta willakuykuna)

¿IMATAN WAKIN RUNAKUNA NINKU?

Católico religionmanta qelqan nin: “Ñawpa cristianokuna imagenkunata yupaychasqankumantaqa kanmi pruebakuna”, nispa. Nillantaqmi: “Cristianokunata p’ampasqankupin tarikun imaymana kaqninkuta [...]. Chaykunapin tarirqanku yupaychanapaq figurakunata”, nispa. *

KAYTAN YACHANAYKI:

Cristianokunata p’ampasqankuqa karqan hallp’aq pachanpi cuartokunan, chaykunapi imagenkuna tarikusqanqa 200 watamanta kaqkunan, chay kutipaqqa 200 watañan pasarqan Jesuspa wañupusqanmanta. Ichaqa Griego Rimay Qelqakuna otaq Mosoq Testamento qelqaqa riman 1 watamanta 100 watakama kawsaq cristianokunamantan. Paykunatan “ñawpa cristianokuna” nispaqa nikun, manan Católico religionpa qelqaq rimasqan cristianokunatachu. Chay imagenkuna tarisqankuqa reparachinmi 200 watakunapaqqa pantasqa religionpi hina imagenkunata yupaychasqankuta, chhaynapi askha runakuna haykunankupaq. *

¿IMA NINMI BIBLIA?

“Amapuni idolokunataqa yupaychaychischu” (1 Corintios 10:14).

“Idolokunataqa amapuni yupaychaychischu” (1 Juan 5:21)

Bibliaqa manan ninchu idolokunata yupaychanapaqqa. Chayraykun Jehová Diospa testigonkunaqa mana yupaychankuchu, nitaqmi wasinkupipas huñunakunanku wasipipas churankuchu

¿IMA NINKUN WAKIN RUNAKUNA?

Católico religionmanta qelqan nin: “Imagenkunata yupaychaspaqa pitachus chay imagen representan paytan yupaychakun. Chaymi piqpa imagennintapas yupaychaspaqa pay kikintapas yupaychasunman hina”, nispa.

KAYTAN YACHANAYKI:

Qatikuqninkunata mañakuyta yachachispaqa Jesusqa manan nirqanchu imagenkunata utilizanankuta. Griego Rimay Qelqakunapiqa manan kanchu imagenkunata utilizaspa Diosta yupaychanapaq yachachikuyqa.

¿IMA NINMI BIBLIA?

“Señor Diosniykitan yupaychanki, pay sapallantataqmi servinkipas” (Mateo 4:10).