Pilaton runakunata niranña: ‘Manan Jesuspa contranpi nisqaykichismantaqa imatapas juchachanapaq jinaqa tarinichu. Herodespas manan imatapas tarimusqachu’, nispa (Lucas 23:14, 15). Jinaspanmi Pilatoqa Jesusta kacharipuyta munaspa runakunata niran: “Qankunaqa munankichispunin Pascua fiestapi pillatapas kacharipunayta ¿riki? ¿Munawaqchischu judío runakunaq reynin kacharipunayta?”, nispa (Juan 18:39).

Chay tiempopin juj runa Barrabás sutiyoq preso kasharan. Paymi karan suwa, gobierno contra jatariq, runa wañuchiq ima. Chayta yachaspan Pilatoqa runakunata niran: “¿Mayqentan kacharipunayta munankichis? ¿Barrabastachu, icha ‘Cristo’ nisqaykichis Jesustachu?”, nispa. Runakunataq umalli sacerdotekunaq kallpachasqan kaspa Barrabasta kacharinanpaq mañakuranku. Chaymi Pilatoqa wajmanta niran: “¿Mayqentan iskayninkumanta kacharipunayta munankichis?”, nispa. Runakunataq niranku: “¡Barrabasta!”, nispa (Mateo 27:17, 21).

Pilatotaq admirasqa niran: “Chhaynaqa, ¿imatataq ruwasaq ‘Cristo’ nisqaykichis Jesuswanri?”, nispa. Jinan runakunaqa niranku: “¡Paytaqa k’aspipi warkuy!”, nispa (Mateo 27:22). Paykunaqa mana p’enqakuspan mana juchayoq runata juchachasharanku. Chaymi Pilato niran: “¿Ima mana allintataq kay runari ruwaran? Noqaqa manan imatapas paypiqa tarinichu wañunanpaq jinaqa, chayrayku soq’achispalla kacharipusaq”, nispa (Lucas 23:22).

Chaywanpas runakunaqa astawanraqmi qapariranku: “¡Paytaqa k’aspipi warkuy!”, nispa (Mateo 27:23). Judío umallikunaq kallpachasqanmi paykunaqa loco jinaraq mañakusharanku mana juchayoq runata wañuchinankuta, arí, pisqa p’unchay ñaupaqllata Jerusalenpi rey jina chaskisqa runata wañuchinankutan mañakusharanku. Jesuspa discipulonkuna chaypi kasharanku chayqa, ch’inllachá kasharanku, mana reparachikuyta munaspa.

Pilatotaq manaña imatapas ruwayta atispa, aswanpas astawanraq ch’aqway jatarisqanta rikuspa, lliu runakuna rikushaqtin unuwan makinta maqchikuran, jinaspa niran: “Manan juchayoqchu kasaq kay runaq wañusqanmantaqa. Qankunamantañachá chayqa kanqa”, nispa. Chaymi runakuna niranku: “Chay runaq wañusqanmantaqa noqaykuñan wawaykupiwan yachakusaqku”, nispa (Mateo 27:24, 25).

Pilatoqa runakuna kusichiytan astawanqa  munaran, allin kaqta ruwananmantaqa. Chaymi Barrabasta kacharipuran, Jesustan ichaqa p’achanta ch’utichispa jasut’ichiran.

Jesusta sinchita jasut’ispañan soldadokunaqa Pilatoq wasinman apaykuranku. Chaypin Jesuspa muyuriqninman llapa soldadokunata juñuranku. Jinan astawan Jesusta maltrataranku. Chaypin kiskamanta coronata simp’aspa Jesuspa umanman churaranku, paña makinmantaq soqosta jap’iykachiranku, jinaspa reykunata jina juj munay p’achawan churaranku. Chaymantataq burlakuranku: “Judío runakunaq reynin, napaykuykiku”, nispa (Mateo 27:28, 29). Chaymantapas thoqaykuranku, ch’aqlakacharanku iman. Jap’ichisqanku soqoswanpas umapikama p’anaranku, chaywanqa astawanchá kiska coronaqa umanta k’iriran.

Chaykunataña Jesusta ruwasharanku chaypas, payqa qasillan kasharan. Chaywanmi Pilatoqa anchata admirakuran, chaymi runakunata niran: “¡Qhawariychis! Apampushaykichismi, paypiqa manan ima juchatapas tarimunichu”, nispa. Pilatoqa piensasharanchá chhayna khuyay maqasqata jasut’isqata Jesusta rikuspaqa runakuna khuyapayananta. Chaychá runakunata niran: “¡Qhawariychis kay runata!”, nispa (Juan 19:4, 5).

Chaytaqa respetowan khuyapayaywan imachá Pilatoqa niran. Payqa repararanchá Jesusqa askha k’irikunayoqña kashaspapas allin sayasqa thaj nisqalla kashasqanta.