14 de nisán viernes p’unchay tardepaqqa ñan Jesusqa wañusqaña kasharan, ladonpi kashaq suwakunan ichaqa manaraq wañurankuchu. Inti jaykuytaqa 15 de nisán sábado p’unchaymi qallarinan karan, chaymi Diospa kamachikuyninman jinaqa chay warkusqakunaq ayantaqa ‘chay kikin p’unchay p’ampananku’ karan (Deuteronomio 21:22, 23).

Chaymantapas viernes p’unchaytaq karan chayqa, sabadopaqmi alistakuna karan. Chaymi runakunaqa mijunata wayk’unanku karan otaq juj ruwaykunatapas ruwananku karan ama chaykunata sabadopi ruwanankupaq. 15 de nisán p’unchayqa samanapunin karan chay p’unchaypi mana levadurayoq t’anta mijuna fiesta qallarisqanrayku. Chay watapiqa sábado p’unchaypin tuparan 15 de nisán p’unchayqa, chaymi ‘jatun p’unchay’ kanan karan (Levítico 23:5, 6; Juan 19:31).

Chaymi judiokunaqa Pilatota niranku k’aspipi warkusqakunaq chakanta p’akinankupaq, chhaynapi ratolla wañunankupaq. Chakanku p’akisqa kaqtinqa manañan paykunaqa cuerponkuta wichayman tanqariyta atinkumanchu karan samarinankupaq. Jinan soldadokunaqa iskaynin suwakunaq chakanta p’akiranku, Jesustan ichaqa mana imanarankupaschu wañusqataña rikusqankurayku. Chhaynapin junt’akuran: ‘Manan juj tullullanpas p’akikunqachu’, niq profecía (Salmo 34:20).

 Chaymantataq juj soldado wañusqapunichus Jesús kasharan chayta yachananpaq lanzawan waqtanninta t’urpuran, jinan “yawarpiwan unupiwan phawarimuranpacha” (Juan 19:34). Chaywanmi junt’akuran: ‘T’urpusqanku qharita qhawarinqaku’, niq profecía (Zacarías 12:10).

Chaypin kasharan Arimatea llaqtayoq José sutiyoq qhapaq runapas, payqa jatun juntamanta jujninmi karan (Mateo 27:57). Payqa “Diospa gobiernontan suyakusharan”, “allin runataq chanin runataq karanpas”. Chaymantapas payqa Jesuspa discipulonmi karan, ichaqa manchakuranmi chayta jujkunaman willayta. Payqa manan jatun juntata yanapakuranchu Jesusta juzgashaqtinku (Lucas 23:50; Marcos 15:43; Juan 19:38). Paymi valorta jap’ispa Pilatomanta mañakuran Jesuspa cuerponta. Jinan Pilatoqa encargasqa capitanta Jesusmanta tapuran, wañusqaña kasqanta yacharuspataq Joseman entregaran cuerponta.

Chaymantan Joseqa Jesusta k’aspimanta uraykachispa sumaq lino telawan k’uyuran. Chaypin kashallarantaq ‘tutallapi Jesusman riq’ Nicodemopas (Juan 19:39). Paymi apamuran sumaq q’apaq mirrata “aloe” nisqakunawan chaqrusqata, 30 kilota jina (Roma llaqtapiqa 100 libra jinan chayqa karan). Chaykunayoq telakunawanmi Jesusta k’uyuranku, chhaynapi judiokunaq costumbrenman jina p’ampanankupaq.

Josepan karan qaqapi chayllaraq t’oqochisqan sepultura, chaymanmi churaranku Jesuspa cuerponta, juj jatun rumiwantaq punkuta wisq’aranku. Chaymantataq juj jatun rumita punkuman suchuchiranku. Usqhayllan chaytaqa ruwaranku sábado p’unchay qallarinanpaqña kashasqanrayku. Chaypin María Magdalenawan sullk’a kaq Santiagoq maman Mariapiwan yanapakushankuman karan. Chaymantan paykunaqa phawaylla wasinkuman riranku “sumaq q’apaq qorakunata sumaq q’apaq aceitekunatawan preparanankupaq”, chaytan Jesuspa cuerponman jich’aykunanku karan sábado pasayta (Lucas 23:56).

Sábado p’unchaytaq umalli sacerdotekuna fariseokunapiwan Pilatoman rispa niranku: “Señor, yuyariruykun chay llulla runa manaraq wañushaspa: ‘Kinsa p’unchaymantan kausarimpusaq’, nispa nisqanta. Chayrayku, kamachiy [...] sepulturata cuidamunankupaq, mana chayqa discipulonkunan suwaruspa llaqtapi runakunata ninkuman: ‘Wañusqamantan kausarichisqa kapun’, nispa, chhaynapin qhepa kaq llulla yachachikuyqa ñaupaq kaqmantapas aswan mana allinraq kanman”, nispa. Jinan Pilatoqa niran: ‘Soldadokunawan cuidachimuychis’, nispa (Mateo 27:63-65).

Domingo p’unchaytaq tutachallamanta María Magdalena, Santiagoq maman María, juj warmikunapiwan sumaq q’apaq kaqkunata aparikuspa Jesuspa sepulturanman riranku. Paykunaqa ninakusharankun: “¿Pitaq kunanri sepulturaq punkunmanta rumita suchurichipuwasunchis?”, nispa (Marcos 16:3). Chayman chayaqtinkun ichaqa sepultura kichasqa kashasqa, guardiakunapas manañan chaypiñachu kasqaku. Diospa angelninmi sepultura rumita kichasqa, chay raton terremotopas pasasqa.