Última cenapi apostolkunaq chakinta maqchisqanwanmi Jesusqa paykunata yachachiran ama uma kayta maskhanankupaq. Paykunaqa Dios sonqo runakunaña karanku chaypas, munasharankuraqmi uma kayta (Marcos 9:33, 34; 10:35-37). Chay munasqankun wajmanta rikukuran chay kutipipas.

Chay kutipin apostolkunaqa “sinchita discutiranku mayqenninkuchus kuraqpaq jap’isqa karan chaymanta” (Lucas 22:24). Chayta rikuspaqa maytachá Jesusqa llakikuran. ¿Imatan chaymanta ruwaran?

Paykunata phiñarikunanmantaqa aswanmi pacienciakuspa niran: ‘Nacionkunapi reykunaqa kamachisqanku runakunatan dueñochakunku, chay runakunata kamachiqkunataq ‘allin ruwaqkuna’ nisqa kanku. Qankunan ichaqa ama chhaynachu kankichis. ¿Mayqenmi kuraq kanman? ¿Mijuqchu icha serviqchu? Mijuqmi ¿riki? Chaywanpas noqaqa serviqniykichis jinan qankuna ukhupi kashani’, nispa (Lucas 22:25-27).

Apostolkunaqa mayninpi manaña allintachu imatapas ruwaqku chaypas, Jesuswanmi tukuy tiempo kasharanku pruebakunapiña tarikuqtinpas, chaymi Jesusqa paykunata niran: ‘Qankunawanmi acuerdota ruwani juj gobiernopaq, imaynan Yayaypas noqawan acuerdota ruwaran jinata’, nispa (Lucas 22:29). Paykunaqa tukuy sonqowanmi Jesusta qatikusharanku, chaymi Jesusqa chay acuerdota ruwaran, chhaynapi Diospa gobiernonpi reykuna kanankupaq.

Janaq pachapi reykunaña kananku karan chaypas, apostolkunaqa juchasapa runallaraqmi karanku, chaymi Jesusqa paykunata niran: “Satanasmi permisota mañakunña llapaykichista trigota jina suysunasuykichispaq”, nispa (Lucas 22:31). Chhaynapin Satanasqa paykunata ch’eqerichinan karan. Chaymi Jesusqa niran: “Llapaykichismi kunan tuta saqerpariwankichis, qelqasqan kashan: ‘Michiqtan k’irisaq, jinan t’aqamanta ovejakunaqa ch’eqeripunqa’”, nispa (Mateo 26:31; Zacarías 13:7).

Jinan Pedroqa niran: “Llapankuña saqerparisunkiku chaypas, noqaqa manapunin saqerparisaykichu”, nispa (Mateo 26:33). Jinaqtinmi Jesusqa payta niran: ‘Manaraq iskay kutita gallo waqashaqtinmi negawanki’ nispa. Jinaspa niran: “Noqan ichaqa rogakuniña iñiyniykipi ama pisipanaykipaq; kutimuspaykin wayqe-panaykikunata kallpachanki”, nispa (Lucas 22:32). Jinan Pedroqa nillarantaq: “Qanwan kuskaña wañunay kaqtinpas manapunin negasaykichu”, nispa (Mateo 26:35). Chhaynatan wakin apostolkunapas nillarankutaq.

Jinan Jesusqa llapankuta niran: “Juj chikan tiempollatawanñan qankunawan kasaq. Qankunaqa maskhawankichismi, ichaqa [...] maymanchus risaq chaymanqa manan jamuyta atiwaqchischu [...]. Juj mosoq kamachikuytan qoykichis: Jujkuna-jujkunawanmi munanakunkichis; imaynan noqapas munakuykichis, chhaynallatataqmi qankunapas jujkuna-jujkunawan munanakunkichis. Qankunapura munanakusqaykichispin lliupas yachanqaku discipuloykuna kasqaykichista”, nispa (Juan 13:33-35).

Jinan Pedroqa Jesusta niran: “Señor, ¿maytataq rinkiri?”, nispa. Jesustaq niran: “Maymanchus risaq chaymanqa manan qhepayta jamuyta atiwaqraqchu, chaymantañan ichaqa jamunki”, nispa. Pedrotaq niran: “Señor, ¿imanaqtintaq kunanri mana qhepaykita jamuyta atiymanchu? Noqaqa wañuymanraqmi qanraykuqa”, nispa (Juan 13:36, 37).

Chaymantataq Jesusqa discipulonkunata Galileapi predicaqta kachasqanmanta yuyarichispa niran: “Mana qolqeyoqta, mana qoqawayoqta,  mana usut’ayoqta ima qankunata kachaqtiy, ¿pisirasunkichischu imaykichispas?”, nispa. Paykunataq: “¡Manan!”, niranku. Jinan Jesusqa niran: “Kunan ichaqa qolqeykichispas qoqawaykichispas kaqtinqa apakuychis, espadaykichis mana kanchu chayqa, jawa p’achaykichista vendespa jujta rantikuychis. Niykichismi: Noqamantan qelqakuran: ‘Payqa juchallikuqkunawanmi yupasqa karan’, nispa, chayqa junt’akunanmi, junt’akushanñataqmi kanpas”, nispa (Lucas 22:35-37; Mateo 10:5, 9, 10).

Chaywanmi Jesusqa rikuchisharan juchasapa runakunawan kuska warkusqa kananta, wañusqan qhepamantaq paypa discipulonkuna qatikachasqa kanankutawan. Jinan paykunaqa niranku: “Señor, ¡qhawariy! Kaypi iskay espadakuna kashan”, nispa. Jesustaq niran: “Chaylla kachun”, nispa (Lucas 22:38). Chay espadakunawanmi Jesusqa chay tuta juj importante yachachikuyta paykunaman qonan karan.