Lunes tardentan Jesusqa Jerusalenmanta Olivos orqoq ladonpi kaq Betania llaqtachaman kutimpuran. Payqa Lazaroq, Mariaq, Martaq wasinpichá alojakuran.

Paqaristintaq 11 de nisán martes p’unchaypi Jesusqa discipulonkunapiwan wajmanta Jerusalenman puririranku. Chay kutillatawanñan Jesusqa templota rinan karan runakunata yachachiq, chay qhepamanqa Pascua fiestapi apostolninkunawanmi última cenata ruwanan karan, chaymantataq juzgasqa kaspa wañuchisqa kanan karan.

Jerusalenman rishaqtinkun Pedroqa lunes p’unchaypi Jesuspa ñakasqan sach’ata rikuran, jinaspa Jesusta niran: “¡Yachachikuq, qhawariy! Ñakasqayki higos sach’a ch’akirapusqa”, nispa (Marcos 11:21).

Jinan Jesusqa niran: “Cheqaqtan niykichis: Sichus iñinkichis, manataq iskayankichischu chayqa, manan kay higos sach’awan imatachus ruwasqayta jinallachu ruwankichis, aswanmi kay orqotapas: ‘Jatarispa lamar-qochaman wijch’uykukuy’, niqtiykichisqa wijch’uykukunqa. Iñiywanchus tukuy imatapas mañakunkichis chayqa, chaskinkichismi”, nispa (Mateo 21:21, 22). Juj kutipipas ñan rimaranña iñiywan orqokunataraq suchurichiymanta (Mateo 17:20).

Chay sach’ata ch’akichisqanwanmi Jesusqa discipulonkunaman allinta entiendechisharan Diospi iñinanku kasqanta. Chaymi niran: “Tukuy imatapas mañakuspaykichisqa chaskiwaqchispas jinataña iñiychis, jinan chaskinkichis”, nispa (Marcos 11:24). Chay nisqanqa ancha allinpunin karan Jesuspa llapa discipulonkunapaq. Ichaqa apostolkunapaqmi aswan allinqa karan, paykunan sinchi llakikuypi tarikunanku karan chay p’unchaykunapi. ¿Imatawanmi Jesús rikuchisharan chay sach’ata ch’akichisqanwan?

Chaywanmi rikuchisharan Israel nación chinkachisqa kananta. Israel runakunaqa chay sach’a jinan qhawarinallapaq sumaq rikukuqku, paykunaqa tukuy sonqowanpas Diosta kasukushankuman jinan rikukuqku, ichaqa mana iñiyniyoqmi karanku, manataqmi ima allintapas ruwaqkuchu, chaymi mana Diospa Churinpipas iñirankuchu. Chayraykun paykunaqa chay sach’a jina tarikunanku karan.

Jerusalén llaqtaman chayaqtinkun Jesusqa imaynan ruwallaqpuni jinata temploman riran yachachiq. Chaypin umalli sacerdotekuna juj umalli runakunapiwan payman achhuykuranku, jinaspa ñaupaq p’unchaypi imachus ruwasqanta yuyarispanku niranku: ‘¿Ima autoridadwantaq qanri chaykunata ruwanki? ¿Pin autoridadta qorasunki chaykunata ruwanaykipaq?’, nispa (Marcos 11:28).

Jinan Jesusqa niran: “Noqapas jujta tapullasaykichistaq. Kutichiwankichis chayqa, noqapas nillasaykichistaqmi ima autoridadwanchus kaykunata ruwashani chayta. ¿Pin Juanman atiyta qoran bautizananpaq? ¿Dioschu icha runakunachu? Niwaychis”, nispa. Jinan paykunapura ninakuranku: “‘Diosmi’ nisunchis chayqa, ‘¿imaraykun mana creerankichischu?’ niwasunchá riki. ‘Runakunan’ nisunchis chayqa, imaraqchá pasawasunman”, nispa. Paykunaqa manchakurankun runakunata “llapallanku Juanta profetapaqpuni jap’isqankurayku” (Marcos 11:29-32).

Jinan chay umallikunaqa mana ima niyta atispa niranku: “Manan yachaykuchu”, nispa. Jesustaq niran: “Chhaynaqa manan noqapas nisaykichischu ima autoridadwanchus kaykunata ruwani chayta”, nispa (Marcos 11:33).