30 watapi Pascua fiesta qhepatan Jesusqa discipulonkunapiwan Jerusalenmanta ripuranku Judea provincia ladoman. Chaypin askha runata bautizaranku. Bautizaq Juanpas wata jinañan runakunata Jordán mayupi bautizasharan. Paywanmi wakin discipulonkunapas kasharan.

Manan Jesuspunichu runakunataqa bautizaq, aswanpas discipulonkunatan payqa kamachiq bautizanankupaq. Chhaynaqa kasqan tiempopin Jesuspas, bautizaq Juanpas juchankumanta pesapakuq judío runakunata yachachisharanku (Hechos 19:4).

Juanpa discipulonkunan ichaqa mana kusisqachu kasharanku Jesuspa imachus ruwasqanwan, chaymi Juanta niranku: “Yachachikuq, Jordán mayu chimpapi qanwan [kashaq] runan kunanqa bautizashan, llapa runakunataqmi payman rishanku”, nispa (Juan 3:26). Juanmi ichaqa kusikuran Jesuspa ruwasqanwan, munarantaqmi discipulonkunapas kusikunankuta, chaymi paykunata niran: “Qankuna kikiykichismá riki uyarirankichis: ‘Manan noqaqa Cristochu kani, aswanpas paypa ñaupanta kachamusqallan kani’, nispa nisqaytaqa. Noviaq dueñonqa novion. Chaywanpas novioq amigonqa ladonpi sayaykuspan payta uyarin, jinaspa anchatapuni kusikun novioq kunkanta uyarisqanrayku. Chayraykun noqapas anchatapuni kusikuni”, nispa (Juan 3:28, 29).

Ñaupaq killakunallapin Juanqa novioq amigon jina anchata kusikuran discipulonkunata Jesusman reqsichispa. Chaymi wakinqa Jesuspa discipulonkuna kapuranku, qhepamanmi paykunaqa santo espirituwan bautizasqa kananku karan. Juanqa llapan discipulonkunapas Jesusta qatikapunankutan munaran, chayraykutaqmi predicasharanpas. Arí, payqa lliu runa Cristota chaskinankupaqmi predicaran. Chaymi payqa niran: “[Jesusqa] yapakushallanqan, noqataq ichaqa pisiyapushallasaq”, nispa (Juan 3:30).

Apóstol Juanpas ancha importante willakuytan Jesusmanta willaran, niranmi: “Wichaymanta jamuqqa lliumantapas aswan kuraqmi. [...] Yayaqa munakunmi Churita, chaymi tukuy imatapas payman jap’ichin. Pipas Churipi iñiqqa wiñay kausayniyoqmi kanqa, pipas Churita mana kasukuqtaq ichaqa mana kausayta rikunqachu, aswanmi Diospa phiñakuynin paypi kashallanqa”, nispa (Juan 3:31, 35, 36).

Chaykuna qhepallamanmi rey Herodes bautizaq Juanta carcelman wisq’achiran. Chay reymi wayqen Filipoq esposan Herodiaswan casarakapusqa. Chaymi Juanqa lliu runaq qayllanpi payta juchachasqa chhayna qhelli juchata ruwasqanmanta. Chaymi Herodesqa Juanta carcelman wisq’achiran. Chayta yachaspan Jesusqa discipulonkunawan kuska “Galileaman riran” (Mateo 4:12; Marcos 1:14).