Gustasunkichá allin willakuykunata uyariyqa. Chaymi qanpaq lliu familiaykipaqwan apamushayku ancha allin willakuykunata.

Chay willakuykunaqa Bibliapin tarikun. Chaytan kamaqninchis Jehová Diosqa ñaupa tiempokunapiraq qelqachiran. Kay libropin willakunqa Bibliapi tawa librokunamanta. Chaykunapin tarikun llapanchispaq ancha allin willakuykuna. Chay librokunan kaykuna: Mateo, Marcos, Lucas, Juan ima. Chaykunaqa qelqaqninpa sutintan apanku.

Chay tawantin librokunaq willasqanman jinaqa, Jesustan Diosqa kay pachaman kachamuran salvasqa kananchispaq, paytan ajllaran janaq pacha gobiernonpi rey kananpaq, paytaqmi llapa iñiqkunaman askha bendicionkunata apamunqa. Chay willakuykunaqa ancha allinmi ¿riki? (Marcos 10:17, 30; 13:13.)

¿Imanaqtintaq Diosri tawa librokunata qelqachiran Jesuspa imachus ruwasqanmanta, imatachus yachachisqanmantapas?

Allinninchispaqmi chaytaqa ruwaran. Juj ejemplowan chayta allinta entiendesunchis. Tawa runakunan ancha allin yachachikuq runata uyarishankuman, jujninmi kanman impuesto cobraq, jujtaq kanman médico, jujtaq kanman chay yachachikuqpa ancha confianza amigon, juj kaqtaq kanman juj wayna. Tawantinkun kanman sut’inllata willaq runakuna. ¿Kaqllatachu paykuna chay yachachikuqpa yachachisqanmanta, ima ruwasqanmantapas qelqankuman? Manan ¿riki? Aswanpas imaynatachus imatapas qhawarisqankuman jinachá qelqankuman. Tawantinkuq qelqasqankuta leespaqa aswan allintachá yachasunman chay yachachikuqmantaqa, ichaqa jujlla imatapas qelqanman karan chayqa, manachá llapantachu imamantapas qelqanman karan. Chayraykun Jehová Diosqa tawa librokunata Jesusmanta qelqachiran.

Astawan yachasunchis chay ejemplo churasqanchismanta. Chay impuesto cobraq runaqa judío runakunata astawan yanapayta munanman chayqa, chay runakunapaq jinan imatapas qelqanman ¿riki? Médico kaq runari, ¿imamantataq  astawan qelqanman? Chay yachachiq imaynatachus onqosqakunata qhaliyachisqanmantan ¿riki? Chhaynaqa manan chay impuesto cobraq jinachu imatapas willanman, otaq jujniray ordenpi willanman. Chay yachachikuqpa confianza amigonpas chay yachachikuq imayna sonqoyoq, imayna runa kasqanmantachá astawanqa qelqanman. Chay wayna kaqtaq imatapas pisillapi willanman. Tawantinkuq willasqanpas cheqaqmi kanman, ichaqa jujniraymantan imatapas willankuman. Chay tawa librokunapas chhaynallataqmi, sapankan jujniraymanta allinta willawasun Jesusmanta.

Mateo, Marcos, Lucas, Juan librokunaqa sapankanmi willan ‘Jesucristomanta allin willakuykunata’ (Marcos 1:1). Chaywanpas chay allin willakuykunaqa kaqllamantan willakun tawantin libropipas.

Askha runakunan chay librokunata tupanachispa jujllaman tukuchiyta munaranku. Jujninmi karan Taciano sutiyoq runa, paymi Jesuspa jamusqan qhepata 170 watapi jina Diatessaron nisqa librota qelqaran, chaypin juñuran chay tawa librokunaq willasqanta.

Kay libropas jujllamanmi juñun chay tawa librokunata, ichaqa aswan allin ruwasqan kashan. Ñataq junt’akunña Jesuspa willasqan askha profeciakunapas ejemplokunapas chayqa, aswan allintan entiendekun paypa ruwasqankunata, ima ordenpichus imapas pasaran chaytapas. Arqueólogo runakunaq imaymana tarisqankupas yanapanmi chaykunata entiendenapaq. Ichaqa wakin willakuykuna ima ordenpichus pasanman karan chaytaqa manan allintapuniqa yachakunchu, chaywanpas kay libroqa entiendekunanpaq jinan llapanta willan, imaynachus imapas kanman karan chayman jina.

Kay librota leesqaykiman jina yuyariy imapaqchus Bibliapi chay tawa librokuna qelqakuran chayta. Chaytan Jesús rikuchiran apóstol Tomasman: “Noqan kani ñanpas, cheqaq kaqpas, kausaypas. Noqallantapunin pipas Yayamanqa chayanqa”, nispa nisqanpi (Juan 14:6).

Jesuspa yanapaynillanwanmi pipas Jehová Diosmanqa achhuykusunman mañakuypi, payllawanmi Dioswanpas allipunakapusunman (Juan 16:23; Romanos 5:8). Arí, payraykullan Diospa chaskisqanqa kasunman. Chayraykun Jesustaqa “ñan” nispa nikun.

Jesustaqa “cheqaq kaq” nispan nikullantaq. Chhaynatan nikun cheqaq kayman jina rimasqanrayku, chayman jina kausasqanraykupiwan. Payqa askha profeciakunatan junt’aran, llapan chay profeciakunan ‘Jesuswan “arí” nisqa kapuran’ (2 Corintios 1:20; Juan 1:14). Chay profeciakunan rikuchiwanchis Jesusllawanpuni Diospa munaynin junt’akusqanta (Apocalipsis 19:10).

¿Imanaqtinmi Jesusta “kausay” nikun? Noqanchisrayku wañusqanwan ‘cheqaq kausayman’ aypachiwasqanchisraykun. Arí, noqanchisrayku vidanta, yawarninta ima qosqanwanmi payqa ‘wiñay kausayman’ chayachiwasun (1 Timoteo 6:12, 19; Efesios 1:7; 1 Juan 1:7). Chaymantapas payqa mana yupay atiy wañusqakunatan kay pachapi paraisoman kausarichimpunqa, chhaynapin “kausay” kallanqataq (Juan 5:28, 29).

Chhaynaqa llapanchismi allinta yachananchis Jesusmanta. Paymi “ñanpas, cheqaq kaqpas, kausaypas”.