¿IMA noticiakunamanta yachanki periodicota leespa, televisionta qhawaspa otaq radiota uyarispapas? ¡Sinchitan uyarikun millay ruwaykunamanta, hatun maqanakuykunamanta, terrorismo nisqamantapas! Kunanqa yuyaykuy sasachakuyniykikunapi. Yaqapaschá sinchita llakikushanki familiayki otaq amigoyki onqosqanmanta otaq wañupusqanmantapas. Allin runa Job hinapaschá ‘khuyay-khuyay llakipi’ tarikunki (Job 10:15).

Tapukunkipaschá:

• ¿Kaytachu Dios munaran ñoqapaq llapa runakunapaqpas?

• ¿Maypin tariyman yanapayta sasachakuyniykunata atipanaypaq?

• ¿Hayk’aqllapas kanmanchu thak kawsay?

Biblian chay tapuykunaman allinta kutichin.

“Diosmi paykunaq ñawinkumanta tukuy weqeta pichanqa, manan wañuypas kanqañachu, manallataqmi llakikuypas, waqaypas, nanaypas kanqañachu.” (Apocalipsis 21:4)

“Wist’ukunapas taruka hinaraq p’itanqa.” (Isaías 35:6)

“Ñawsakunapas qhawarinqa.” (Isaías 35:5)

 ‘Aya p’ampanakunapi lliw [yuyarisqa] kaqkunan [...] kawsarimpunqaku.’ (Juan 5:28, 29)

“Manan mayqellanpas: ‘Onqosqan kani’, ninqachu.” (Isaías 33:24)

‘Askhallañan trigo [otaq mikhuykuna] kanqa.’ (Salmo 72:16)

Ñawpaq paginakunapi rikusqaykiqa manan mosqoyllachu. Diosmi prometen Bibliataqmi willan imayna hunt’akunanta.

Bibliaqa manan chayllatachu yachachin. Yachachillantaqmi sumaq kawsayta. Yuyaykuy sasachakuyniykikunapi llakikuyniykikunapipas. Yaqapaschá llakikushanki qolqemanta, familiaykimanta, onqoyniykikunamanta otaq munakusqayki runaq wañupusqanmanta. Biblian yanapawanchis chay sasachakuykuna atipayta, qatimuq tapuykunaman kutichispataq sonqochawanchis:

• ¿Ima rayku ñak’arinchis?

• ¿Imaynata atipasunman sasachakuyninchiskunata?

• ¿Imatan ruwasunman familiapi aswan kusisqa kawsanapaq?

• ¿Iman sucedewanchis wañupuqtinchis?

• ¿Munakusqanchis wañupuq runakunawan hayk’aqllapas tupasunmanchu?

• Diosqa hunt’anqapunin promesanta, ¿imaynapi chayta yachanchis?

 Kay qelqa leesqaykiwanmi rikuchinki Bibliaq yachachisqanmanta yachay munasqaykita. Kay libron yanapasunki. Sapanka parrafopaq tapuykuna kashan. Jehová Diospa testigonkunaqa Bibliamanta yachachinku tapuywan kutichiywan, chhayna yachachisqankun millonninpi runakunata yanapan kusichintaq, munaykumanmi chhayna yachachisqankuwan kusikunaykita. Biblia imatapunin yachachisqanta yachanaykipaq kallpachakusqaykitan Dios saminchanqa.