Pachantinpin runakuna partidonkurayku maqanakushanku.

•   México nacionpin 39 politicokunata wañuchirqanku, chay jinaqa manan jayk’aqpas pasarqanchu; chaymantapas eleccionespin imaymana mana allinkuna pasarqan, chaykunaqa pasarqan 2023, 2024 watakunapin.

•   Europa ladopipas imaymana mana allinkunan pasarqan runakuna gobiernokunawan mana acuerdopichu kasqankurayku. Ejemplopaq, Eslovaquia nacionmanta primer ministrotan wañuchiyta munarqanku, chaymi pasarqan 2024 watapi 15 mayo p’unchaypi.

•   Estados Unidospipas expresidente Donald Trumptan iskay kutipiña yaqa wañuchirqanku, último kaqmi pasarqan 2024 watapi 15 setiembre p’unchaypi. Chaykunata rikuspan runakunaqa manchasqa llakisqa kashanku.

 ¿Imaraykun tukuy chaykuna pasashan? ¿Jayk’aqllapas chaykuna tukukunqachu? ¿Imaninmi Biblia chaymanta?

 Unay watakuna ñaupaqtaraqmi Biblia nirqan runakuna mana acuerdopi kasqankurayku maqanakuykuna kananta, chayqa pasanan karqan “tukukuy p’unchaykunapin”.

•   “Tukukuy p’unchaykunataqa manchakuy sinchi sasa tiempokunan chayamunqa. Runakunan kanqa paykuna kikinkuta munakuqkuna, [...] mana agradecekuqkuna, jujkunapaq mana junt’aq kaqkuna, [...] mana uyakuq k’ullukuna, [...] sinchi k’araq sonqokuna, [...] traicionerokuna, tercokuna, sinchita jatunchakuqkuna” (2 Timoteo 3:1-4).

 Chaymantapas Bibliaqa ñaupaqmantañan nirqan runakuna gobiernokuna contra sayarinankuta, partidonkurayku ch’aqwata jatarichinankutapas (Lucas 21:9). Ichaqa tukuy chaykunaqa manan wiñaypaqchu kanqa.

 Biblian willan Diosninchis kay pachapi llapa gobiernokunata juj gobiernowan cambiananta, jinaspa paypa gobiernonta churananta.

•   “Janaq pacha Diosmi juj gobiernota sayarichinqa, [...] chay gobiernon llapa gobiernokunata ñut’uspa chinkachipunqa, jinaspa chay gobiernollaña wiñaypaq kapunqa” (Daniel 2:44).

 Diospa gobiernonmi pachantinman thaj kausayta apamunqa, juj nisqallataqmi llapanchispas kausasun.

•   Chay gobiernopi kamachikuqqa Jesusmi, paytan sutichakun “Thaj Kaywan Kamachikuq” nispa. Payqa makillan qhawashanqa thaj kay kashanchus icha manachus chayta (Isaías 9:6, 7).

•   Chay gobiernota apoyaqkunaqa yachashankuñan thajpi kausayta. Paykunamantan Bibliaqa nin: “Espadankumantan yapuna rejakunata ruwakapunqaku, lanzankumantan ichhunakunata ruwakapunqaku. Manañan juj nacionqa juj nación contra jatarinqañachu, manañan maqanakuytapas yachanqakuñachu”, nispa (Isaías 2:3, 4).

 Astawan yachayta munanki chayqa “¿Imakunatan Diospa gobiernon ruwanqa?” nisqa yachachikuyta leey, chaymantapas qhaway ¿Iman Diospa gobiernon? nisqa videota.