Santiago 1:1-27
1 Diospa, jinallataq Señor Jesucristoq kamachin noqa Santiagon*+ napaykamuykichis qankuna lliupi ch’eqerisqa kaq chunka iskayniyoq ayllukunata:
2 Wayqellaykuna,* anchata kusikuychis ima pruebapiña tarikuspapas.+
3 Yachasqaykichis jina, iñiyniykichischus chhayna probasqa kanqa chayqa, allintan imatapas aguantankichis.+
4 Imaymanata aguantaspan qankunaqa allin preparasqa kankichis, chhaynapi tukuy imapipas junt’asqa kanaykichispaq, allinpuni kanaykichispaqwan, arí, mana imapas faltanasuykichispaq.+
5 Chayrayku, mayqenniykichismanpas yachayniyoq kay faltashasunkichis chayqa, Diosmanta mañakushallaychis,+ jinan Diosqa chay mañakusqaykichista qosunkichis.+ Payqa lliuman tukuy sonqowan askhatapuni qoq Diosmi, mana phiñarispataqmi payqa qon.+
6 Ichaqa iñiywanmi mañakuna,+ manan imamantapas iskayanachu.+ Pipas iskayaqqa lamar-qochapi wayraq aytikachasqan unu jinan kanman.
7 Chhayna runaqa manan imatapas suyananchu Jehová* Diosmantaqa.
8 Chaymantapas chhayna runaqa imamantapas iskayashallanmi,+ manataqmi tajyanchu ima ruwasqanpipas.
9 Wajcha iñiqmasiqa jatunchasqa kasqanmanta kusikuchun,+
10 qhapaqtaq k’umuykachisqa kasqanmanta kusikuchun.+ Qhapaqkunaqa t’ikakuna jinan chinkapunqaku.
11 Imaynan plantakunaqa inti lloqsimuqtin chay intiq ruphasqan naq’epun, t’ikankunapas urmapun, sumaq rijch’ayninpas chinkapun, chhaynatan qhapaqkunapas qhapaq kaykuna maskhasqankupi chinkapunqaku.+
12 Kusisqan pruebata aguantaq runaqa,+ chhayna probasqa kasqanraykun payqa kausay coronata chaskinqa,+ chaytan Jehová* Diosqa tukuy tiempo munakuqninkunaman prometerqan.+
13 Ichaqa pipas pruebapi tarikuspaqa ama nichunchu: “Diosmi pruebaman churashawan”, nispaqa. Imaynan Diosqa mana imawanpas tentasqachu kanman, chhaynallataqmi payqa mana pitapas mana allinkunawanqa pruebaman churanmanchu.
14 Aswanpas sapankan pruebamanqa churakun imachus munasqanwan tentasqa kaspa sonqonta suwachikuspa.+
15 Wiñaruspataq chay munapayayqa juchata paqarichin, juchataq wañuyman apan.+
16 Munakusqay wayqellaykuna,* ama engañakuychischu.
17 Tukuy allin kaqkunapas tukuy junt’asqa kaqkunapas janaq pachamantan jamun,+ arí, cielopi k’anchaykunaq Taytanmantan jamun.+ Payqa manan llanthu jinachu kayman jaqayman cambian.+
18 Payqa munayninman jinan cheqaq kaq simiwan paqarichiwarqanchis,+ chhaynapi kamasqankunamanta ñaupaq ajllasqakuna kananchispaq.+
19 Munakusqay wayqellaykuna,* kayta allinta yachaychis: Llapaykichispas allin uyariqmi kanaykichis,+ manataqmi comuntachu rimanaykichis, nitaqmi usqhaylla phiñakuqchu kanaykichispas;+
20 runaq phiñakuyninqa manan Diospa chanin kaynintachu apamun.+
21 Chayrayku, qankunamanta wijch’upuychis tukuy qhelli kaqta, tukuy millay kaqtawan;+ jinaspa tukuy llamp’u sonqo kaywan chaskikushallaychis qankunapi churasqa simita, chhaynapi chay simi salvanasuykichispaq.
22 Ichaqa, ama yanqa uyariqkunallachu kaychis, aswanpas kasukuychispuni Diospa simintaqa,+ amataq yanqa piensaykunawanpas engañachikuychischu.
23 Pipas Diospa siminta uyarishaspa mana kasukuq runaqa+ espejopi uyanta qhawakuspa imaynachus kasqanta qonqapuq runa jinan kanman.
24 Arí, chay runaqa uyanta qhawakuspan ripun, ripuspa jinataqmi qonqarapun imaynachus kasqanta.
25 Ichaqa pipas tukuy yuyaywan qhawan kacharichisqa kayman apaq junt’asqa kamachikuy simita,+ jinaspa chayman jina purin chayqa, Diospa siminta kasukuq runan chay runaqa, manataqmi yanqa uyariqllachu, chhayna runaqa tukuy ima ruwasqanpin kusisqa kanqa.+
26 Pipas “Diosta adoraqmi kani” nishaspa qallunta mana watanmanchu chayqa,+ pay kikintan engañakushanman,* yanqapaqtaqmi Diostapas adorashanman.
27 Taytanchis Diospa qhawarisqanman jinaqa, ch’uya mana ima qhelliyoq adorayqa* ñak’ariypi tarikuq+ wajcha wawakunata+ viudakunatawan cuidaymi,+ kay pacha kausaywanpas mana qhellichakuymi.+
Uraypi willakuykuna
^ Griego rimaypiqa “Jacobon” ninmi.
^ Mayninpiqa warmipaq qharipaqwanmi Bibliapiqa “wayqeykuna” nispa nin.
^ Qhaway “Astawan yachanapaq A5” nisqata.
^ Qhaway “Astawan yachanapaq A5” nisqata.
^ Mayninpiqa warmipaq qharipaqwanmi Bibliapiqa “wayqeykuna” nispa nin.
^ Mayninpiqa warmipaq qharipaqwanmi Bibliapiqa “wayqeykuna” nispa nin.
^ Griego rimaypiqa “sonqontan engañashanman” ninmi.
^ Chaypiqa “religionqa” nillanmantaqmi.
