Juan 8:12-59
8 12 Jesusqa nillarqantaqmi: “Noqan kay pachapaq k’anchayqa kani.+ Pipas qatikamuwaqqa manapunin tutayaqpi purinqachu, aswanmi kausayman apaq k’anchayta chaskinqa”,+ nispa.
13 Chaymi fariseokunaqa payta nirqanku: “Qanqa qanllamantamá rimashanki, ¿chaychu rimasqayki cheqaq kanman?”, nispa.
14 Jinan Jesusqa paykunata nirqan: “Noqa kikiymantaña rimani chaypas, rimasqayqa cheqaqmi, noqaqa yachanin maymantachus jamuni chayta maymanchus rishani chaytapas.+ Qankunan ichaqa mana yachankichischu maymantachus jamuni chayta ni maymanchus rishani chaytapas.
15 Qankunaqa runakunaq imachus piensasqanman jinallan juzgankichis,+ noqan ichaqa mana pitapas juzganichu.
16 Juzgani chayqa chanintan juzgani, noqaqa manan sapallaychu kashani, aswanpas kachamuwaqniy janaq pacha Taytan noqawanqa kashan.+
17 Kamachikuy simi chaskisqaykichispipas: Iskay testigokunachus willanku chayqa, cheqaqmi chay willasqankuqa,+ nispan nishan ¿riki?
18 Manan noqallachu noqamantaqa willani, kachamuwaqniy janaq pacha Taytapas willallantaqmi noqamantaqa”,+ nispa.
19 Jinan paykunaqa nirqanku: “¿Maypitaq kashan Taytaykiri?”, nispa. Jesustaq nirqan: “Qankunaqa manan reqsiwankichischu, manallataqmi Taytaytapas reqsinkichischu.+ Reqsiwankichismanchus chayqa, reqsiwaqchischá Taytaytapas”,+ nispa.
20 Chaykunataqa rimarqan templopi qolqe churanakunaq kasqan partepi+ yachachishaspan. Ichaqa manan pipas jap’irqanchu; manaraqmi wañunan tiempochu kasharqan.+
21 Wajmantan Jesusqa paykunata nillarqantaq: “Noqaqa ripusaqmi, qankunataq maskhawankichis, chaywanpas juchaykichispin wañunkichis.+ Maymanchus risaq chaymanqa manan jamuyta atiwaqchischu”,+ nispa.
22 Chaymi judiokunaqa ninakurqanku: “Kay runaqa wañuchikunqachu imaynataqri. ¿Imaraykutaq nishan: Maymanchus risaq chaymanqa manan jamuyta atiwaqchischu, nispari?”, nispa.
23 Jinan Jesusqa paykunata nirqan: “Qankunaqa uraymantan kankichis, noqan ichaqa wichaymanta kani.+ Qankunaqa kay pachamantan kankichis, noqan ichaqa mana kay pachamantachu kani.
24 Chayraykun noqaqa nirqaykichis: Juchaykichispin wañunkichis, nispa. Manachus creenkichis noqaqa jamunan karqan chay kasqaypi chayqa, juchaykichispin wañunkichis”, nispa.
25 Jinan paykunaqa nirqanku: “¿Pitaq kankiri?”, nispa. Jinaqtinmi Jesusqa paykunata nirqan: “Imapaqñas qankunataqa rimapayaykichispas.
26 Imaymanakunatan qankunamanqa ninay kashan, imaymanakunatataqmi juzganaypas kashan. Kachamuwaqniyqa cheqaq rimaqpunin, imakunatachus paymanta uyarisqaytataqmi kay pachapiqa rimashani”,+ nispa.
27 Paykunaqa manan entienderqankuchu janaq pacha Taytamanta rimashasqanta.
28 Chaymi Jesusqa nirqan: “Maypachachus runaq Churinta warkunkichis+ chaypachañan yachankichis noqaqa jamunan karqan chaypuni kasqayta,+ manataq imatapas noqallamantachu ruwasqayta,+ aswanpas janaq pacha Taytaq yachachiwasqanman jinapuni kaykunataqa rimasqayta.
29 Kachamuwaqniyqa noqawanmi kashan, manan sapallaytachu payqa saqerpariwan, imatapas sonqonpaq jinapuni tukuy tiempo ruwasqayrayku”,+ nispa.
30 Chaykunata niqtinmi askha runakuna paypi iñirqanku.
31 Jinan Jesusqa paypi iñiq judiokunata nirqan: “Sichus yachachisqayta waqaychallankichispuni chayqa, cheqaqtapunin discipuloykuna kankichis,
32 reqsinkichistaqmi cheqaq kaqtapas,+ chay cheqaq kaqtaqmi kacharichisunkichis”,+ nispa.
33 Jinan jujkunaqa payta nirqanku: “Noqaykuqa Abrahanpa wawankunan kayku, manataqmi jayk’aqpas noqaykuqa piqpa kamachinpaschu karqayku. Chhaynaqa, ¿imaraykutaq qanri, kacharichisqan kankichis, nishanki?”, nispa.
34 Jesustaq paykunata nirqan: “Cheqaqtapunin niykichis: Pipas juchata ruwaqqa juchaq kamachinmi.+
35 Jinaspapas kamachiqa manan wiñaypaqchu wasipi qhepakun, churin ichaqa wiñaypaq qhepakun.
36 Chayrayku, sichus Churi kacharichisunkichis chayqa, cheqaqtapunin kacharichisqa kankichis.
37 Noqaqa yachanin Abrahanpa wawankuna kasqaykichista, ichaqa wañuchiytan munashawankichis, yachachisqayta mana jap’ikusqaykichisrayku.
38 Taytaywan kashaspa imachus rikusqaykunamantan noqaqa rimani;+ qankunataq taytaykichismanta imachus uyarisqaykichista ruwankichis”, nispa.
39 Paykunataq nirqanku: “Taytaykuqa Abrahanmi”, nispa. Jinan Jesusqa paykunata nirqan: “Abrahanpa wawankunachus kawaqchis chayqa,+ Abrahanpa ruwasqankunatachá ruwawaqchis.
40 Noqaqa Diosmanta uyarisqay cheqaq kaqtan willaykichis,+ qankunataq ichaqa wañuchiyta munashawankichis. Abrahanqa manan jayk’aqpas chaytaqa ruwanmanchu karqan.
41 Qankunaqa taytaykichispa ruwasqankunatan ruwashankichis”, nispa. Paykunataq nirqanku: “Noqaykuqa manan qhelli juchamantachu* naceyku, jujllan Taytaykuqa, payqa Diosmi”, nispa.
42 Jinan Jesusqa paykunata nirqan: “Dioschus Taytaykichis kanman chayqa, munakuwankichismanchá;+ noqaqa Diosmantan jamuni, chaymi kaypi kashani, manataqmi noqallamantachu jamuni, aswanpas paymi kachamuwan.+
43 Qankunaqa manan yachachisqayta chaskikuyta munankichischu, chaymi rimasqaytaqa mana entiendenkichischu.
44 Qankunaqa Saqraq wawankunan kankichis, chay taytaykichispa munaynintataqmi ruwaytapas munankichis.+ Payqa llullakuyta qallarisqanmantapachan runa wañuchiq karqan;+ t’aqakapurqanmi cheqaq kaqmantapas, cheqaq kaq paypi mana kasqanrayku. Llullakuspaqa imaynachus kasqanman jinan riman llulla kasqanrayku llullakunaq taytan kasqanrayku ima.+
45 Noqan ichaqa cheqaqllata imatapas nishaykichis, qankunataq mana creewankichischu.
46 ¿Mayqenniykichistaq razonwan niwankichisman: Qanqa juchasapan kanki, nispa? Chhaynaqa, ¿imaraykutaq cheqaq kaqta rimashaqtiyri mana creewankichischu?
47 Pipas Diosmanta kaqqa uyarinmi Diospa nisqankunata.+ Qankunan ichaqa mana Diosmantachu kankichis,+ chaymi mana uyarinkichischu paypa nisqankunataqa”, nispa.
48 Jinan judiokunaqa Jesusta nirqanku: “Noqaykuqa sut’illantan nishayku: Qanqa Samaria runan kanki,+ supayniyoqtaq kashankipas,+ nispaqa ¿riki?”, nispa.
49 Jesustaq paykunata nirqan: “Noqaqa manan supayniyoqchu kashani, aswanpas noqaqa Taytaytan jatunchashani, qankunataq ichaqa noqata pisichashawankichis.
50 Manan noqachu jatunchasqa kaytaqa munani,+ jujmi jatunchasqa kanaytaqa munan, paytaqmi juezqa.
51 Cheqaqtapunin niykichis: Pipas simiyta kasukuqqa manapunin jayk’aqpas wañunqachu”,+ nispa.
52 Jinan judiokunaqa payta nirqanku: “Kunanqa allintan yachayku supayniyoqpuni kasqaykita. Abrahanpas profetakunapas wañurqankumá riki; qantaq ichaqa nishanki: Pipas simiyta kasukuqqa manan jayk’aqpas wañunqachu, nispa.
53 Qanqa manamá riki ñaupa taytayku Abrahanmanta aswan allinchu kanki; payqa wañupurqanmi profetakunapas wañupullarqankutaqmi. Chhaynaqa, ¿pin kani ninkitaqri?”, nispa.
54 Jinan Jesusqa nirqan: “Noqachus jatunchakuyman chayqa, jatunchakusqayqa manan imapaschu kanman. Diosniykun nisqaykichis Taytaymi noqataqa jatunchawan;+
55 qankunaqa manan payta reqsinkichischu,+ noqan ichaqa reqsini.+ Manan reqsinichu, niymanchus chayqa, qankuna jinachá llulla kayman; ichaqa reqsinin paytaqa, kasukunitaqmi simintapas.
56 Taytaykichis Abrahanqa maytan munarqan imakunatachus ruwanay karqan chayta rikuyta, chaypi piensaspan payqa anchata kusikurqan, rikurqantaqmi kanpas, chaywanmi payqa anchata kusikurqan”,+ nispa.
57 Chaymi judiokunaqa nirqanku: “Qanqa manamá pisqa chunka watallaykipipaschu kashanki, ¿chaychu Abrahanta rikuwaq karqan?”, nispa.
58 Jinan Jesusqa paykunata nirqan: “Cheqaqtapunin niykichis: Manaraq Abrahán kashaqtinqa ñan noqaqa karqaniña”,+ nispa.
59 Chayta niqtinmi runakunaqa rumikunata oqarirqanku Jesusta ch’aqenankupaq, Jesusmi ichaqa pakakurqan, jinaspa templomanta lloqsipurqan.
Uraypi willakuykuna
^ Qhaway Explicasqa simikuna nisqapi “Qhelli jucha” nisqata.
