Juan 7:1-52
7 Chay qhepatataq Jesusqa jinantin Galileapi purirqan imachus ruwananta ruwaspa, payqa manan Judeaman riyta munarqanchu chaypi judío umallikuna wañuchiyta munasqankurayku.+
2 Ichaqa ñan judío runakunaq Ch’ujlla Ruway Fiestanku chayamusharqanña.+
3 Chaymi wayqenkunaqa+ Jesusta nirqanku: “Judeaman riy, chaypi discipuloykikunapas imakunachus ruwasqaykita rikunankupaq.
4 Pipas llapa runakunaq reqsisqan kayta munaqqa manan imatapas pakallapiqa ruwanchu. Kaykunatataq ruwashanki chayqa, llapa runakunamanyá rikuchikuy”, nispa.
5 Wayqenkunaqa manan paypi iñirqankuchu.+
6 Jinan Jesusqa paykunata nirqan: “Tiempoyqa manaraqmi chayamunchu,+ qankunapaqmi ichaqa ima tiempopas allillan.
7 Runakunaqa manan imamantapas qankunataqa cheqnisunkichismanchu, noqatan ichaqa cheqnikuwanku, sinchi mana allin ruwasqankuta sut’iman orqosqayrayku.+
8 Qankunalla chay fiestamanqa riychis; noqaqa manaraqmi chay fiestamanqa riymanchu, manaraqmi tiempoy chayamunraqchu”,+ nispa.
9 Chaykunata paykunaman nispan Jesusqa Galileallapi qhepakurqan.
10 Wayqenkuna fiestaman risqanku qhepamanñan ichaqa paypas rillarqantaq, ichaqa pakallapin rirqan.
11 Judiokunaqa maskhasharqankun payta chay fiestapi “¿maytaq chay runari?” nispanku.
12 Runakunaqa imaymanatan paymanta pakallapi rimasharqanku. Wakinmi nisharqanku: “Payqa allin runan”, nispa. Wakintaq ichaqa nisharqanku: “Manan allin runachu, payqa runakunatan engañan”,+ nispa.
13 Ichaqa judío umallikunata manchakusqankuraykun mana pipas alayritaqa paymanta rimaqchu.+
14 Kuskan fiesta pasaqtinñan Jesusqa temploman wichaspa yachachiyta qallarirqan.
15 Jinan judío umallikunaqa sinchi admirasqa nirqanku: “¿Imaynapitaq kay runari Diospa simin qelqakunamanta yachan?+ ¡Payqa manamá riki yachachiqkunaq risqan escuelakunamanqa rirqanchu!”,+ nispa.
16 Jinan Jesusqa paykunata nirqan: “Yachachisqayqa manan noqaqchu, aswanpas kachamuwaqniypan.+
17 Pipas paypa munayninta ruwayta munaqqa reparanqan ima yachachisqaypas Diosmantachus+ icha noqallamantachus jamun chayta.
18 Pipas munasqanman jinalla rimaqqa jatunchasqa kaytan munashan, pipas kachamuqnin jatunchasqa kananta munaqmi+ ichaqa cheqaq rimaq, manataqmi paypiqa ima mana chaninpas kanchu.
19 Moisesmi kamachikuy simitaqa qorqasunkichis+ ¿riki? Chhaynaqa, ¿imanaqtintaq mana mayqenniykichispas kamachikuy simitari kasukunkichischu? ¿Imaraykutaq wañuchiytari munashawankichis?”,+ nispa.
20 Jinan runakunaqa nirqanku: “Supaychá qanmanqa jaykusunki. ¿Pitaq qantari wañuchiyta munashasunki?”, nispa.
21 Jinan Jesusqa paykunata nirqan: “Juj milagrotan samana p’unchaypi* ruwarqani, qankunataq chaywan admirasqa kashankichis.
22 Moisesmi qorqasunkichis qhari kay qarachata kuchunapaq kamachikuyta+ ¿riki? Chay kamachikuyqa manan Moisesmantapaschu jamun, aswanpas ñaupa taytaykichiskunamantaraqmi.+ Qankunaqa samana p’unchayña kaqtinpas kuchullankichismi qhari kay qarachataqa ¿riki?
23 Chhaynaqa samana p’unchaytawantaq qhari kay qarachata kuchunkichis, chhaynapi Moisespa chaskisqan kamachikuy simita mana p’akinaykichispaq chayqa, ¿imanaqtintaq noqapaqri chhaynaniraqtaraq phiñakunkichis juj runata samana p’unchaypi qhaliyachisqaymanta?+
24 Ama jawallanta qhawaspachu juzgaychis, aswanpas chaninta juzgaychis”,+ nispa.
25 Jinan Jerusalenpi tiyaq wakin runakunaqa ninakurqanku: “¿Manachu kayqa kashan wañuchiyta munasqanku runa?+
26 ¡Qhawariychis, lliu runakunaq rikusqanmi rimashan, manataq pipas imaninpaschu! Umallikunaqa paychá Cristoqa nishankuchu kanpas.
27 Noqanchisqa yachanchismá riki maymantachus kay runa kasqanta,+ Cristo jamuqtinmi ichaqa mana pipas yachanqachu maymantachus kasqanta”, nispa.
28 Jinan Jesusqa templopi yachachishaspa alto kunkawan nirqan: “Qankunaqa reqsiwankichismi, yachankichistaqmi maymantachus kasqaytapas. Noqaqa manan noqallamantachu jamuni;+ jinaspapas kachamuwaqniyqa cheqaqmi, manataqmi paytaqa reqsinkichischu.+
29 Noqan ichaqa reqsini,+ paypa sutinpi jamusqayrayku, paymi noqataqa kachamuwan”, nispa.
30 Jinan paykunaqa jap’iytapuni munasharqanku,+ ichaqa manan pipas jap’irqanchu. Manaraqmi paypa wañunan tiempochu karqan.+
31 Chhaynaña kaqtinpas askha runakunan paypi iñirqanku,+ nirqankutaq: “Paypunin Cristoqa kanman; manan pipas paypa ruwasqan milagrokunamanta astawanqa ruwanmanñachu”, nispa.
32 Fariseokunan runakunata uyarirqanku Jesusmanta chhayna rimashaqta, chaymi paykunaqa umalli sacerdotekunapiwan guardiakunata kacharqanku Jesusta jap’imunankupaq.
33 Jinan Jesusqa nirqan: “Juj chhikan tiempotawanraqmi qankunawan kasaq, chaymantaqa kachamuwaqniymanmi kutipusaq.+
34 Qankunaqa maskhawankichismi, ichaqa manan tariwankichischu. Maypichus kasaq chaymanqa manan jamuyta atiwaqchischu”,+ nispa.
35 Jinan judiokunaqa ninakurqanku: “¿Maymantaq kay runari riyta munashan, chaytaq manari tarisunmanchu? Icha, ¿griego runakuna ukhupi ch’eqerisqa judiokunamanchu riyta munashanpas griegokunaman yachachinanpaq?
36 ¿Imaninantataq nishan: Maskhawankichismi, ichaqa manan tariwankichischu. Maypichus kasaq chaymanqa manan jamuyta atiwaqchischu, nispa nisqanwanri?”, nispa.
37 Fiesta tukukuy jatun p’unchaypin+ Jesusqa sayarispa alto kunkawan nirqan: “Pipas ch’akichikuqqa noqaman jamuchun, jinaspa unuta ujachun.+
38 Pipas noqapi iñiqmantaqa, Diospa simin qelqapi nisqan jina: Kausay qoq unun* sonqon ukhumanta askhapuni t’ojamunqa”,+ nispa.
39 Chayta nispaqa santo espiritumantan* rimasharqan. Paypi iñiqkunaqa manaraqmi chay espirituta chaskisqakuchu,+ qhapaq atiyta Jesús manaraq chaskisqanrayku,+ ichaqa ñan chaskinankuña kasharqan.
40 Chayta uyarispan wakin runakunaqa nirqanku: “Kayqa jamunan karqan chay profetapunin kanman”,+ nispa.
41 Wakintaq nirqanku: “Payqa Cristopunin kanman”,+ nispa. Wakintaq ichaqa nirqanku: “Cristoqa manamá Galileamantachu jamunan karqan riki.+
42 ¿Manachu Diospa simin qelqaqa nishan: Cristoqa Davidpa mirayninmanta,+ Davidpa tiyasqan+ Belén ayllumantan jamunqa,+ nispa?”.
43 Chayraykun runakunaqa pay jawa yuyayninkupi t’aqanasqa kasharqanku.
44 Chaymi wakinqa jap’iytapuni munasharqanku, ichaqa manan pipas jap’irqanchu.
45 Chaymantataq guardiakunaqa umalli sacerdotekunaman fariseokunamanwan kutimpurqanku, paykunataq tapurqanku: “¿Maytaq chay runari? ¿Imaraykun mana apamurqankichischu?”, nispa.
46 Jinan guardiakunaqa nirqanku: “Manan jayk’aqpas uyarirqaykuchu pitapas pay jina yachachiqtaqa”,+ nispa.
47 Chaymi fariseokunaqa paykunata nirqanku: “¿Qankunapas engañarachikamunkichischu?
48 ¿Mayqellanpas umallikunamanta fariseokunamantapas paypi iñirqankuchu?+ Manan ¿riki?
49 Chay runakunan ichaqa kamachikuy simita mana reqsinkuchu, chaymi ñakasqa kanku”, nispa.
50 Paykunamanta jujnin, ñaupaqpi Jesusman riq Nicodemo sutiyoq runan paykunata nirqan:
51 “Kamachikuyninchisman jinaqa pitapas juzgananchispaqqa paytaraqmi ñaupaqta uyarinanchis, chhaynapi imachus ruwasqanta yachananchispaq ¿riki?”,+ nispa.
52 Jinan paykunaqa nirqanku: “¿Galileamantachu qanpas kanki? Allintayá estudiay qelqakunata, chhaynapin yachanki imaynas Galileamantaqa mana ima profetapas jamunanchu karqan chayta”, nispa.*
Uraypi willakuykuna
^ Qhaway Explicasqa simikuna nisqapi “Samana p’unchay” nisqata.
^ Griego rimaypiqa “kausay mayukunan” ninmi.
^ Chaypiqa “Diospa atiyninmantan” nillanmantaqmi. Qhaway Explicasqa simikuna nisqapi “Santo espíritu” nisqata.
^ Wakin allin reqsisqa ñaupa qelqakunapiqa manan rijurinchu 53 versiculoqa, jinallataq 8 capitulopi 1 versiculomanta 11 versiculokama.
