Joel 1:1-20
1 Kaymi Petuelpa churin Joelpa* willasqan, payqa Jehová Diosta uyarisqan qhepamanmi chayta willarqan.
2 “Umalliqkuna,* kayta uyariychis,kay jallp’api llapa tiyaqkuna, tukuy yuyaywan uyariwaychis.
¿Jayk’aqllapas kaykuna pasarqanchu?
¿Ñaupa taytanchiskunaq tiemponpipas kaykuna pasarqanchu?+
3 Wawaykichisman willaychis,wawaykichispas wawankuman willachunku,wawankupas jamuq miray runakunaman willachunku.
4 Rajrapu* langostaq* mana tukusqantan rafrayoq langosta mijurapun;+rafrayoq langostaq mana tukusqantataq mana rafrayoq langosta mijurapun;mana rafrayoq langostaq mana tukusqantataq tukuyta q’aruq langosta mijurapun.+
5 ¡Machaqkuna, rijch’ariychis,+ jinaspa waqaychis!
Vino ujaqkuna llapaykichis waqaychis,manan misk’i vinoqa qankunapaq kanñachu.+
6 Juj atiyniyoq nacionmi, mana yupay atina nacionmi+ llaqtayman junt’aykamun.
Kirunkunaqa leonpa kirunkuna jinaraqmi,+ qhaqllinpas* leonpa qhaqllin jinaraqmi.
7 Uvas sach’aytapas lliutan mijurapun, higos sach’aytapas k’aspillatañan saqeykapun.
Llapantan khaskarapun, juj ladomanmi wijch’upun.
K’allmankunapas yuraq k’aspin kapushan.
8 Qhasqa p’achawan churakuspa khuyayta waqaq sipas jina qankunapas waqaychis.
Payqa novionta* chinkachispan khuyayta waqan.
9 Manañan jak’u ofrendatapas+ ni vino ofrendatapas+ Jehová Diospa wasinmanqa apankuñachu.
Jehová Diospa kamachin sacerdotekunaqa khuyay llakisqan kashanku.
10 Chajrakunapas ch’usaqyachisqan kashan, jallp’apas waqashanmi.+
Trigopas manañan kapunñachu, vinopas ch’akirapunmi, aceitepas tukurakapunmi.+
11 Chajra ruwaqkunapas manan imanakuyta atinkuchu,uvas chajrayoqkunapas khuyay llakisqan kashanku,manan trigopas cebadapas kapunchu,manan imapas chajrapiqa kapunñachu.
12 Uvas sach’apas ch’akirapunmi,higos sach’apas naq’erapunmi.
Granada sach’apas, palmera sach’apas, manzana sach’apas ch’akirapunmi,campopi llapa sach’akunan ch’akipun.+
Llaqta runakunaq kusikuyninpas p’enqakuymanmi tukupun.
13 Sacerdotekuna, qhasqa p’achawan churakuspa waqaychis.*
Altarpi serviqkuna, waqaychis.+
Diosniypa kamachinkuna, qhasqa pach’awan churaykusqa illariychis.
Manañan Diosniykichispa wasinmanqa apakunñachu jak’u ofrendatapas+ ni vino ofrendatapas.+
14 Runakunata kamachiychis* ayunanankupaq, Diosta yupaychanapaq juñukuychis.+
Umalliqkunata, kay jallp’api tiyaq llapa runakunatawan juñumuychis,Jehová Diosniykichispa wasinpi juñukuychis,+rogakuychis Jehová Diosta yanapanasuykichispaq.
15 Jehová Diospa p’unchayninqa chayamushanñan.+
¡Imaynaraqchá chay p’unchayqa kanqa!
Tukuy atiyniyoqpa chinkachinan p’unchaymi chayamunqa.
16 ¿Manachu mijuyninchisqa rikushaqtinchis ch’usaqyachisqa kapurqan?
¿Manachu Diosninchispa wasinmantaqa kusikuypas q’ochukuypas chinkapun?
17 Tarpusqa mujupas* palaq pachanpin, palaq pampanpin ch’akipun.
Mijuy waqaychana wasikunapas ch’usaqmi kashan.
Trigo chajrakuna ch’akipusqanwanmi trigo waqaychanapas thunisqa kashan.
18 ¡Uywakunapas khuyaytan waqashanku!
¡Wakakunapas tropantinmi kayman jaqayman pastota maskhaspa phawaykachashanku!
Ovejakunapas ñak’arishankun.
19 Jehová Diosnilláy, qantan wajakamusayki,+ninan campopi pastokunata rupharapun,campopi sach’akunatapas lliutan rupharapun.
20 Mayukuna ch’akipusqanraykun,campopi pastokunata nina ruphapusqanraykunsalqa animalkunapas khuyayta maskhamushasunkiku”.
Uraypi willakuykuna
^ Joel sutiqa “Jehovami Diosqa” ninantan nin.
^ Chaypiqa “Kuraq runakuna” nillanmantaqmi.
^ Rajraputaqa “sinchi mijuq” nillankutaqmi.
^ Langostaqa jatun t’isku-t’isku otaq jatun ch’illiku jinan. Chay langostakunaqa sinchi q’aruqmi kanku.
^ Qhaqllitaqa “kallachu” nillankutaqmi.
^ Chaypiqa “qosanta” nillanmantaqmi.
^ Chaypiqa “qhasqoykichista takakuychis” nillanmantaqmi.
^ Hebreo rimaypiqa “ch’uyanchaychis” ninmi.
^ Chaypiqa yaqapaschá “Ch’aki higoskunapas” nillanmantaq.
