Hebreos 4:1-16
4 Chhaynaqa, kanraqtaq Diospa samanan p’unchayman jaykunapaq promesa chayqa, allinta cuidakuychis,* chaytaq mayqenniykichispas mana chayman jaykunaykichispaq jinachu kawaqchis.+
2 Imaynan paykunamanpas allin willakuykuna willasqa karqan, chhaynan noqanchismanpas allin willakuykuna willasqa kallarqantaq;+ ichaqa paykunaq iñiyninqa manan pikunachus kasukuq karqanku chaykunaq iñiynin jinachu karqan, chaymi paykunapaqqa yanqapaq karqan chay willakuykunaqa.
3 Noqanchis iñiqkunaqa jaykusunmanmi chay samana p’unchayman; paykunamantan ichaqa Dios nin: “Jinan noqaqa k’araq phiñakuyniypi jurarqani: Manan jaykunqakuchu samanay p’unchaymanqa, nispay”,+ nispa. Diosqa ruwananta tukuspan runakunaq qallariyninmantapacha* samashan.+
4 Juj partepin qanchis kaq p’unchaymanta pay nirqan: “Diosqa qanchis kaq p’unchaypin tukuy ima ruwasqanmanta samarqan”,+ nispa.
5 Chaymantapas nillarqantaqmi: “Manan jaykunqakuchu samanay p’unchaymanqa”,+ nispa.
6 Chhaynaqa, ñaupaqpi allin willakuykunata uyariqkunaqa mana kasukuq kasqankuraykun mana jaykurqankuchu chay samana p’unchayman,+ chaywanpas wakinqa atinmanraqmi chayman jaykuyta.
7 Chaymi unay tiempo qhepaman, ñaupaqpi nimusqay jina, Diosqa Davidpa salmo takinpi wajmanta nirqan: “Kunanchus siminta uyarinkichis chayqa, aman sonqoykichista k’ulluyachinkichischu”,+ nispa; chaypi “kunan” nisqanwanmi payqa juj samana p’unchaymanta rimasharqan.
8 Josuechus+ paykunata chay samayman pusanman karqan chayqa, manachá Diosqa juj p’unchaymantaqa rimanmanñachu karqan.
9 Chhaynaqa, Diospa llaqtanpaqqa kanraqmi juj samana p’unchay.+
10 Pipas Diospa samanan p’unchayman jaykuqqa, tukuy ima ruwasqanmantan samashan, imaynan Diospas llank’ananmanta samarqan jinata.+
11 Chayrayku, tukuy atisqanchista kallpachakusun chay samana p’unchayman jaykunanchispaq, mana chayqa paqtapas paykuna jina mana kasukuqman tukusunman.+
12 Diospa siminqa kausashaqmi, atiyniyoqtaqmi kanpas,+ iskay filoyoq espadamantapas aswan filollañan;+ ukhukaman jaykun almatawan* espiritutawan* t’aqarparinankamaraq, moqo-moqotapas chilinatapas t’aqarparinankamaraq; sonqoq ima munasqantapas ima piensasqantapas allintan reparan.
13 Diospa ñawinpaqqa manan ima kamasqapas pakasqachu kashan,+ aswanpas llapanmi cuenta qonanchis Diospa ñawinpaqqa alayrilla kashan, sut’i rikuyllataqmi kashanpas.+
14 Ancha jatun uma sacerdotenchisqa Diospa Churin Jesusmi,+ payqa janaq pachamanmi jaykun; chayrayku rimashallasun paypi iñisqanchismanta.+
15 Chay uma sacerdotenchisqa allintan yachan mayninpi pisipananchista, chaymi khuyapayakuq noqanchiswan;+ chaymantapas pay kikinmi noqanchis jina imaymana pruebakunata pasarqan, ichaqa manan jayk’aqpas juchallikurqanchu.+
16 Chayrayku qayllaykusun ancha sumaq sonqowan qhawariq Diospa trononman, jinaspa ama manchakuspa paymanta mañakusun,+ chhaynapi yanapanata necesitashaqtinchis pay khuyapayawananchispaq, ancha sumaq sonqowan qhawariwananchispaqwan.
Uraypi willakuykuna
^ Griego rimaypiqa “manchakuychis” ninmi.
^ Chaypiqa Adán Evaq wawankunamantan rimashan.
