Ezequiel 39:1-29
39 ”Qan, runaq churin, Gog+ contra rimay, payta niy: Tukuy munayniyoq Señor Jehová Diosmi nin: Yau Mesecpa Tubalpa+ qollana umallin Gog, noqan qan contra kashani.
2 Qantan kutirichimusayki, wichay ladoq k’uchunkunamantan pusamusayki,+ Israelpi orqo-orqomanmi seqachimusayki.
3 Juj p’anayllapin lloq’e makiykipi flechanayki arcota kacharichisayki, paña makiykipi llapa flechakunatan choqachisayki.
4 Israel orqo-orqokunapin urmanki,+ chaypin urmanqa tropaykikunapas qanwan jamuq llaqtakunapas. Wañusqa aychata mijuq alton phalaq animalkunan, campopi salqa animalkunan mijusunki,+ nispa.
5 ”Ch’usaq pampapin urmanki,+ noqa kikiymi chayta nini, ninmi tukuy munayniyoq Señor Jehová Dios.
6 ”Magog jallp’aman islakunapi thaj kausaq runakunaman iman ninata kachaykamusaq,+ chhaynapin paykunaqa yachanqaku noqa Jehová Dios kasqayta.
7 Ch’uya sutiytan Israel llaqtayman reqsichisaq, manañan chay sutiytaqa pipas qhellichanqañachu. Nacionkunapas yachanqakun noqa Jehová Dios kasqayta,+ Israelpa ch’uya Diosnin kasqayta.+
8 ”Tukuy munayniyoq Señor Jehová Diosmi nin: Chaykuna rimasqayqa qayllaykamushanñan, junt’akunqapunin. Chay p’unchayqa kaypiñan kashan.
9 Israelpi llaqtakunan lloqsimuspa imaymana armakunawan ninata jap’ichikunqaku. Jark’apakuna jatun escudokunawan, juch’uy escudokunawan,* arcokunawan, flechakunawan, imaymana lanzakunawan iman ninata raurachikunqaku.+ Qanchis watan chaykunawan ninata raurachinqaku.
10 Manañan campokunapi k’aspikunata llant’akunata maskhanqakuchu, aswanpas chay armakunawanmi ninata raurachikunqaku, nispa.
”Qechuqninkumantan qechunqaku, suwaqninkumantan suwanqaku, ninmi tukuy munayniyoq Señor Jehová Dios.
11 ”Chay p’unchaymi Israelpi kaq aya p’ampanata Gogman qosaq,+ lamar-qochaq inti lloqsimuy ladonpi kaq wayq’otan, runaq purinan wayq’otan qosaq, chayninta puriqkunaqa jark’asqan kanqaku. Chaypin p’ampanqaku Gogta paywan jamuq llapa runakunatawan. Chay wayq’otan sutichanqaku Amon-Gog,*+ nispa.
12 Israel runakunaqa qanchis killan wañusqa runakunata p’ampanqaku, chhaynapi jallp’ata ch’uyanchanankupaq.+
13 Llaqtantinpi llapa runakunan p’ampaysikunqaku, chay ruwasqankuwanmi paykunaqa allin reqsisqa kanqaku, jatunchakusqay p’unchaypin allin reqsisqa kanqaku,+ ninmi tukuy munayniyoq Señor Jehová Dios.
14 ”Llapa llaqtantin ch’uya kananpaqmi wakin runakunata churakunqa, paykunaqa kuti-kutirispan wañusqakunata maskhanqaku, tarisqankunatataq p’ampanqaku; qanchis killan chayta ruwanqaku.
15 Chay ajllasqa runakunachus runa tulluta tarinqaku chayqa, tulluq ladonpin juj marcata churanqaku. P’ampanankupaq ajllasqa kaqkunataq Amon-Gog+ wayq’opi chay tullukunata p’ampanqaku.
16 Chaypin kallanqataq Amoná* sutiyoq llaqta. Paykunan jallp’ata ch’uyanchanqaku.+
17 ”Runaq churin, qantan tukuy munayniyoq Señor Jehová Dios nisunki: Llapa altonta phalaq animalkunata campopi llapa salqa animalkunata niy: Llapaykichis jamuychis, sacrificio ruwasqayman juñukamuychis, Israel orqo-orqokunapin qankunapaq jatun sacrificiota alistapushaykichis.+ Chaypin aychata mijunkichis, yawartan ujankichis.+
18 Atiyniyoqkunaq aychantan mijunkichis, kay pacha umallikunaq yawarnintan ujankichis; llapa paykunaqa Basanpi wirayachisqa animalkunan kanku; ovejakuna, malta ovejakuna, cabrakuna, torokuna iman kanku.
19 Qankunapaq sacrificio alistasqaymantan millakunaykichiskama wirata mijunkichis, yawartapas machanaykichiskaman ujankichis, nispa.
20 ”Mesaypin qankunaqa caballokunaq, carreta manejaqkunaq aychanta mijunkichis, sajsanaykichiskaman atiyniyoqkunaq aychanta, allin maqanakuq soldadokunaq aychanta mijunkichis,+ ninmi tukuy munayniyoq Señor Jehová Dios.
21 ”Nacionkunaq chaupinpin may jatun kasqayta rikuchisaq, llapa nacionkunan castigasqayta rikunqaku, may jatun atiyniytan rikunqaku.+
22 Chay p’unchaymantapachan Israel runakunaqa yachanqaku noqa Diosninku Jehová Dios kasqayta.
23 Nacionkunan yachanqaku Israel llaqtaqa juchanrayku, mana kasukuq kasqanrayku apasqa kasqanta.+ Chayraykun paykunamanta uyayta juj ladoman kutirirqani,+ enemigonkunaq makinmanmi entregarqani,+ chhaynapin espadaman qosqa karqanku.
24 Qhelli ruwasqankuman jinan, mana allin ruwasqankuman jinan paykunata ruwarqani, uyaytan paykunamanta pakarqani.
25 ”Chayraykun, tukuy munayniyoq Señor Jehová Diosqa nin: Jacobpa mirayninmanta apasqa kaqkunatan kutichimpusaq,+ llapa Israel runakunatan khuyapayasaq;+ ch’uya sutiytan tukuy kallpaywan jatunchasaq.+
26 Mana kasukuwasqankuraykun paykunaqa k’umuchisqa, pisichasqa karqanku,+ kunanqa jallp’ankupin thaj tiyanqaku, manan pipas paykunataqa manchachinqachu.+
27 Enemigonkuq jallp’anmantan, enemigonkuq llaqtanmantan paykunata juñumusaq,+ jinan askha nacionkunaq rikushasqan paykunaq chaupinpi ch’uyanchakusaq,+ nispa.
28 ”Apachisqay nacionkunamanta jujmanta jallp’ankuman kutichimpuqtiymi, mana mayqenta saqespa kutichimpuqtiymi+ paykunaqa yachanqaku noqa Diosninku Jehová Dios kasqayta.
29 Manañan Israel runakunamanta uyayta pakasaqñachu,+ paykunamanmi espirituyta jich’aykamusaq,+ ninmi tukuy munayniyoq Señor Jehová Dios”, nispa.
Uraypi willakuykuna
^ Chay jark’apakuna juch’uy escudokunataqa flechaqkunan utilizaqku.
^ Amon-Gog sutiqa “Gogpa runankuna” ninantan nin.
^ Amoná sutiqa “askha runakuna” ninantan nin.
