2 Corintios 8:1-24
8 Wayqeykuna,* kunanmi willasaykiku Macedoniapi iñiq t’aqakuna Diospa ancha sumaq sonqo kayninta chaskispanku imatachus ruwarqanku chayta.+
2 Paykunaqa jatun pruebapiña ñak’arishaspapas, wajchaña kashaspapas ancha kusisqan kasharqanku, chaymi iñiyninkupi qhapaq kasqankuta, ancha qoykukuq kasqankutawan rikuchirqanku.
3 Paykunaqa tukuy atisqankuman jinan qoykunku,+ chaymantapas mastaraqmi qoykunkupas;+ chaytaqa noqa kikiymi rikuni.
4 Arí, chay iñiqmasikunaqa paykuna kikillankumantan anchata rogaykuwanku sumaq sonqowan qosqanku regalonkuta chaskinaykupaq, chhaynapi paykunapas pisichikuq iñiqmasikunata* yanapanapaq llank’aypi yanapaysikunankupaq.+
5 Paykunaqa imachus piensasqaykumantapas astawanraqmi ruwarqanku, arí, Diospa munayninpin tukuy sonqowan Señorta serviyman qokurqanku, noqaykutapas serviwarqankun.
6 Chaymi Titota+ kallpachayku tukuy sonqowan qosqaykichis yanapaykuna juñuy qallarisqanta junt’ananpaq.
7 Qankunaqa kusatan tukuy imatapas ruwashankichis, allin iñiyniyoqmi kashankichis, allin rimaqmi kashankichis, yachayniyoqmi kashankichis, tukuy kallpawanmi llank’ashankichispas, imaynan qankunata munakuykiku chhaynatan jujkunatapas munakushankichis, ichaqa kallpachakushallaychis qoykukuq kaypipas.+
8 Chayta nispaqa manan kamachishaykichischu, aswanmi chaytaqa nimushaykichis jujkunaq tukuy sonqowan llank’asqankuta reparanaykichispaq, tukuy sonqo munakuqchus kankichis icha manachus chayta rikunaypaqwan.
9 Yachasqaykichis jina, Señorninchis Jesucristoqa ancha sumaq sonqo kayninpin qhapaq kashaspapas qankunarayku wajchaman tukurqan,+ chhaynapi paypa wajcha kayninwan qankuna qhapaq kanaykichispaq.
10 Noqaq piensasqayman jinaqa,+ chay yanapayta juñuyqa qankunaq allinniykichispaqmi kanqa. Ichaqa yachasqaykichis jina, juj watañan karun chay juñuyta qallarisqaykichismantaqa, tukuy sonqowantaqmi munarqankichispas chay ruwaytaqa.
11 Chayraykun kallpachaykichis imachus ruway qallarisqaykichista tukunaykichispaq, chhaynapin imachus kapuqniykichisman jina yanapay qosqaykichis juñuytaqa usqhaylla tukunkichis, qallariypi munasqaykichisman jina.
12 Imapas tukuy sonqowan qosqataqa allinpaqmi Diosqa qhawarin, payqa pipas atisqanman jina qonantan munan,+ manan mana atinanta qonantachu.
13 Noqaqa manan jujkunapaq fácil kananta munaspachu, qankunapaqtaq sasa kananta munaspachu chaytaqa nimushaykichis;
14 aswanpas qankunaq puchusqasuykichis paykunaq pisichikuyninpi yanapananpaqmi, jinallataq paykunaq puchuqninpas qankunaq pisichikuyniykichispi yanapanasuykichispaq, chhaynapi imapas llapapaq igual-lla kananpaq.
15 Qelqapipas ninmi: “Askha kaqniyoqqa manan nishu askha kaqniyoqchu karqan, pisi kaqniyoqpas manan pisichikurqanchu”,+ nispa.
16 Diosman gracias kachun Titopas noqayku jina qankunamanta llakikusqanmanta.+
17 Titotan valekuyku qankunaman jamunanpaq, payqa munasharqanpunin qankunaman jamuyta, chaymi pay kikillanmanta jamushan.
18 Paywan kuskatan kachamushayku juj iñiqmasinchista, paymantaqa allin willakuykunata willasqanraykun llapa iñiq t’aqakunapi allinta rimanku.
19 Manan chayllachu, paytaqa llapa iñiq t’aqakunan churanku puriysiwanankupaq, chhaynapi juñusqa yanapaykunata rakiysiwanankupaq, chay yanapaykunataqa rakisaqku Señor jatunchasqa kananpaqmi, chaywanmi rikuchisaqku jujkuna yanapanaykupaq listo kashasqaykutapas.
20 Chayraykun iñiqmasikunapaq mana mich’akuspa qowasqanku yanapaywanqa mana comuntachu imatapas ruwayku,+ chhaynapi ama pipas ima mana allintapas rimashananpaq.
21 Noqaykuqa “mana engañaspan tukuy imatapas ruwashayku, ichaqa manan Jehová* Diospa ñaupallanpichu, aswanpas lliu runaq ñaupanpiwanmi”.+
22 Paykunawan kuskatan juj iñiqmasinchista kachamushallaykutaq, paytaqa askha kutipin probarqayku, chaymi yachayku imaymanapi allin llank’aq kasqanta, qankunatapas tukuy sonqowanmi yanapayta munashasunkichis qankunapi anchata confiasqanrayku.
23 Pipas Titomanta imatapas tapusunkichisman chayqa, willaychis payqa puriqmasiy kasqanta, qankunaq allinniykichispaq llank’aqmasiy kasqantawan. Chay juj kaq iñiqmasikunamantapas tapusunkichis chayqa, willaychis paykunaqa iñiq t’aqakunaq apostolninkuna kasqankuta, Cristota jatunchachiqkuna kasqankutawan.
24 Chayrayku paykuna munakusqaykichista rikuchiychis,+ iñiq t’aqakunamanpas rikuchillaychistaq qankunamanta alabakusqaykuqa mana yanqapaqchu kasqanta.
Uraypi willakuykuna
^ Mayninpiqa warmipaq qharipaqwanmi Bibliapiqa “wayqeykuna” nispa nin.
^ Griego rimaypiqa “ch’uya kaqkunata” ninmi.
^ Qhaway “Astawan yachanapaq A5” nisqata.
