2 Corintios 7:1-16
7 Munasqa wayqe-panaykuna, chaykunatataq Diosqa prometewanchis chayqa,+ tukuy ima qhellimantayá limpiakusun cuerponchista sonqonchistapas,*+ chhaynapin Diosta manchakuspa aswan-aswan ch’uya kasunchis.
2 Sonqoykichista kichariwayku.+ Noqaykuqa manamá pitapas mana allintaqa ruwarqaykuchu, manan pitapas pantachirqaykuchu, manataqmi pitapas engañarqaykuchu.+
3 Chaytaqa manan juchachanaypaqchu nimushaykichis. Ñaupaqpi nisqay jina, qankunaqa sonqoykupin kashankichis, qankunawan kuskan kausasaqkupas wañusaqkupas.
4 Noqaqa sut’intan imatapas nimushaykichis. Qankunamantan alabakuni, sonqoypas allin kallpachasqan kashan; llakikuypiña kashayku chaypas, ancha kusisqan kashani.+
5 Macedoniaman+ chayaspaykuqa manan thajchu kasharqayku, imaymana sasachakuykunapin tarikusharqayku, jawapi kaqkunan sinchita qatikachashawarqanku, noqayku ukhupipas llakisqan kasharqayku.
6 Ichaqa llakisqakunata kallpachaq Diosmi+ kallpachawarqanku Titoq chayamusqanwan.
7 Ichaqa manan chayamusqallanwanchu kallpachawarqanku, aswanpas qankuna jawa Titopas kallpachasqa kasqanwan iman kallpachasqa tarikurqayku. Paymi willawanku imaynas qankunaqa anchatapuni rikuyta munashawankichis, imaynas llakisqa kashankichis, imaynas noqamantapas sinchita llakikunkichis chaykunata; chaykunawanmi noqaqa astawan kusikurqani.
8 Llakichirqaykichisña chay apachimusqay cartawan chaypas,+ noqaqa manan pesakunichu chaymanta. Arí, qallariypiqa pesakusharqanin chay carta llakichisqasuykichismanta, ichaqa pisi tiempolla llakichisqasuykichisraykun
9 kunanqa kusisqa kashani. Ichaqa manan llakisqa kasqaykichismantachu, aswanpas chay llakikuyniykichis juchamanta pesapakuyman apasqasuykichismantan. Chhayna llakikusqaykichisqa Diospa munayninman jinan kashan, chayraykun qankunata imapas nimusqaykuqa mana imapipas mana allinniykichispaqchu karqan.
10 Diospa munayninman jina llakikuyqa juchamanta pesapakuymanmi apan, chhaynapi salvasqa kanapaq, manataqmi chayqa ñakapakunapaqchu;+ kay pachaq llakikusqanta jina llakikuymi ichaqa wañuyman apan.
11 Diospa munayninman jina llakikusqaykichismi kallpacharqasunkichis tukuy sonqowan imatapas ruwanaykichispaq, ch’uyanchakunaykichispaq, juchata cheqnikunaykichispaq, Diosta manchakunaykichispaq, tukuy sonqowan juchaykichismanta pesapakunaykichispaq, tukuy sonqowan Diosta servinaykichispaq, juchamanta limpiakunaykichispaq ima.+ Chay juchata allichanaykichispaq tukuy imapas ruwasqaykichisqa allinmi kashan.
12 Qelqamuspayqa manan noqaqa juchata ruwaqraykuchu qelqamurqani, nitaq chay jucha jawa mana allinpi tarikuqraykuchu;+ aswanmi qelqamurqani noqaykuta uyariyta munankichischus icha manachus chayta Diospa ñaupanpi sut’ita rikuchinaykichispaq.
13 Chayraykun kallpachasqa kashayku.
Kallpachasqa kasqaykumantaqa Titoq kusisqa kasqanta rikuspan astawanraq kusikuyku, anchatapunin paytaqa llapaykichis kallpachamusqankichis.*
14 Noqan Titoq ñaupanpi qankunamanta alabakurqani, chay alabakusqayqa manamá yanqapaqchu kasqa; aswanpas imaynan qankunata tukuy ima nimusqaykupas cheqaq karqan, chhaynallataqmá qankuna jawa Titoq ñaupanpi alabakusqaykupas cheqaqllataq kasqa.
15 Qankunaq kasukusqaykichista,+ ancha respetowan chaskisqaykichista ima yuyarispan payqa astawanraq munakusunkichis.
16 Noqaqa tukuy sonqon qankunapi confiani, chaymi kusikuni.
