2 Corintios 13:1-14
13 Kaywanqa kinsa kutitañan “jamusaq” nishani. “Iskay otaq kinsa testigokuna rimariqtinñan yachakunqa cheqaqchus chay icha manachus chayta”.+
2 Manaña chaypichu kashani chaypas, wajmantapas chaypi kashayman jinan kashani, chaymi qankuna ukhupi ñaupaq juchallikuqkunata llapa qankunatawan kunanmantapacha nimuykichis: Jayk’aqpas chayamuspayqa manapunin mana allin ruwaqkunataqa jinallataqa qhawasaqchu.
3 Chaywanmi allinta rikuchisaykichis noqataqa Cristo rimachishawasqanta, payqa manan pisi kallpachu qankuna ukhupiqa, aswanpas atiyniyoqmi.
4 Pisi kallpa kasqanraykuña k’aspipi wañuchisqa karqan chaypas, kunanqa Diospa atiyninwanmi kausashan.+ Noqaykupas imaynan ñaupaqpi payqa pisi kallpa karqan chhaynan kashayku, chaywanpas Diospa atiynin qankunapi kasqanraykun+ paywan kuska kausasaqku.+
5 Qankuna kikiykichista allinta t’aqwikuychis allinchus iñiypi kashankichis icha manachus chayta yachanaykichispaq, allintataq qhawarikuychis imayna runachus kashankichis chayta.+ ¿Manachu yachankichis Jesucristoqa qankunawan jujllachasqa kasqanta? Icha, ¿Diospa mana allin qhawarisqanchu kashankichispas?
6 Noqaykuqa Diospa sumaq qhawarisqan runakunan kayku, maytan noqaqa munayman chayta yachanaykichista.
7 Diosmantan mañakuyku qankuna ama ima mana allintapas ruwanaykichispaq; chaytaqa mañakuyku manan pipas noqaykuta Diospa chaskisqanta jina qhawariwanankupaqchu, aswanpas qankuna kikiykichis allin kaqta ruwanaykichispaqmi, jinaña Diospa mana chaskisqanta jina jujkuna qhawariwanku chaypas.
8 Noqaykuqa manan imatapas cheqaq kaqpa contranpiqa ruwayta atiykumanchu, aswanpas cheqaq kaqman jinapunin imatapas ruwayku.
9 Noqaykuqa kusikuykun qankuna kallpasapa kashaqtiykichis pisi kallpa kasqaykuwan. Chaymantapas noqaykuqa imapichus cambianaykichis kashan chaypi cambianaykichispaqmi Diosmanta mañakushayku.
10 Chayraykun manaraq qankunaman jamushaspa kaykunata qelqamushaykichis, chhaynapi chayamuspayqa ama k’araqtachu Señorpa qowasqan atiywan qankunata anyanaypaq,+ payqa manan thuninaypaqchu chay atiytaqa qowarqan, aswanpas iñiyniykichispi qankunata wiñachinaypaqmi.
11 Chhaynaqa wayqeykuna,* kusisqalla kausaychis, imapichus cambianaykichis kashan chaypi cambiaychis, jujkunaq kallpachaynintapas chaskishallaychis;+ kallpachakushallaychistaq juj yuyaylla kanaykichispaq,+ qankunapura sumaqta kausanaykichispaqpas.+ Chayta ruwankichis chayqa, thaj kayta qoq,+ ancha munakuq Diosmi qankunawan kanqa.
12 Ch’uya much’aywan napaykunakuychis.
13 Llapa iñiqmasikunan* napaykuyninkuta apachimusunkichis.
14 Qankunawan kachun Señor Jesucristoq ancha sumaq sonqo kaynin, Diospa munakuynin, jinallataq juj nisqalla chaskisqanchis santo espiritupas.
Uraypi willakuykuna
^ Mayninpiqa warmipaq qharipaqwanmi Bibliapiqa “wayqeykuna” nispa nin.
^ Griego rimaypiqa “ch’uya kaqkunan” ninmi.
