Éxodo 37:1-29
37 Chaymantataq Bezalelqa+ acacia sach’a maderamanta Diospa rimanakuynin arcata+ ruwarqan. Largonmi karqan iskay codo* kuskan, anchontaq karqan juj codo kuskan, altonpas juj codo kuskallantaqmi karqan.+
2 Chaytan payqa ukhunta jawantawan ch’uya qoriwan forrarqan, cantonkunatapas qoriwanmi muyuchirqan.+
3 Ruwallarqantaqmi tawa qori ninrikunatapas, chaykunatan churarqan Diospa rimanakuynin arcaq tawantin chakinpa jawa qhatanman. Iskay ninritan juj ladonman churarqan, iskaytataq jujnin ladonman.
4 Chaymantapas acacia sach’amantan k’aspikunata ruwarqan, chaytataq qoriwan forrarqan.+
5 Chay k’aspikunatan Diospa rimanakuynin arcapi k’askasqa ninrikunaman suskhuchirqan, chaykunawan arcata wantunapaq.+
6 Ruwallarqantaqmi Diospa rimanakuynin arcaq tapantapas, chaytaqa ch’uya qorimantan ruwarqan.+ Largonmi karqan iskay codo kuskan, anchontaq karqan juj codo kuskan.+
7 Chay tapaq iskaynin cantonpin qorimanta iskay querubín angelkunata+ ruwarqan, chay querubinkunatan formarqan martillowan takaspa.+
8 Juj querubintan churarqan tapaq jujnin cantonman, juj querubintataq juj kaq cantonman. Iskaynin cantonmanmi querubinkunata churarqan.
9 Chay querubinkunaqa chimpa-chimpapuran kasharqanku Diospa rimanakuynin arcaq tapanman k’umushaq.+ Rafrankunaqa wichayman oqarisqan kasharqan, arcaq tapanta pakaykuq jina.+
10 Chaymantapas acacia sach’a maderamantan juj mesata ruwallarqantaq.+ Largonmi karqan iskay codo, anchontaq karqan juj codo, altontaq karqan juj codo kuskan.+
11 Chay mesatan ch’uya qoriwan forrarqan, cantonkunatapas qoriwanmi muyuchirqan.
12 Canto patantan kanchachallarqantaq maki ancho sayayta,* chaytapas qoriwanmi muyuchillarqantaq.
13 Ruwallarqantaqmi tawa qori ninrikunatapas, chaykunatan churarqan mesaq tawantin esquinanman, maypichus chakinkuna kashan chayman.
14 Chay ninrikunaqa mesaq canto patanpa uranpin kasharqan, chayninta mesa apana k’aspikunata suskhuchinapaq.
15 Chaymantataq acacia sach’amanta k’aspikunata ruwarqan, jinaspan qoriwan forrarqan, chaykunawan mesata wantunapaq.
16 Ruwallarqantaqmi mesa pataman churanapaq ch’uya qorimanta serviciokunatapas, chaykunan karqan platokuna, copakuna, vino ofrenda jich’anapaq jatun p’ukukuna, jarrakuna ima.+
17 Chaymantapas ch’uya qorimantan juj candelerota+ ruwallarqantaq. Chay candeleroqa martillowan formasqan karqan. Tiyananpas, chaupi k’aspinpas, t’ika mujmunkunapas,* t’ikankunapas, phanchisqankunapas jujllamantan karqan.+
18 Chaupi k’aspinmantan soqta k’allmakuna lloqsimurqan; juj ladonmanmi kinsa k’allma lloqsirqan, juj ladonmanpas kinsa k’allmallataqmi lloqsirqan.
19 Sapanka k’allmapin karqan kinsa t’ika mujmukuna almendra t’ikakuna jina, t’ikakunantin phanchikunantin ima. Sapanka k’allmatan chhaynata ruwarqan. Soqtantin k’allmakunan chhaynakama karqan.
20 Chay candeleroq chaupi k’aspinpin kallarqantaq tawa t’ika mujmukuna almendra t’ikakuna jina, t’ikakunantin phanchikunantin ima.
21 Sapanka iskay k’allmaq uranpin karqan juj t’ika. Ñaupaq kaq iskay k’allmaq uranpin karqan juj t’ika, iskay kaq iskay k’allmaq uranpipas juj t’ikan karqan, kinsa kaq iskay k’allmaq uranpipas juj t’ikan kallarqantaq. Chhaynan karqan candeleroq chaupi k’aspimanta lloqsimuq soqtantin k’allmakunawan.
22 Chay candeleroq chaupi k’aspinpas, k’allmankunapas, k’allmanpi t’ikakunapas jujllan karqan, ch’uya qorimanta ruwasqa, martillowan formasqa.
23 Chay candeleropaqmi ch’uya qorimanta ruwallarqantaq qanchis mecherokunata,*+ mecha jap’inakunata, sansa apana p’ukukunatawan.
24 Kinsa chunka tawayoq kilo* ch’uya qorimantan ruwarqan candelerota tukuy imaymanankunatawan.
25 Bezalelqa ruwallarqantaqmi incienso q’apachina altartapas,+ chaytaqa acacia maderamantan ruwarqan. Chay altarqa cuadradon karqan, largonmi karqan juj codo, anchonpas juj codon karqan, altontaq iskay codo. Altarpas waqrankunapas jujllan karqan.+
26 Chay altartaqa llapantan jawantapas, muyuriq qhatantapas, waqrankunatapas ch’uya qoriwan forrarqan. Cantontapas llapa muyuriqtan qoriwan muyuchirqan.
27 Cantonpa uranpin sapanka ladopi iskay qori ninrikunata churarqan, chayninta apanapaq k’aspikunata suskhuchinapaq.
28 Chaymantataq acacia sach’amanta k’aspikunata ruwarqan, jinaspa qoriwan forrarqan.
29 Ruwallarqantaqmi Diospaq t’aqasqa jawina aceitetapas+ sumaq q’apaq inciensotapas.+ Chaykunataqa allin-allin preparasqatan ruwarqan.
Uraypi willakuykuna
^ Juj codoqa yaqa kuskan metro jinan karqan (44,5 cm). Qhaway “Astawan yachanapaq B14” nisqata.
^ Chayqa karqan 7,4 centímetro jinan. Qhaway “Astawan yachanapaq B14” nisqata.
^ Mujmutaqa “murkhu” nillankutaqmi.
^ Chaypiqa “lamparakunata” nillanmantaqmi.
^ Hebreo rimaypiqa “juj talento” ninmi. Juj talentoqa 34,2 kilotan pesaq. Qhaway “Astawan yachanapaq B14” nisqata.
