Manam pipas munanchu mana allin runa utaq llulla kaytaqa, aswanqa allin runa kaytam munanchik. Chaynaqa ¿imanasqataq mana allin ruwaykuna astawan mirachkan? Sapa punchawmá manchakuyllapaq noticiakunata qawanchik. ¿Pitaq chay mana allin ruwaykunapa qipanpi kachkan? (Leey 1 Juan 5:19).

¿Mana allinkunata ruwananchikpaqchu Diosqa unanchawarqanchik? Manam. Diosqa payman rikchakuqtam unanchawarqanchik. Pay hina kuyakuq kaspanchik chayta qawachinapaqmi (Genesis 1:27; Job 34:10). Unanchawarqanchiktaqmi kikinchik imatapas tanteakuspa akllakunanchikpaq. Punta tayta-mamanchikqa manam Diosta qatipakuytaqa munarqakuchu, hinaspam mana allinkunata ruwayta qallaykurqaku. Chaymantapacham pantaq runakunaña rikurirurqaku. Hinaspam churi-wawankunapas mana allin ruwaqkunaña karqaku (leey Deuteronomio 32:4, 5).

Mana allin ruway munasqanchikkunata atipananchiktam Diosqa munan (Proverbios 27:11). Payqa yachachiwanchikmi allin runa kanapaq. Diospa imayna kayninkunata qatipakuspa chayman hina kawsaspanchikqa kusisqam kawsakusunchik. Kunanqa pantaq kasqanchikraykum mana atichwanchu pay hinapuni kaytaqa. ¿Chaynallachu wiñaypaqpas kasun? (Leey Salmo 32:8).

Diosqa mana allin ruwaykunatam saqin imakunapi tukusqanta musyakunapaq. Ichaqa, manamá wiñaypaqchu saqinqa (2 Pedro 3:7-9). Hamuq punchawpim kay pachapiqa Diosta qatipakuq allin runakunallaña kawsanqaku, paykunaqa kusisqam tarikunqaku (leey Salmo 37:9-11).