Runakuna mana allinkunata ruwasqankuraykum kay pachapi kawsakuyqa ancha sasa. ¿Hinallachu Diosqa saqinqa runakuna kay pachapi kamachinankupaq? Manam. Yachamusqanchikman hinam Diosqa kay pachapi gobiernokunata chinkachinqaña, paykunaqa una-unay watakunañam tukuy mana allinkunawan runamasinkuta ñakarichichkanku. Kay pachata hinaspa runakunata unanchaq Jehova Diosqa willawanchikmi haykapi chaykunata ruwananmanta. ¿Imaynatam willawanchik?

Kaypi yuyaymanay, pipas mana riqsisqan lawman rinanpaqqa mapatam servichikun hinaspam chay ñan imayna kasqanmanta allinta yachan. Risqanman hina chay mapapi qawasqankuna ñanpi rikurisqanta musyakuspanmi mana iskayrayanchu chay risqan lawman chayananmantaqa. Chay mapa hinam Diospa palabranpas hamuq tiempomanta willawanchik. Chaypim willawanchik puchukay punchaw manaraq chayamuptin imakuna pasananmanta. Tiempopa risqanman hinam enteron pachapi tukuy mana allinkuna astawan yapakuchkan, chaykunam qawachiwanchik bibliapa willakusqankuna cumplikusqanta, chaywanmi musyakunchik puchukay punchawqa kayllapiña kasqanta.

Bibliam willakun puchukay punchaw manaraq chayamuchkaptin kay pachapi astawanraq tukuy mana allinkuna rikurimunanmanta. Chayna sasachakuykunaqa manam haykapipas rikukurqachu. Qatiqninpiyá qawasun imakuna kasqanmanta.

1. ENTERON PACHAPI SASACHAKUYKUNA Mateo libropa 24 capitulonpim willakun chay sasachakuykunaqa achka kasqanmanta. Chay sasachakuykunapa qallariyninwanmi kay pachapi tukupay tiempo qallaykunan karqa (3 hinaspa 14 versiculokuna). Chaykunam kanan karqa guerrakuna, muchuykuna, terremotokuna, runamasinta mana kuyapayaq runakuna hinaspa Diosmanta llulla yachachiqkuna (6-26 versiculokuna). Chaykunaqa ñawpaqmantaraqmi karqa. Ichaqa puchukay punchaw manaraq chayamuchkaptinmi tukuy chaykunaqa astawanraq yapakunan karqa. Chaymantapas qatiqninpi kimsa willakuykunawanmi tupanan karqa. Chaytayá qawasun.

2. RUNAKUNA IMAYNA KANANMANTA Bibliam willakurqaña tukupay tiempopiqa mana allin runakunapa imayna kayninku mana allinllaña kananmanta. Bibliam nin: ‘Runakunam kanqaku kikillanpaq munaqkuna, qullqilla kuyaqkuna, hatun tukuspa alabakuqkuna, Dios insultaqkuna, mama-taytanku mana kasuqkuna, mana riqsikuqkuna, huchallapi purikuqkuna, mana kuyakuqkuna, mana pampachay munaqkuna, runakunapa contranpi rimaqkuna, mana controlakuqkuna, mana llakipayakuqkuna, allin kaqkunapa contranpi kaqkuna, runamasin traicionaqkuna, loco hina ruwaqkuna, hatun tukuqkuna hinaspa Dios yupaychayta qipaman churaspanku kikinkupa munasqallanpi purikuqkuna’, nispa (2 Timoteo 3:1-4). Ñawpaq watakunapi runakuna chayna kaptinkupas kunan tiempopim astawanraq chayna kanku. Chaymi bibliaqa nirqaña “tukupay tiempokunaqa sasallaña kananmanta”. ¿Kanchu chayna runakuna kay tiempopi?

3. KAY PACHATA PURMACHISQANKUMANTA Bibliam nin kay pachata purmachiqkunata Dios chinkachinanmanta (Apocalipsis 11:18). ¿Imaynatataq kay pachata purmachichkanku? Noeypa tiemponpi hinam. Bibliam nin: “Diospa qayllanpim kay pachapi kaq runakuna lliw pierdekururqaku hinaspankum dañanakuyllapiña kawsarqaku. Runakuna huchallapiña kawsaptinkum kay pachaqa pierdesqallaña kasqanta Dios qawarqa”, nispa. Chayna runakunamanta Dios rimaspanmi Noeyman nirqa: “Tantearunim llapa runakuna chinkarachiyta kay pachaqa paykunarayku dañanakuyllapiña kasqanrayku”, nispa (Genesis 6:11-13). ¿Musyankichu  kay pachapi llumpay mana allin ruwaykuna mirasqanta? Manam chayllachu, kay tiempopiqa runakunam bombakunata astawan ruwachkanku, chaykuna tuqyaruptinqa kay pachapas chaynataq runakunapas chinkarunmanmi. Chaymantapas yakutawan wayratam qachachachkanku chaymi tukuy rikchaq animalkunapas chinkachkan.

Kaypi yuyaymanay: ¿Yaqachu pachak wata ñawpaqta runakuna tukuchinakuyta atinmanku karqa? Manam. Kunanmi ichaqa atinmanku. Kay tiempopiqa sapa nacionpim tukuy rikchaq bombakunata ruwachkanku, chaymantapas kay pachatam llumpayta qachachachkanku. Manataqmi kallpanchakunkuchu cuidanankupaqqa. Diosqa manam saqinqachu runakuna kay pachata purmachinankutaqa. Aswanmi lliw qachachaq mana allin runakunata chinkachinqa.

4. ENTERON PACHAPI DIOSMANTA WILLAKUYMANTA Mateo libropi huknin willakuypas ninmi: “Diospa munaychakusqanmanta kay allin noticiam willakusqa kanqa enterollan kay pachapi chaynapi llapallan nacionpi runakuna yachananpaq, chayñam kay tiempoqa tukunqa”, nispa (Mateo 24:14). Diosmanta chayna willakuyqa manam wakin religionkunapa yachachisqankuman hinachu kanan karqa. Chay willakuypiqa astawanmi willakunanku karqa Diospa munaychakuyninmanta. ¿Mayqin religiontaq Diospa munaychakuyninmanta enteron pachapi willakuchkan?

Jehova Diospa testigonkunaqa internetpim jw.org nisqanta servichikunku Diosmanta ‘allin noticiakunata willakunankupaq’. Chaypim Diosmanta yachachikuykuna 700 masnin rimaykunapi kachkan. ¿Mayqin religiontaq Diospa munaychakuyninmanta willakunankupaq chaynata kallpanchakunku? Internet manaraq kachkaptinmi Jehova Diospa testigonkunaqa riqsisqa karqaku Diosmanta willakusqankuwan. 1939 watamantapacham sapa Willakuq qillqapi rikurin: “Jehova Diospa Gobiernonmanta willakuq”, nisqa. Religionkunamanta rimaq qillqapim nin: “Manam pipas [testigokuna hinaqa] tukuy sunqunkuwan hinaspa tukuy hinastinpi Diosmantaqa willakunkuchu”, nispa. Imamantapas astawanqa willakunku Diospa munaychakuynin kay pachapi tukuy mana allinkuna chinkachinanmantam.

¿Qawachkankichu bibliapa willakusqankuna kay tiempopi imayna cumplikusqanta? Kay qillqaqa pachak watañam enteron pachapi chaykuna  pasakusqanmanta willakuchkan, chaywanmi kay qillqata leeq runakunaqa musyakuchkanku tukupay tiempopi kawsakusqanchikta. Mana creeqkunam ichaqa ninku chayna willakuykunaqa yanqa kasqanta hinaspa imapas mana cambiasqanta. Chaynataqa piensanku enteron pachapi imapas pasasqanmanta televisionpi, internetpi qawaspa utaq radiontakama uyarispa chaylla yacharusqanchikraykum. Chaynata niptinkupas, achka runakunam cuentata qukunku tukupay tiempopiña kawsasqanchikmanta.

Chayna kasqantam yachanchik 2014 watapi yachaysapa runakuna huñunakuspanku Consejo de Seguridad de las Naciones Unidas nisqanman qillqasqankupi (The Bulletin of the Atomic Scientists). Chay qillqasqankupim kaynata nirqaku: ‘Imakunawan runakuna sasachakusqankumanta qawaspaykum cuentata qukuruniku, runakuna tukuy mana allin ruwayninkuta mana saqiptinkuqa kay pachapi kawsakuy chinkarunanmanta’, nispa. Kaykunawanmi achka runakuna chaynataq kay qillqata ruwaqkunapas, mana iskayrayankuchu tukupay punchawpi kawsasqanchikmantaqa. Ichaqa manam manchakunanchikchu. ¿Imanasqa? Puchukay punchaw chayaramuptinqa atichwanmi salvakuytaqa.