Manam Alexllachu chayna llamkaykunapi kasqanwanqa hukmanyasqa tarikun. Carro allichaypi llamkaq Aaronpas ninmi: “Yaqa llapan runakunam kayna llamkaytaqa mana allinpaq hapinku. Aswan allin llamkayta tariruspankuqa chayllam saqirunku”, nispa.

Achka runakunam hukmanta qawanku kallpankuta servichikuspa llamkaytaqa. ¿Imanasqa? Yaqapaschá chayna tarikunku televisionpi utaq chayman rikchakuqkunapi sumaqllaña kawsakusqankuta qawasqankurayku. Matthew sutiyuq runam nin: “Yaqa llapan runakunam piensanku kallpankuta servichikuspa llamkayqa mana estudioyuq runakunapaq kasqanta”, nispa. Wasita limpiaspa llamkaq Shane sutiyuqpas yaqa chaynallatam nin: “Runakunaqa ñawpaq tiempopi hina ganaytam munanku, ichaqa mana anchata llamkaspalla”, nispa.

Chayna kaptinpas, achka runakunam kallpankuta servichikuspa llamkayta munanku. 25 watanpi kaq Danielmi nin: “Anchata llamkaspaqa kusisqam tarikunki astawanraqmi llamkayniki hukkunata yanapaptinqa”, nispa. 23 watanpi kaq Andre sutiyuqpas ninmi: “Manam iskayrayanichu kusisqa hinaspa hawkalla kawsanapaq llamkayqa allin kasqanta. Llamkaspayki mana kallpanchakuspaykiqa manam kusisqa tarikunkichu aswanqa hukmanyasqam tarikunki”​, nispa.

¿Imaynatam Danielwan Andreyqa llamkayninkuwan kusikurqaku? Bibliapa yanapakuyninkunata ruwayman churaspankum. Bibliaqa yachachiwanchikmi hinalla kallpanchakunapaq, yachachiwanchiktaqmi ruwasqanchikkunawan kusikunapaqpas.

¿Bibliapa mayqinnin yachachikuyninkunam llamkaynikipi kusisqa kanaykipaq yanapasunkiman? Kallpanchaykikum qatiqninpi wakin yanapakuykunamanta yachanaykipaq.