Bibliam willakun wañuqkunata Jesus kawsarichisqanmanta. Kay willakuyqa manam cuentollachu, chiqaptam karqa. 31 watapim Jesusqa Capernaum llaqtamanta Nain llaqtaman rirqa achka runakunawan kuska. Chay llaqtaman chayaruspanmi rikurqa achka runakuna huk mozota pampanankupaq apachkaqta. Hina chayllapim Jesusqa kawsarirachirqa. ¿Iskayrayachwanchu Jesuspa chay ruwasqanmanta? Manam Bibliallachu chay ruwasqanmantaqa willakun, aswanqa achka runakunapas rikurqakum. (Leey Lucas 7:11-15.)

Chaymanta qipatam Jesusqa amistadnin Lazarotapas kawsarichirqa tawa punchawña wañusqa kachkaptin. Chay ruwasqantaqa achka runakunam chay kutipipas rikurqaku, chaykunam qawachin chiqaptapuni pasakusqanta. (Leey Juan 11:39-45.)

Jesusqa runakunata llakipayaspanmi kawsarichirqa. Chaymantapas Taytanmi atiyta qurqa wañuqkunata kawsarichinanpaq. (Leey Juan 5:21, 28, 29.)

Wañuqkunata Jesus kawsarichisqanraykum mana iskayrayachwanchu nisqankuna cumplikunanmantaqa. Payqa wara-waranqantin runakunatam kawsarichinqa. Kawsarichinqataqmi Diosta manaraq riqsichkaspa wañuqkunatapas, paykunam atinqaku Diosmanta yachayta hinaspa kuyaytapas. (Leey Hechos 24:15.)