Españapa norte lawninpi kaq Bilbao sutiyoq llaqtapim nacerqani, tayta-mamaypa tawa wawankunamantam iskay kaq kani. Catolicom karqaniku, chaymi misaman sapa punchaw riq kaniku. 23 wataypim profesoraña karqani. Profesora kayqa anchatam gustawarqa, chaymi tawa chunka wata yachachirqani. Ima yachachisqaymantapas religionmanta yachachisqaymi astawan gustawaq. Chaymantapas catequista kaspaymi primera comunionta ruwanankupaq warmi warmachakunaman tarden lawkunapi yachachiq kani.

12 watakunañam qosaywan casado vidaykupi kusisqa kawsakurqaniku, ichaqa 33 watallaypiraq kachkaptiymi qosay wañukuptin 4 wawaykunata sapallayña uywarqani. Chaymi religionniypi consuelota maskaspay tapukurqani: ¿Imanasqataq hinalla wañunchik librawananchikpaq Jesus wañuruptinqa? ¿Imanasqataq Diospa Gobiernonta hinalla mañakunchik wañuruspan allin runa hanaq pachaman riptinkuqa? Wañusqakunata Dios juzgaptinqa, ¿imanasqataq wañusqakunaqa cielomanta, purgatoriomanta otaq infiernomanta juicio punchawpaq kutimunqaku?

Chaykunamantam achka curakunata tapurqani. Chaymi hukkaqnin niwarqa: “Manam yachanichu, obispota tapukuy. ¿Diospiqa creenkichu icha manachu? Creespaykiqa imapaqñataq tapukunki”, nispan. Tapukuyniykunapa kutichiyninta yachayta munaspaymi rirqani jesuitas, pentecostales hinaspa gnósticos nisqan runakunapa yachachisqanta uyariq, ichaqa manam mayqenninkupas creenaypaq hinaqa contestawayta atirqakuchu.

60 wataypiña kachkaptiymi 7 watachayoq alumnay niwarqa Jehova Diospa testigonkunapa huñunakuyninman rinaypaq. Chaypi qawasqay chaynataq uyarisqay allin kaptinpas tiempoy mana kaptinmi chay huñunakuykunamanqa manaña rirqanichu. Chaymanta 2 wata pasaytam Juan hinaspa Maite sutiyoq Testigokuna punkuyta takamurqaku. Paykunaqa 3 killapunim tapukuyniykunata contestawarqaku, chaymantañam Biblia estudiayta qallaykurqani.

 Ganasllawanñam suyaq kani Bibliata estudiachiwananpaq Testigokuna hamunanta. Yachachiwasqankuqa ciertopuni kasqanta qawanaypaqmi 3 Bibliakunata servichikurqani. Chaywanmi cuentata qokurqani warma kasqaymantapacha pantay religionpi kasqayta. Anchatam admirakurqani creesqaykunaqa Bibliapa yachachisqanwan mana tupasqanmanta. Chaywanmi cuentata qokurqani creesqaykuna hatunllay-hatun sacha hina sapichasqa kaptinpas sapinmanta horqosqankuta.

Ichaqa chaynata estudiachkaptiymi yapakusqay qosay llumpayta onqoruspan wañururqa. Chaymanta qepallatam jubilakuruspay Bilbao llaqtamanta huklawman pasakurqani. Juan hinaspa Maitepas huklawmanmi astakururqaku. Chaymantapas Biblia estudiaytam saqerurqani ichaqa pakasqa qori-qollqe hina tarisqaytaqa otaq Diosmanta yachasqaytaqa manam haykapipas qonqarqanichu.

20 wataña pasaruptinmi 82 wataypiña kachkaptiy Bilbaoman Juanwan Maite kutimuspanku watukamuwarqaku. ¡Anchatam kusikurqani watukamuwasqankumanta! Chaywanmi cuentata qokurqani Jehova Diosqa mana qonqaruwasqanmanta, chaymi Biblia estudiayta kaqmanta qallaykurqani. Hina kaq tapukuyllamanta sapa kuti tapukuptiypas Juanwan Maiteqa anchatam pacienciakuwarqaku. Yapa-yapamantam Bibliapa yachachisqanta uyariyta munarqani ima creesqaykunata sonqoymanta horqonaypaq. Chaymantapas yachaytam munarqani yachasqaykunata aylluykunaman chaynataq amistadniykunaman imaynata yachachinaypaq.

Chaymi 87 wataypiña bautizakurqani Jehova Diospa testigonkunapa hatun huñunakuyninkupi. Chay punchawqa llumpay kusisqam tarikurqani. Chay punchawpi bautizakuqkunam sumaq yachachikuyta uyarirqaniku. Weqeypas suturisqam yachachiqpa rimasqankunata uyarirqani. Piensarqanim kikin Jehova Dios ima niwasqanpi. Bautizakuruptiymi wakinqa mana reqsiwaspankupas achka Testigokuna felicitawarqaku.

Yacharqanim Jesusqa ‘ñan’ hina kasqanmanta (Juan 14:6). Ichaqa Bibliata estudiaspaymi Jehova Diosmanta yacharuni, paymanmi Jesucristoqa pusawanchik. Jehova Diosqa kuyasqa taytay hinam chaynataq amistadniymi, paytam kunanqa mañakuni. Acerquémonos a Jehová * nisqan librota leesqaymi Diosman astawan asuykunaypaq yanapawarqa. Chay librotam huk tutallapi llapanta leerurqani. Chaywanmi cuentata qokurqani Jehova Diosqa ancha llakipayakuq kasqanmanta.

Unay watakunam cheqap yachachikuyta maskarqani, chaypi piensaspaymi yuyarini Jesucristopa kayna nisqanta: “Mañakuptikichikqa Diosmi qosunkichik. Maskaychik, tarinkichikmi, qayaychik, kichasunkichikmi”, nisqanta (Mateo 7:7). Mana yachasqaykunamanta entienderuspaymi kunanqa chaykunamanta hukkunaman willakuspay ancha kusisqa tarikuni.

90 wataypiñam tarikuni ichaqa Diosta serviyniypiqa sipasllaraqmi kani. Salonpi huñunakuykunaman rispaymi Diosmanta astawan yachani, chaymantapas anchatam kusikuni iñiqmasinchikkunawan kaspay. Kaqmantam maestra kayta munachkani Diospa prometesqan suma-sumaq huertapi (Apocalipsis 21:3, 4). Chaymantapas kuyasqay familiaykuna kawsarimuptinkum tupaykuyta munachkani (Hechos 24:15). Paykunaman yachachispaymi willasaq yuyaqña kaptiypas Diosqa mana qonqawaspan favoreceykuwasqanmanta.