Texcoco llaqtamantam kani. Nacesqay tiempopiqa llaqtaypi ñankunam allpallaña karqa. Llaqtaymanmi huklaw llaqtachakunamanta hamuqku rantikunankupaq otaq vendenankupaq kaqta asnokunapi cargakuykuspa. Isqon wawqe-paniykunamantam qanchis kaq kani, llumpay wakcham karqaniku. Taytaymi llamkarqa suelamanta usutakunata allichaypi, paymi wañukurqa qanchis watachayoq kachkaptiy. Mamaymi anchata kallpanchakurqa uywawanankupaq.

Abueloymi karqa violin tocaq chaymantapas cuentallikurqam musica tocaqkunamanta. Yaqa lliw aylluykum musica tocaq karqaku, mamaymi iglesiapi takiq, tioypas takiq chaynataq pianota tocaqmi karqa. Religionpi kaymi anchata gustawaqku. Ñoqapas monaguillom karqani, munarqanitaqmi iglesia catolicapa misionerom kayta ichaqa anchatam gustawaq maqanakuymanta otaq karate nisqaku videokunata qaway, chaykunata astawan qawasqaywanmi chaylla piñakuq otaq maqakuq karqani.

Puebla llaqtapim estudiayta qallaykurqani sacerdote kayta munaspay. Ichaqa estudiasqayta tukusqay watapim llumpayta hukmanyarachiwarqa chay escuelapi kaqkunapa mana allinkuna ruwasqanku. Sipasllaraq huk monjam puñunaykupaq hikutawayta qallaykurqa, paywan mana puñuspaypas casarakuypim piensayta qallaykurqani. Chaymantapas rikurqanitaqmi wakin sacerdotekunaqa iskay uya kasqankuta. Tiempo pasasqanman hinam sacerdote kay munasqayta saqerurqani.

 Hinaspam México llaqtapi musica estudiayta qallaykurqani Conservatorio Nacional de Música nisqanpi. Estudiayta tukuruspaymi casarakurqani hinaptinmi churiykuna tawa karqa. Llamkarqanim misa ruwasqankupi takispa.

Señoraywanmi casarakusqaykumantapacha sasachakuypi karqaniku. Celanakuspam llumpayta kaminakuq kaniku. Qallariypiqa kamiyllam kaminakurqaniku ichaqa tiempo pasasqanman hinam maqanakuytaña qallaykurqaniku. 13 wataña casarasqa kasqaykumantam rakinakuspa tiempo pasasqanman hina divorcianakurqaniku.

Manaraq rakinakuchkaptiykum Testigokunata reqsirurqani. Wasiyman iskay runakuna hamuspanmi punkuyta takamuspa Biblia estudianaykupaq munachiwarqaku. Bibliamanta allintapuni yachasqaypaq hapikuspaymi llulla yachachisqankuta qawachinaypaq aceptarqani. Piensasqayman hina mana contestay atina tapuykunatam tapurqani, ichaqa admirakuypaqmi lliw tapusqayta Bibliapa yachachisqanman hina contestawarqaku, chaywanmi cuentata qokurqani Bibliapa yachachisqanmantaqa pisilla yachasqaymanta. Paykunawan señoray llumpay lisa kasqanwan chaynataq mana tiempoyoq kasqaywanmi estudiayta saqerurqani.

Chaymanta pichqa wata pasaytam Jehova Diospa testigonkunawan kaqmanta tuparurqani. Chay tiempopaqqa Elvirawanñam karqani, payqa manam piñakuqchu Testigokuna watukamuwasqanwanqa, chaymi Biblia estudiayta kaqmanta qallaykurqani. Ichaqa unay watakunapim ñawpa tiempopi imayna kayniyta cambiarqani.

Cuentatam qokurqani Jehova Diosta serviyta munaspayqa vidayta cambianaypaq kasqanmanta. Iglesiapi llamkayniyta saqespam huk llamkaytaña maskanay karqa familiayta mantienenaypaq (Apocalipsis 18:4). Chaymantapas Elvirawanmi casarakunay karqa.

Ichaqa imamantapas aswan sasaqa karqa chaylla llumpay piñakuq kayniyta cambiaymi. Bibliapa iskay textonkunam anchata yanapawarqa. Salmo 11:5 nisqanwanmi yacharurqani Jehova Diosqa maqakuqta otaq daño ruwaqtaqa cheqnisqanta, 1 Pedro 3:7 nisqanwanñataq yacharurqani señorayta mana respetaptiyqa mañakusqayta Jehova Dios mana uyarisqanmanta. Chay textokunapi yuyaymanaspaymi Jehova Diospa yanapayninta mañakurqani chaywanmi pisi-pisimanta imayna genioyta cambiarqani.

Kunanqa familiaywanmi kusisqa kawsakuniku chaymantapas iñiyniykupi allin kanaykupaqmi kallpanchakuni, punta kaq señoraypi churiykunawanpas allinlla kawsanaykupaqmi kallpanchakuni.

Warmacha kasqaymantapacham munarqani sacerdote kaspay runamasiykuna yanapayta, ichaqa yacharunim imaynata allintapuni yanapayta chaymi anchata kusichiwan. Kunanqa musicamanta yachachiypi llamkaspaymi familiayta mantieneni. Jehova Diostam anchata agradecekuni imayna kayniyta cambianaykama pacienciawan yanapawasqanmanta.