CHAY tapukuyta contestanapaqqa puntatam yachananchik imanasqa Noeypa tiemponpi runakunata chaynataq cananeo runakunata wañuchisqanmanta.

WAKINMI NINKU: “Diosqa mana llakipayakuq kasqantam qawachirqa sinchi parawan lliw mana allin runakunata wañuchispan Noeyta hinaspa familiallanta librasqanwan”, nispa.

BIBLIAPA NISQAN: Jehova Diosmi nin: “Mana allin ruraq runapa wañunantaqa manam munanichu. Ñoqaqa munani mana allin kawsasqanmanta wanakuspan kawsanantam”, nispa (Ezequiel 33:11). Noeypa tiempopi mana allin runakunata Dios wañuchispanqa manam kusikurqachu. Ichaqa, ¿imanasqataq wañuchirqa?

Chay mana allin runakunata imanasqa castigasqanmantam Biblia nin: ‘Dios mana adoraqkuna qepa punchawkunapi manchakunankupaqmi’, nispa (2 Pedro 2:5, 6). Chaymantapas Bibliaqa qawachintaqmi Diosqa allin ruwaq kasqanman hina ima ruwananpaqpas tanteasqanmanta.

Diosqa manam munanchu mana allin runakuna wañuchiytaqa, ichaqa castiganqam mana llakipayaspan runamasinkuna ñakarichiqtaqa. Hamuq tiempopiqa ñakariykunatawan tukuy mana allinkunatam chinkachinqa.

Chaymantapas Diosqa kuyakuq kasqanwanmi pitapas manaraq castigachkaspan puntata willachin. Noeypa tiemponpipas paywanmi willachirqa sinchi para chayamunanmanta ichaqa mana wanakusqankuraykum chay runakunata wañuchirqa (Mateo 24:39).

Chayna kaynintataqmi Diosqa qawachirqa tiempo pasasqanman hina. Israelitakunamanmi willachirqa otaq anyachirqa Diosta mana serviq runakunapa ruwayninkunata hinalla ruwaptinkuqa enemigonku runakuna Jerusalenta tuñichiptin huklaw llaqtaman preso pusasqa kanankumanta. Israelitakunaqa mamam kasukurqakuchu, hinallam ruwarqaku Diosta mana serviq runakunapa ruwasqanta. Taytacha-mamachakunapaqmi wawakunata kañapurqaku. ¿Castigarqachu Jehova Diosqa paykunata? Awriki, ichaqa wanakunankupaq profetakunawan achka kutikama willachisqan qepatañam. Nirqam: ‘Serviqniykunaman manaraq willachichkaspayqa manam imatapas rurasaqchu’, nispa (Amos 3:7).

 IMATAM ENTIENDENCHIK: Ñawpa tiempopi mana allin runakunata Dios imanasqa castigasqanmi kallpanchawanchik otaq suyakuyta qowanchik. Jehova Diosqa castiganqapunim runamasin mana llakipayaqtaqa. Bibliam nin: “Mana allin ruraqkunaqa chayllapunim kanqañachu. Maskaspapas paykunataqa manapunim tarinkichu. Ñakariqmi ichaqariki dueñoyanqa allpatapas. Paykunaqa kusikuywanmi hawkayaypi kawsanqapas”, nispa (Salmo 37:9-11). ¿Ima ninkitaq ñakariykunata chinkachinanpaq mana allin runakunata Dios castigananmanta? ¿Niwaqchu mana llakipayakuq kasqanta icha llakipayakuq kasqantachu?

WAKINMI NINKU: “Cananeokunata Diospa wañuchisqanqa kay tiempopi guerrakunapi mana llakipayaspa wañuchisqankumanmi rikchakun”, nispa.

BIBLIAPA NISQAN: “[Diospa] rurasqankunaqa alli-allinmi [. . .]. Payqariki confiakunapaq Diosmi. Paypiqa manam kanchu mana allinqa”, nispa (Deuteronomio 32:4). Diospa castigontaqa manam tupachichwanchu guerrapi runamasinku wañuchisqankuwanqa. Diosqa yachanmi runakunapa imam piensasqankuta, runakunam ichaqa mana yachanchu.

Sodoma hinaspa Gomorra llaqtakunata Jehova Dios castigananmanta yacharuspanmi Abrahamqa Diosta llakisqallaña tapurqa: “¿Puchukarachinkichu allin ruraq runakunatapas mana allin runakunatawan kuskata?”, nispa. Jehova Diosqa pacienciakuspanmi contestarqa chunka runakunallapas Sodoma llaqtapi allin ruwaqkuna kaptinqa chay llaqtata mana castigananpaq (Genesis 18:20-33). Diosqa qawarqachá chay runakunaqa imanasqa tukuy mana allin ruwasqankunata (1 Cronicas 28:9).

Cananeokunaqa qalaypaq mana llakipayakuq kaptinmi Jehova Diosqa wañuchinankupaq kamachirqa. Paykunaqa reqsichikurqakum taytacha-mamachankupaq wawachakuna kañaq chaynataq hukkuna mana allinkuna ruwasqankuwanpas (2 Reyes 16:3). a Israelitakunaman Jehova Dios allpa qosqanta mana kacharisqankuwanmi qawachirqaku paypa contranpi sayarisqankuta, paykunaqa yacharqakum israelitakunataqa Dios favorecesqanmanta.

Llumpay huchallikusqankumanta wanakuq cananeokunataqa llakipayaspanmi Jehova Diosqa mana wañuchirqachu. Rahab sutiyoq chuchumika otaq prostituta warmita chaynataq aylluntam librarqa. Gaboan llaqtayoq runakuna llakipayasqa kanankupaq mañakuptinkupas manam wañuchirqachu (Josuey 6:25; 9:3, 24-26).

IMATAM ENTIENDENCHIK: Cananeokunata imanasqa wañuchisqanqa sutillatam qawachiwanchik mana llakipayakuq runakunaqa Diospa piñakuynin punchawpi chaylla chinkanankupaq kasqanta (2 Pedro 3:7, NM). Mana llakipayakuqkunata chinkachiptinmi Diosta kuyaspa kasukuqkunaqa hawkayaypi kawsakusunchik.

Jehova Diosqa kuyakuywanmi tayta-mamakunata yuyarichin imayna tanteasqankuqa wawa-churinkunapaqpas allinninpaq otaq mana allinninpaq kasqanta. Palabranpim nin: ‘Qamkunapas hinaspa miraynikichikkunapas kawsakunaykichikpaqyá akllakuychik [. . .]. Tayta Diosta kuyaspayá kasukuychik paymantaqa amapuniyá kacharikuychikchu’, nispa (Deuteronomio 30:19, 20). ¿Chaynatachu ninman karqa mana kuyapayakuq kaspanqa? Manam, Jehova Diosqa kuyawasqanchikraykum kallpanchawanchik alli kaq ruwaykunata akllakunapaq.